౫౬. యసవగ్గో
౧. యసత్థేరఅపదానం
౧. ‘‘మహాసముద్దం ఓగ్గయ్హ, భవనం మే సునిమ్మితం;
సునిమ్మితా పోక్ఖరణీ, చక్కవాకూపకూజితా.
౨. ‘‘మన్దారకేహి సఞ్ఛన్నా, పదుముప్పలకేహి చ;
నదీ చ సన్దతే తత్థ, సుపతిత్థా మనోరమా.
౩. ‘‘మచ్ఛకచ్ఛపసఞ్ఛన్నా, నానాదిజసమోత్థటా [నానామిగసమోత్థటా (స్యా.)];
మయూరకోఞ్చాభిరుదా, కోకిలాదీహి వగ్గుహి.
౪. ‘‘పారేవతా రవిహంసా, చక్కవాకా నదీచరా;
తిత్తిరా సాళికా చేత్థ, పావకా [సమ్బకా (క.)] జీవంజీవకా.
౫. ‘‘హంసాకోఞ్చాభినదితా, కోసియా పిఙ్గలా [పిఙ్గలీ (సీ.), సిఙ్గలీ, సిఙ్ఘలీ (క.)] బహూ;
సత్తరతనసమ్పన్నా, మణిముత్తపవాళికా.
౬. ‘‘సబ్బే సోణ్ణమయా రుక్ఖా, నానాఖన్ధసమేరితా;
ఉజ్జోతేన్తి దివారత్తిం, భవనం సబ్బకాలికం.
౭. ‘‘సట్ఠితురియసహస్సాని, సాయం పాతో పవజ్జరే;
సోళసిత్థిసహస్సాని, పరివారేన్తి మం సదా.
౮. ‘‘అభినిక్ఖమ్మ భవనా, సుమేధం లోకనాయకం;
పసన్నచిత్తో సుమనో, వన్దయిం తం [సబ్బదస్సిం (క.)] మహాయసం.
౯. ‘‘సమ్బుద్ధం అభివాదేత్వా, ససఙ్ఘం తం నిమన్తయిం;
అధివాసేసి సో ధీరో, సుమేధో లోకనాయకో.
౧౦. ‘‘మమ ధమ్మకథం కత్వా, ఉయ్యోజేసి మహాముని;
సమ్బుద్ధం అభివాదేత్వా, భవనం మే ఉపాగమిం.
౧౧. ‘‘ఆమన్తయిం పరిజనం, సబ్బే సన్నిపతుం తదా;
‘పుబ్బణ్హసమయం బుద్ధో, భవనం ఆగమిస్సతి’.
౧౨. ‘‘‘లాభా అమ్హం సులద్ధా నో, యే వసామ తవన్తికే;
మయమ్పి బుద్ధసేట్ఠస్స, పూజయిస్సామ సత్థునో’.
౧౩. ‘‘అన్నం పానం పట్ఠపేత్వా, కాలం ఆరోచయిం అహం;
వసీసతసహస్సేహి, ఉపేసి లోకనాయకో.
౧౪. ‘‘పఞ్చఙ్గికేహి తురియేహి, పచ్చుగ్గమమకాసహం;
సబ్బసోణ్ణమయే పీఠే, నిసీది పురిసుత్తమో.
౧౫. ‘‘ఉపరిచ్ఛదనం ఆసి, సబ్బసోణ్ణమయం తదా;
బీజనీయో పవాయన్తి, భిక్ఖుసఙ్ఘం అనుత్తరం.
౧౬. ‘‘పహూతేనన్నపానేన, భిక్ఖుసఙ్ఘం అతప్పయిం;
పచ్చేకదుస్సయుగలే, భిక్ఖుసఙ్ఘస్సదాసహం.
౧౭. ‘‘యం వదేతి సుమేధో సో, ఆహుతీనం పటిగ్గహో;
భిక్ఖుసఙ్ఘే నిసీదిత్వా, ఇమా గాథా అభాసథ.
౧౮. ‘‘‘యో మం అన్నేన పానేన, సబ్బే ఇమే చ తప్పయి;
తమహం కిత్తయిస్సామి, సుణాథ మమ భాసతో.
౧౯. ‘‘‘అట్ఠారసే కప్పసతే, దేవలోకే రమిస్సతి;
సహస్సక్ఖత్తుం రాజాయం, చక్కవత్తీ భవిస్సతి.
౨౦. ‘‘‘ఉపగచ్ఛతి యం యోనిం, దేవత్తం అథ మానుసం;
సబ్బసోణ్ణమయం తస్స, ఛదనం ధారయిస్సతి.
౨౧. ‘‘‘తింసకప్పసహస్సమ్హి, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౨౨. ‘‘‘తస్స ధమ్మేసు దాయాదో, ఓరసో ధమ్మనిమ్మితో;
సబ్బాసవే పరిఞ్ఞాయ, నిబ్బాయిస్సతినాసవో.
౨౩. ‘‘‘భిక్ఖుసఙ్ఘే నిసీదిత్వా, సీహనాదం నదిస్సతి’;
చితకే ఛత్తం ధారేన్తి, హేట్ఠా ఛత్తమ్హి డయ్హథ.
౨౪. ‘‘సామఞ్ఞం మే అనుప్పత్తం, కిలేసా ఝాపితా మయా;
మణ్డపే రుక్ఖమూలే వా, సన్తాసో మే న విజ్జతి.
౨౫. ‘‘తింసకప్పసహస్సమ్హి, యం దానమదదిం తదా;
దుగ్గతిం నాభిజానామి, సబ్బదానస్సిదం ఫలం.
౨౬. ‘‘కిలేసా ఝాపితా మయ్హం, భవా సబ్బే సమూహతా;
నాగోవ బన్ధనం ఛేత్వా, విహరామి అనాసవో.
౨౭. ‘‘స్వాగతం వత మే ఆసి, మమ బుద్ధస్స సన్తికే;
తిస్సో విజ్జా అనుప్పత్తా, కతం బుద్ధస్స సాసనం.
౨౮. ‘‘పటిసమ్భిదా చతస్సో, విమోక్ఖాపి చ అట్ఠిమే;
ఛళభిఞ్ఞా సచ్ఛికతా, కతం బుద్ధస్స సాసనం’’.
ఇత్థం సుదం ఆయస్మా యసో థేరో ఇమా గాథాయో అభాసిత్థాతి.
యసత్థేరస్సాపదానం పఠమం.
౨. నదీకస్సపత్థేరఅపదానం
౨౯. ‘‘పదుముత్తరస్స భగవతో, లోకజేట్ఠస్స తాదినో;
పిణ్డచారం చరన్తస్స, వారతో ఉత్తమం యసం;
అగ్గఫలం గహేత్వాన, అదాసిం సత్థునో అహం.
౩౦. ‘‘తేన కమ్మేన దేవిన్దో, లోకజేట్ఠో నరాసభో;
సమ్పత్తోమ్హి అచలం ఠానం, హిత్వా జయపరాజయం.
౩౧. ‘‘సతసహస్సితో కప్పే, యం ఫలం అదదిం తదా;
దుగ్గతిం నాభిజానామి, అగ్గదానస్సిదం ఫలం.
౩౨. ‘‘కిలేసా ఝాపితా మయ్హం…పే… విహరామి అనాసవో.
౩౩. ‘‘స్వాగతం వత మే ఆసి…పే… కతం బుద్ధస్స సాసనం.
౩౪. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా నదీకస్సపో థేరో ఇమా గాథాయో
అభాసిత్థాతి.
నదీకస్సపత్థేరస్సాపదానం దుతియం.
౩. గయాకస్సపత్థేరఅపదానం
౩౫. ‘‘అజినచమ్మవత్థోహం [అజినవత్తం నివత్తోహం (సీ.)], ఖారిభారధరో తదా;
ఖారికం హారయిత్వాన, కోలం అహాసి అస్సమం.
౩౬. ‘‘భగవా తమ్హి సమయే, ఏకో అదుతియో జినో;
మమస్సమం ఉపాగచ్ఛి, జోతేన్తో సబ్బకాలికం.
౩౭. ‘‘సకం చిత్తం పసాదేత్వా, అభివాదేత్వాన సుబ్బతం;
ఉభో హత్థేహి పగ్గయ్హ, కోలం బుద్ధస్సదాసహం.
౩౮. ‘‘ఏకతింసే ఇతో కప్పే, యం ఫలం అదదిం తదా;
దుగ్గతిం నాభిజానామి, కోలదానస్సిదం ఫలం.
౩౯. ‘‘కిలేసా ఝాపితా మయ్హం…పే… విహరామి అనాసవో.
౪౦. ‘‘స్వాగతం వత మే ఆసి…పే… కతం బుద్ధస్స సాసనం.
౪౧. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా గయాకస్సపో థేరో ఇమా గాథాయో
అభాసిత్థాతి.
గయాకస్సపత్థేరస్సాపదానం తతియం.
౪. కిమిలత్థేరఅపదానం
౪౨. ‘‘నిబ్బుతే కకుసన్ధమ్హి, బ్రాహ్మణమ్హి వుసీమతి;
గహేత్వా సలలం మాలం, మణ్డపం కారయిం అహం.
౪౩. ‘‘తావతింసం గతో సన్తో, లభిమ్హ [లభామి (క.)] బ్యమ్హముత్తమం;
అఞ్ఞే దేవేతిరోచామి, పుఞ్ఞకమ్మస్సిదం ఫలం.
౪౪. ‘‘దివా వా యది వా రత్తిం, చఙ్కమన్తో ఠితో చహం;
ఛన్నో సలలపుప్ఫేహి, పుఞ్ఞకమ్మస్సిదం ఫలం.
౪౫. ‘‘ఇమస్మింయేవ కప్పమ్హి, యం బుద్ధమభిపూజయిం;
దుగ్గతిం నాభిజానామి, బుద్ధపూజాయిదం ఫలం.
౪౬. ‘‘కిలేసా ఝాపితా మయ్హం…పే… విహరామి అనాసవో.
౪౭. ‘‘స్వాగతం వత మే ఆసి…పే… కతం బుద్ధస్స సాసనం.
౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా కిమిలో [కిమ్బిలో (సీ.)] థేరో ఇమా గాథాయో
అభాసిత్థాతి.
కిమిలత్థేరస్సాపదానం చతుత్థం.
౫. వజ్జీపుత్తత్థేరఅపదానం
౪౯. ‘‘సహస్సరంసీ భగవా, సయమ్భూ అపరాజితో;
వివేకా వుట్ఠహిత్వాన, గోచరాయాభినిక్ఖమి.
౫౦. ‘‘ఫలహత్థో అహం దిస్వా, ఉపగచ్ఛిం నరాసభం;
పసన్నచిత్తో సుమనో, సవణ్టం అదదిం ఫలం.
౫౧. ‘‘చతున్నవుతితో కప్పే, యం ఫలం అదదిం తదా;
దుగ్గతిం నాభిజానామి, ఫలదానస్సిదం ఫలం.
౫౨. ‘‘కిలేసా ఝాపితా మయ్హం…పే… విహరామి అనాసవో.
౫౩. ‘‘స్వాగతం వత మే ఆసి…పే… కతం బుద్ధస్స సాసనం.
౫౪. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా వజ్జీపుత్తో థేరో ఇమా గాథాయో
అభాసిత్థాతి.
వజ్జీపుత్తత్థేరస్సాపదానం పఞ్చమం.
౬. ఉత్తరత్థేరఅపదానం
౫౫. ‘‘సుమేధో నామ సమ్బుద్ధో, బాత్తింసవరలక్ఖణో;
వివేకకామో భగవా, హిమవన్తముపాగమి.
౫౬. ‘‘అజ్ఝోగాహేత్వా హిమవన్తం, అగ్గో కారుణికో ముని;
పల్లఙ్కం ఆభుజిత్వాన, నిసీది పురిసుత్తమో.
౫౭. ‘‘విజ్జధరో తదా ఆసిం, అన్తలిక్ఖచరో అహం;
తిసూలం సుగతం గయ్హ, గచ్ఛామి అమ్బరే తదా.
౫౮. ‘‘పబ్బతగ్గే యథా అగ్గి, పుణ్ణమాయేవ చన్దిమా;
వనం ఓభాసతే బుద్ధో, సాలరాజావ ఫుల్లితో.
౫౯. ‘‘వనగ్గా నిక్ఖమిత్వాన, బుద్ధరంసీభిధావరే [బుద్ధరంసీ విధావరే (సీ. క.)];
నళగ్గివణ్ణసఙ్కాసా [నళగ్గివ నసఙ్కాసం (సీ.)], దిస్వా చిత్తం పసాదయిం.
౬౦. ‘‘విచినం అద్దసం పుప్ఫం, కణికారం దేవగన్ధికం;
తీణి పుప్ఫాని ఆదాయ, బుద్ధసేట్ఠమపూజయిం.
౬౧. ‘‘బుద్ధస్స ఆనుభావేన, తీణి పుప్ఫాని మే తదా;
ఉద్ధం వణ్టా అధోపత్తా, ఛాయం కుబ్బన్తి సత్థునో.
౬౨. ‘‘తేన కమ్మేన సుకతేన, చేతనాపణిధీహి చ;
జహిత్వా మానుసం దేహం తావతింసమగచ్ఛహం.
౬౩. ‘‘తత్థ మే సుకతం బ్యమ్హం, కణికారీతి [కణికారోతి (సీ.)] ఞాయతి;
సట్ఠియోజనముబ్బేధం, తింసయోజనవిత్థతం.
౬౪. ‘‘సహస్సకణ్డం సతభేణ్డు, ధజాలు హరితామయం;
సతసహస్సనియ్యూహా [సతసహస్సాని బ్యూహాని (సీ.)], బ్యమ్హే పాతుభవింసు [పాతురహంసు (సీ.), పాతురహింసు (క.)] మే.
౬౫. ‘‘సోణ్ణమయా మణిమయా, లోహితఙ్కమయాపి చ;
ఫలికాపి చ పల్లఙ్కా, యేనిచ్ఛకా యదిచ్ఛకా.
౬౬. ‘‘మహారహఞ్చ సయనం, తూలికా వికతీయుతం;
ఉద్ధలోమిఞ్చ ఏకన్తం, బిమ్బోహనసమాయుతం.
౬౭. ‘‘భవనా నిక్ఖమిత్వాన, చరన్తో దేవచారికం;
యథా ఇచ్ఛామి [యథా గచ్ఛామి (సీ.)] గమనం, దేవసఙ్ఘపురక్ఖతో.
౬౮. ‘‘పుప్ఫస్స హేట్ఠా తిట్ఠామి, ఉపరిచ్ఛదనం మమ;
సమన్తా యోజనసతం, కణికారేహి ఛాదితం.
౬౯. ‘‘సట్ఠితురియసహస్సాని, సాయపాతం ఉపట్ఠహుం;
పరివారేన్తి మం నిచ్చం, రత్తిన్దివమతన్దితా.
౭౦. ‘‘తత్థ నచ్చేహి గీతేహి, తాలేహి వాదితేహి చ;
రమామి ఖిడ్డా రతియా, మోదామి కామకామహం.