౧౦. అసనబోధియత్థేరఅపదానం

౭౮. ‘‘జాతియా సత్తవస్సోహం, అద్దసం లోకనాయకం;

పసన్నచిత్తో సుమనో, ఉపగచ్ఛిం నరుత్తమం.

౭౯. ‘‘తిస్సస్సాహం భగవతో, లోకజేట్ఠస్స తాదినో;

హట్ఠో హట్ఠేన చిత్తేన, రోపయిం బోధిముత్తమం.

౮౦. ‘‘అసనో నామధేయ్యేన, ధరణీరుహపాదపో;

పఞ్చవస్సే పరిచరిం, అసనం బోధిముత్తమం.

౮౧. ‘‘పుప్ఫితం పాదపం దిస్వా, అబ్భుతం లోమహంసనం;

సకం కమ్మం పకిత్తేన్తో, బుద్ధసేట్ఠం ఉపాగమిం.

౮౨. ‘‘తిస్సో తదా సో సమ్బుద్ధో, సయమ్భూ అగ్గపుగ్గలో;

భిక్ఖుసఙ్ఘే నిసీదిత్వా, ఇమా గాథా అభాసథ.

౮౩. ‘‘‘యేనాయం రోపితా బోధి, బుద్ధపూజా చ సక్కతా;

తమహం కిత్తయిస్సామి, సుణాథ మమ భాసతో.

౮౪. ‘‘‘తింసకప్పాని దేవేసు, దేవరజ్జం కరిస్సతి;

చతుసట్ఠి చక్ఖత్తుం సో, చక్కవత్తీ భవిస్సతి.

౮౫. ‘‘‘తుసితా హి చవిత్వాన, సుక్కమూలేన చోదితో;

ద్వే సమ్పత్తీ అనుభోత్వా, మనుస్సత్తే రమిస్సతి.

౮౬. ‘‘‘పధానపహితత్తో సో, ఉపసన్తో నిరూపధి;

సబ్బాసవే పరిఞ్ఞాయ, నిబ్బాయిస్సతినాసవో’.

౮౭. ‘‘వివేకమనుయుత్తోహం, ఉపసన్తో నిరూపధి;

నాగోవ బన్ధనం ఛేత్వా, విహరామి అనాసవో.

౮౮. ‘‘ద్వేనవుతే ఇతో కప్పే, బోధిం రోపేసహం తదా;

దుగ్గతిం నాభిజానామి, బోధిరోపస్సిదం ఫలం.

౮౯. ‘‘చతుసత్తతితో కప్పే, దణ్డసేనోతి విస్సుతో;

సత్తరతనసమ్పన్నో, చక్కవత్తీ తదా అహుం.

౯౦. ‘‘తేసత్తతిమ్హితో కప్పే, సత్తాహేసుం మహీపతీ;

సమన్తనేమినామేన, రాజానో చక్కవత్తినో.

౯౧. ‘‘పణ్ణవీసతితో కప్పే, పుణ్ణకో నామ ఖత్తియో;

సత్తరతనసమ్పన్నో, చక్కవత్తీ మహబ్బలో.

౯౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అసనబోధియో థేరో ఇమా గాథాయో అభాసిత్థాతి.

అసనబోధియత్థేరస్సాపదానం దసమం.

బీజనివగ్గో ఛట్ఠో.