౬. బీజనివగ్గో
౧. విధూపనదాయకత్థేరఅపదానం
౧. ‘‘పదుముత్తరబుద్ధస్స, లోకజేట్ఠస్స తాదినో;
బీజనికా [వీజనికా (సీ. స్యా.)] మయా దిన్నా, ద్విపదిన్దస్స తాదినో.
౨. ‘‘సకం చిత్తం పసాదేత్వా, పగ్గహేత్వాన అఞ్జలిం;
సమ్బుద్ధమభివాదేత్వా, పక్కమిం ఉత్తరాముఖో.
౩. ‘‘బీజనిం పగ్గహేత్వాన, సత్థా లోకగ్గనాయకో [లోకే అనుత్తరో (సీ.)];
భిక్ఖుసఙ్ఘే ఠితో సన్తో, ఇమా గాథా అభాసథ.
౪. ‘‘‘ఇమినా బీజనిదానేన, చిత్తస్స పణిధీహి [చేతనాపణిధీహి (అఞ్ఞత్థ)] చ;
కప్పానం సతసహస్సం, వినిపాతం న గచ్ఛతి’.
౫. ‘‘ఆరద్ధవీరియో పహితత్తో, చేతోగుణసమాహితో;
జాతియా సత్తవస్సోహం, అరహత్తం అపాపుణిం.
౬. ‘‘సట్ఠికప్పసహస్సమ్హి, బీజమానసనామకా;
సోళసాసింసు రాజానో, చక్కవత్తీ మహబ్బలా.
౭. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా విధూపనదాయకో థేరో ఇమా గాథాయో అభాసిత్థాతి.
విధూపనదాయకత్థేరస్సాపదానం పఠమం.
౨. సతరంసిత్థేరఅపదానం
౮. ‘‘ఉబ్బిద్ధం సేలమారుయ్హ, నిసీది పురిసుత్తమో;
పబ్బతస్సావిదూరమ్హి, బ్రాహ్మణో మన్తపారగూ.
౯. ‘‘ఉపవిట్ఠం మహావీరం, దేవదేవం నరాసభం;
అఞ్జలిం పగ్గహేత్వాన, సన్థవిం లోకనాయకం.
౧౦. ‘‘‘ఏస బుద్ధో మహావీరో, వరధమ్మప్పకాసకో;
జలతి అగ్గిఖన్ధోవ, భిక్ఖుసఙ్ఘపురక్ఖతో.
౧౧. ‘‘‘మహాసముద్దోవ‘క్ఖుబ్భో [’క్ఖోభో (సీ. స్యా.)], అణ్ణవోవ దురుత్తరో;
మిగరాజావసమ్భీతో [ఛమ్భితో (క.)], ధమ్మం దేసేతి చక్ఖుమా’.
౧౨. ‘‘మమ సఙ్కప్పమఞ్ఞాయ, పదుముత్తరనాయకో;
భిక్ఖుసఙ్ఘే ఠితో సత్థా, ఇమా గాథా అభాసథ.
౧౩. ‘‘‘యేనాయం [యేనాహం (క.)] అఞ్జలీ దిన్నో, బుద్ధసేట్ఠో చ థోమితో;
తింసకప్పసహస్సాని, దేవరజ్జం కరిస్సతి.
౧౪. ‘‘‘కప్పసతసహస్సమ్హి, అఙ్గీరససనామకో;
వివట్టచ్ఛదో [వివత్థచ్ఛద్దో (సీ.)] సమ్బుద్ధో, ఉప్పజ్జిస్సతి తావదే.
౧౫. ‘‘‘తస్స ధమ్మేసు దాయాదో, ఓరసో ధమ్మనిమ్మితో;
సతరంసీతి నామేన, అరహా సో భవిస్సతి’.
౧౬. ‘‘జాతియా సత్తవస్సోహం, పబ్బజిం అనగారియం;
సతరంసిమ్హి నామేన, పభా నిద్ధావతే మమ.
౧౭. ‘‘మణ్డపే రుక్ఖమూలే వా, ఝాయీ ఝానరతో అహం;
ధారేమి అన్తిమం దేహం, సమ్మాసమ్బుద్ధసాసనే.
౧౮. ‘‘సట్ఠికప్పసహస్సమ్హి, చతురో రామనామకా;
సత్తరతనసమ్పన్నా, చక్కవత్తీ మహబ్బలా.
౧౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సతరంసి థేరో ఇమా గాథాయో అభాసిత్థాతి.
సతరంసిత్థేరస్సాపదానం దుతియం.
౩. సయనదాయకత్థేరఅపదానం
౨౦. ‘‘పదుముత్తరబుద్ధస్స, సబ్బలోకానుకమ్పినో;
సయనం తస్స పాదాసిం, విప్పసన్నేన చేతసా.
౨౧. ‘‘తేన సయనదానేన, సుఖేత్తే బీజసమ్పదా;
భోగా నిబ్బత్తరే తస్స, సయనస్స ఇదం ఫలం.
౨౨. ‘‘ఆకాసే సేయ్యం కప్పేమి, ధారేమి పథవిం ఇమం;
పాణేసు మే ఇస్సరియం, సయనస్స ఇదం ఫలం.
౨౩. ‘‘పఞ్చకప్పసహస్సమ్హి, అట్ఠ ఆసుం మహాతేజా [మహావరా (సీ.), మహావీరా (స్యా.)];
చతుత్తింసే కప్పసతే, చతురో చ మహబ్బలా.
౨౪. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సయనదాయకో థేరో ఇమా గాథాయో అభాసిత్థాతి.
సయనదాయకత్థేరస్సాపదానం తతియం.
౪. గన్ధోదకియత్థేరఅపదానం
౨౫. ‘‘పదుముత్తరబుద్ధస్స, మహాబోధిమహో అహు;
విచిత్తం ఘటమాదాయ, గన్ధోదకమదాసహం.
౨౬. ‘‘న్హానకాలే చ బోధియా, మహామేఘో పవస్సథ;
నిన్నాదో చ మహా ఆసి, అసనియా ఫలన్తియా.
౨౭. ‘‘తేనేవాసనివేగేన, తత్థ కాలఙ్కతో [కాలకతో (సీ. స్యా.)] అహం [అహుం (సీ.)];
దేవలోకే ఠితో సన్తో, ఇమా గాథా అభాసహం.
౨౮. ‘‘‘అహో బుద్ధో అహో ధమ్మో, అహో నో సత్థుసమ్పదా;
కళేవరం [కలేబరం (సీ.)] మే పతితం, దేవలోకే రమామహం.
౨౯. ‘‘‘ఉబ్బిద్ధం భవనం మయ్హం, సతభూమం సముగ్గతం;
కఞ్ఞాసతసహస్సాని, పరివారేన్తి మం సదా.
౩౦. ‘‘‘ఆబాధా మే న విజ్జన్తి, సోకో మయ్హం న విజ్జతి;
పరిళాహం న పస్సామి, పుఞ్ఞకమ్మస్సిదం ఫలం.
౩౧. ‘‘‘అట్ఠవీసే కప్పసతే, రాజా సంవసితో అహుం;
సత్తరతనసమ్పన్నో, చక్కవత్తీ మహబ్బలో’.
౩౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా గన్ధోదకియో థేరో ఇమా గాథాయో అభాసిత్థాతి.
గన్ధోదకియత్థేరస్సాపదానం చతుత్థం.
౫. ఓపవయ్హత్థేరఅపదానం
౩౩. ‘‘పదుముత్తరబుద్ధస్స, ఆజానీయమదాసహం;
నియ్యాదేత్వాన సమ్బుద్ధే [సమ్బుద్ధం (సీ. క.)], అగమాసిం సకం ఘరం.
౩౪. ‘‘దేవలో నామ నామేన, సత్థునో అగ్గసావకో;
వరధమ్మస్స దాయాదో, ఆగచ్ఛి మమ సన్తికం.
౩౫. ‘‘సపత్తభారో భగవా, ఆజానేయ్యో న కప్పతి;
తవ సఙ్కప్పమఞ్ఞాయ, అధివాసేసి చక్ఖుమా.
౩౬. ‘‘అగ్ఘాపేత్వా వాతజవం, సిన్ధవం సీఘవాహనం;
పదుముత్తరబుద్ధస్స, ఖమనీయమదాసహం.
౩౭. ‘‘యం యం యోనుపపజ్జామి, దేవత్తం అథ మానుసం [దేవే చ మానుసే భవే (సీ. క.)];
ఖమనీయం వాతజవం, చిత్తం నిబ్బత్తతే [ఆజానీయా వాతజవా, విత్తి నిబ్బత్తరే (స్యా.), ఖమనీయా వాతజవా, చిత్తా నిబ్బత్తరే (సీ.)] మమ.
౩౮. ‘‘లాభం తేసం సులద్ధంవ, యే లభన్తుపసమ్పదం;
పునపి పయిరుపాసేయ్యం, బుద్ధో లోకే సచే భవే.
౩౯. ‘‘అట్ఠవీసతిక్ఖత్తుంహం, రాజా ఆసిం మహబ్బలో;
చాతురన్తో విజితావీ, జమ్బుసణ్డస్స [జమ్బుదీపస్స (స్యా.), జమ్బుమణ్డస్స (క.)] జమ్బుఇస్సరో.
౪౦. ‘‘ఇదం పచ్ఛిమకం మయ్హం, చరిమో వత్తతే భవో;
పత్తోస్మి అచలం ఠానం, హిత్వా జయపరాజయం.
౪౧. ‘‘చతుతింససహస్సమ్హి, మహాతేజోసి ఖత్తియో;
సతరతనసమ్పన్నో, చక్కవత్తీ మహబ్బలో.
౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఓపవయ్హో థేరో ఇమా గాథాయో అభాసిత్థాతి.
ఓపవయ్హత్థేరస్సాపదానం పఞ్చమం.
౬. సపరివారాసనత్థేరఅపదానం
౪౩. ‘‘పదుముత్తరబుద్ధస్స, పిణ్డపాతం అదాసహం;
గన్త్వా కిలిట్ఠకం ఠానం [తం భోజనట్ఠానం (సీ.)], మల్లికాహి పరిక్ఖితం [పరిక్ఖిపిం (సీ.)].
౪౪. ‘‘తమ్హాసనమ్హి ఆసీనో, బుద్ధో లోకగ్గనాయకో;
అకిత్తయి పిణ్డపాతం, ఉజుభూతో సమాహితో.
౪౫. ‘‘యథాపి భద్దకే ఖేత్తే, బీజం అప్పమ్పి రోపితం;
సమ్మా ధారం పవేచ్ఛన్తే, ఫలం తోసేతి కస్సకం.
౪౬. ‘‘తథేవాయం పిణ్డపాతో, సుఖేత్తే రోపితో తయా;
భవే నిబ్బత్తమానమ్హి, ఫలం తే [నిబ్బత్తమానం హి, ఫలతో (సీ.)] తోసయిస్సతి [తప్పయిస్సతి (క.)].
౪౭. ‘‘ఇదం వత్వాన సమ్బుద్ధో, జలజుత్తమనామకో;
పిణ్డపాతం గహేత్వాన, పక్కామి ఉత్తరాముఖో.
౪౮. ‘‘సంవుతో పాతిమోక్ఖస్మిం, ఇన్ద్రియేసు చ పఞ్చసు;
పవివేకమనుయుత్తో, విహరామి అనాసవో.
౪౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా సపరివారాసనో థేరో ఇమా గాథాయో అభాసిత్థాతి.
సపరివారాసనత్థేరస్సాపదానం ఛట్ఠం.
౭. పఞ్చదీపకత్థేరఅపదానం
౫౦. ‘‘పదుముత్తరబుద్ధస్స, సబ్బభూతానుకమ్పినో;
సద్దహిత్వాన [సుసణ్ఠహిత్వా (సీ.)] సద్ధమ్మే, ఉజుదిట్ఠి అహోసహం.
౫౧. ‘‘పదీపదానం పాదాసిం, పరివారేత్వాన బోధియం;
సద్దహన్తో పదీపాని, అకరిం తావదే అహం.
౫౨. ‘‘యం యం యోనుపపజ్జామి, దేవత్తం అథ మానుసం;
ఆకాసే ఉక్కం ధారేన్తి, దీపదానస్సిదం ఫలం.
౫౩. ‘‘తిరోకుట్టం తిరోసేలం, సమతిగ్గయ్హ పబ్బతం;
సమన్తా యోజనసతం, దస్సనం అనుభోమహం.
౫౪. ‘‘తేన కమ్మావసేసేన, పత్తోమ్హి ఆసవక్ఖయం;
ధారేమి అన్తిమం దేహం, ద్విపదిన్దస్స సాసనే.
౫౫. ‘‘చతుత్తింసే కప్పసతే, సతచక్ఖుసనామకా;
రాజాహేసుం మహాతేజా, చక్కవత్తీ మహబ్బలా.
౫౬. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా పఞ్చదీపకో థేరో ఇమా గాథాయో అభాసిత్థాతి.
పఞ్చదీపకత్థేరస్సాపదానం సత్తమం.
౮. ధజదాయకత్థేరఅపదానం
౫౭. ‘‘పదుముత్తరబుద్ధస్స, బోధియా పాదపుత్తమే;
హట్ఠో హట్ఠేన చిత్తేన, ధజమారోపయిం అహం.
౫౮. ‘‘పతితపత్తాని గణ్హిత్వా, బహిద్ధా ఛడ్డయిం అహం;
అన్తోసుద్ధం బహిసుద్ధం, అధిముత్తమనాసవం.
౫౯. ‘‘సమ్ముఖా వియ సమ్బుద్ధం, అవన్దిం బోధిముత్తమం;
పదుముత్తరో లోకవిదూ, ఆహుతీనం పటిగ్గహో.
౬౦. ‘‘భిక్ఖుసఙ్ఘే ఠితో సత్థా, ఇమా గాథా అభాసథ;
‘‘‘ఇమినా ధజదానేన, ఉపట్ఠానేన చూభయం.
౬౧. ‘‘‘కప్పానం సతసహస్సం, దుగ్గతిం సో న గచ్ఛతి;
దేవేసు దేవసోభగ్యం, అనుభోస్సతినప్పకం.
౬౨. ‘‘‘అనేకసతక్ఖత్తుఞ్చ, రాజా రట్ఠే భవిస్సతి;
ఉగ్గతో నామ నామేన, చక్కవత్తీ భవిస్సతి.
౬౩. ‘‘‘సమ్పత్తిం అనుభోత్వాన, సుక్కమూలేన చోదితో;
గోతమస్స భగవతో, సాసనేభిరమిస్సతి’.
౬౪. ‘‘పధానపహితత్తోమ్హి, ఉపసన్తో నిరూపధి;
ధారేమి అన్తిమం దేహం, సమ్మాసమ్బుద్ధసాసనే.
౬౫. ‘‘ఏకపఞ్ఞాససహస్సే, కప్పే ఉగ్గతసవ్హయో [సవ్హయా (స్యా.)];
పఞ్ఞాససతసహస్సే, ఖత్తియో మేఘసవ్హయో [ఖత్తియా ఖేమసవ్హయా (స్యా.)].
౬౬. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ధజదాయకో థేరో ఇమా గాథాయో అభాసిత్థాతి.
ధజదాయకత్థేరస్సాపదానం అట్ఠమం.