౧౧. రట్ఠపాలత్థేరఅపదానం

౧౭౯. ‘‘పదుముత్తరస్స భగవతో, లోకజేట్ఠస్స తాదినో;

వరనాగో మయా దిన్నో, ఈసాదన్తో ఉరూళ్హవా.

౧౮౦. ‘‘సేతచ్ఛత్తోపసోభితో, సకప్పనో [సీదబ్బనో (సీ.)] సహత్థిపో;

అగ్ఘాపేత్వాన తం సబ్బం, సఙ్ఘారామం అకారయిం.

౧౮౧. ‘‘చతుపఞ్ఞాససహస్సాని, పాసాదే కారయిం అహం;

మహోఘదానం [మహగ్ఘఞ్చ (సీ.), మయా భత్తం (క.) అప. థేర ౧.౨.౯౯] కరిత్వాన, నియ్యాదేసిం మహేసినో.

౧౮౨. ‘‘అనుమోది మహావీరో, సయమ్భూ అగ్గపుగ్గలో;

సబ్బే జనే హాసయన్తో, దేసేసి అమతం పదం.

౧౮౩. ‘‘తం మే బుద్ధో వియాకాసి, జలజుత్తమనామకో;

భిక్ఖుసఙ్ఘే నిసీదిత్వా, ఇమా గాథా అభాసథ.

౧౮౪. ‘‘‘చతుపఞ్ఞాససహస్సాని, పాసాదే కారయీ అయం;

కథయిస్సామి విపాకం, సుణాథ మమ భాసతో.

౧౮౫. ‘‘‘అట్ఠారససహస్సాని, కూటాగారా భవిస్సరే;

బ్యమ్హుత్తమమ్హి నిబ్బత్తా, సబ్బసోణ్ణమయా చ తే.

౧౮౬. ‘‘‘పఞ్ఞాసక్ఖత్తుం దేవిన్దో, దేవరజ్జం కరిస్సతి;

అట్ఠపఞ్ఞాసక్ఖత్తుఞ్చ, చక్కవత్తీ భవిస్సతి.

౧౮౭. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౮౮. ‘‘‘దేవలోకా చవిత్వాన, సుక్కమూలేన చోదితో;

అడ్ఢే కులే మహాభోగే, నిబ్బత్తిస్సతి తావదే.

౧౮౯. ‘‘‘సో పచ్ఛా పబ్బజిత్వాన, సుక్కమూలేన చోదితో;

రట్ఠపాలోతి నామేన, హేస్సతి సత్థు సావకో.

౧౯౦. ‘‘‘పధానపహితత్తో సో, ఉపసన్తో నిరూపధి;

సబ్బాసవే పరిఞ్ఞాయ, నిబ్బాయిస్సతినాసవో’.

౧౯౧. ‘‘ఉట్ఠాయ అభినిక్ఖమ్మ, జహితా భోగసమ్పదా;

ఖేళపిణ్డేవ భోగమ్హి, పేమం మయ్హం న విజ్జతి.

౧౯౨. ‘‘వీరియం మే ధురధోరయ్హం, యోగక్ఖేమాధివాహనం;

ధారేమి అన్తిమం దేహం, సమ్మాసమ్బుద్ధసాసనే.

౧౯౩. ‘‘కిలేసా ఝాపితా మయ్హం…పే… విహరామి అనాసవో.

౧౯౪. ‘‘స్వాగతం వత మే ఆసి…పే… కతం బుద్ధస్స సాసనం.

౧౯౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా రట్ఠపాలో థేరో ఇమా గాథాయో

అభాసిత్థాతి.

రట్ఠపాలత్థేరస్సాపదానం ఏకాదసమం.

యసవగ్గో ఛపఞ్ఞాసమో.