౧౦. ఉపవానత్థేరఅపదానం

౧౨౨. ‘‘పదుముత్తరో నామ జినో, సబ్బధమ్మాన పారగూ;

జలిత్వా అగ్గిక్ఖన్ధోవ, సమ్బుద్ధో పరినిబ్బుతో.

౧౨౩. ‘‘మహాజనా సమాగమ్మ, పూజయిత్వా తథాగతం;

చితం కత్వాన సుగతం, సరీరం అభిరోపయుం.

౧౨౪. ‘‘సరీరకిచ్చం కత్వాన, ధాతుం తత్థ సమానయుం;

సదేవమనుస్సా సబ్బే, బుద్ధథూపం అకంసు తే.

౧౨౫. ‘‘పఠమా కఞ్చనమయా, దుతియా చ మణిమయా;

తతియా రూపియమయా, చతుత్థీ ఫలికామయా.

౧౨౬. ‘‘తత్థ పఞ్చమికా చేవ [తత్థ పఞ్చమికా చేతి (సీ.)], లోహితఙ్కమయా అహు;

ఛట్ఠా మసారగల్లస్స, సబ్బం రతనమయూపరి.

౧౨౭. ‘‘జఙ్ఘా మణిమయా ఆసి, వేదికా రతనామయా;

సబ్బసోణ్ణమయో థూపో, ఉద్ధం యోజనముగ్గతో.

౧౨౮. ‘‘దేవా తత్థ సమాగన్త్వా, ఏకతో మన్తయుం తదా;

‘మయమ్పి థూపం కస్సామ, లోకనాథస్స తాదినో.

౧౨౯. ‘‘‘ధాతు ఆవేణికా నత్థి, సరీరం ఏకపిణ్డితం;

ఇమమ్హి బుద్ధథూపమ్హి, కస్సామ కఞ్చుకం మయం’.

౧౩౦. ‘‘దేవా సత్తహి రత్నేహి, అఞ్ఞం వడ్ఢేసుం యోజనం;

థూపో ద్వియోజనుబ్బేధో, తిమిరం బ్యపహన్తి సో.

౧౩౧. ‘‘నాగా తత్థ సమాగన్త్వా, ఏకతో మన్తయుం తదా;

‘మనుస్సా చేవ దేవా చ, బుద్ధథూపం అకంసు తే.

౧౩౨. ‘‘‘మా నో పమత్తా అస్సుమ్హ, అప్పమత్తా సదేవకా;

మయమ్పి థూపం కస్సామ, లోకనాథస్స తాదినో’.

౧౩౩. ‘‘ఇన్దనీలం మహానీలం, అథో జోతిరసం మణిం;

ఏకతో సన్నిపాతేత్వా, బుద్ధథూపం అఛాదయుం.

౧౩౪. ‘‘సబ్బం మణిమయం ఆసి, యావతా [తావతా (క.)] బుద్ధచేతియం;

తియోజనసముబ్బేధం, ఆలోకకరణం తదా.

౧౩౫. ‘‘గరుళా చ సమాగన్త్వా, ఏకతో మన్తయుం తదా;

‘మనుస్సా దేవనాగా చ, బుద్ధపూజం అకంసు తే.

౧౩౬. ‘‘‘మా నో పమత్తా అస్సుమ్హ, అప్పమత్తా సదేవకా;

మయమ్పి థూపం కస్సామ, లోకనాథస్స తాదినో’.

౧౩౭. ‘‘సబ్బం మణిమయం థూపం, అకరుం తే చ కఞ్చుకం;

యోజనం తేపి వడ్ఢేసుం, ఆయతం బుద్ధచేతియం.

౧౩౮. ‘‘చతుయోజనముబ్బేధో, బుద్ధథూపో విరోచతి;

ఓభాసేతి దిసా సబ్బా, సతరంసీవ ఉగ్గతో.

౧౩౯. ‘‘కుమ్భణ్డా చ సమాగన్త్వా, ఏకతో మన్తయుం తదా;

‘మనుస్సా చేవ దేవా చ, నాగా చ గరుళా తథా.

౧౪౦. ‘‘‘పచ్చేకం బుద్ధసేట్ఠస్స, అకంసు థూపముత్తమం;

మా నో పమత్తా అస్సుమ్హ, అప్పమత్తా సదేవకా.

౧౪౧. ‘‘‘మయమ్పి థూపం కస్సామ, లోకనాథస్స తాదినో;

రతనేహి ఛాదేస్సామ, ఆయతం బుద్ధచేతియం’.

౧౪౨. ‘‘యోజనం తేపి వడ్ఢేసుం, ఆయతం బుద్ధచేతియం;

పఞ్చయోజనముబ్బేధో, థూపో ఓభాసతే తదా.

౧౪౩. ‘‘యక్ఖా తత్థ సమాగన్త్వా, ఏకతో మన్తయుం తదా;

‘మనుస్సా దేవనాగా చ, గరుళా చ కుమ్భణ్డకా.

౧౪౪. ‘‘‘పచ్చేకం బుద్ధసేట్ఠస్స, అకంసు థూపముత్తమం;

మా నో పమత్తా అస్సుమ్హ, అప్పమత్తా సదేవకా.

౧౪౫. ‘‘‘మయమ్పి థూపం కస్సామ, లోకనాథస్స తాదినో;

ఫలికా ఛాదయిస్సామ, ఆయతం బుద్ధచేతియం’.

౧౪౬. ‘‘యోజనం తేపి వడ్ఢేసుం, ఆయతం బుద్ధచేతియం;

ఛయోజనికముబ్బేధో, థూపో ఓభాసతే తదా.

౧౪౭. ‘‘గన్ధబ్బా చ సమాగన్త్వా, ఏకతో మన్తయుం తదా;

‘మనుజా దేవతా నాగా, కుమ్భణ్డా గరుళా తథా [కుమ్భణ్డా చ యక్ఖా తథా (సీ.)].

౧౪౮. ‘‘‘సబ్బే అకంసు బుద్ధథూపం, మయమేత్థ అకారకా;

మయమ్పి థూపం కస్సామ, లోకనాథస్స తాదినో’.

౧౪౯. ‘‘వేదియో సత్త కత్వాన, ధజం ఛత్తం అకంసు తే;

సబ్బసోణ్ణమయం థూపం, గన్ధబ్బా కారయుం తదా.

౧౫౦. ‘‘సత్తయోజనముబ్బేధో, థూపో ఓభాసతే తదా;

రత్తిన్దివా న ఞాయన్తి, ఆలోకో హోతి సబ్బదా.

౧౫౧. ‘‘అభిభోన్తి న తస్సాభా, చన్దసూరా సతారకా;

సమన్తా యోజనసతే, పదీపోపి న పజ్జలి.

౧౫౨. ‘‘తేన కాలేన యే కేచి, థూపం పూజేన్తి మానుసా;

న తే థూపం ఆరుహన్తి, అమ్బరే ఉక్ఖిపన్తి తే.

౧౫౩. ‘‘దేవేహి ఠపితో యక్ఖో, అభిసమ్మతనామకో;

ధజం వా పుప్ఫదామం వా, అభిరోపేతి ఉత్తరిం.

౧౫౪. ‘‘న తే పస్సన్తి తం యక్ఖం, దామం పస్సన్తి గచ్ఛతో;

ఏవం పస్సిత్వా గచ్ఛన్తా, సబ్బే గచ్ఛన్తి సుగ్గతిం.

౧౫౫. ‘‘విరుద్ధా యే పావచనే, పసన్నా యే చ సాసనే;

పాటిహీరం దట్ఠుకామా, థూపం పూజేన్తి మానుసా.

౧౫౬. ‘‘నగరే హంసవతియా, అహోసిం భతకో తదా;

ఆమోదితం జనం దిస్వా, ఏవం చిన్తేసహం తదా.

౧౫౭. ‘‘‘ఉళారో భగవా నేసో, యస్స ధాతుఘరే దిసం;

ఇమా చ జనతా తుట్ఠా, కారం కుబ్బం న తప్పరే.

౧౫౮. ‘‘‘అహమ్పి కారం కస్సామి, లోకనాథస్స తాదినో;

తస్స ధమ్మేసు దాయాదో, భవిస్సామి అనాగతే’.

౧౫౯. ‘‘సుధోతం రజకేనాహం, ఉత్తరేయ్యం పటం మమ;

వేళగ్గే ఆలగ్గేత్వాన, ధజం ఉక్ఖిపిమమ్బరే.

౧౬౦. ‘‘అభిసమ్మతకో గయ్హ, అమ్బరే హాసి మే ధజం;

వాతేరితం ధజం దిస్వా, భియ్యో హాసం జనేసహం.

౧౬౧. ‘‘తత్థ చిత్తం పసాదేత్వా, సమణం ఉపసఙ్కమిం;

తం భిక్ఖుం అభివాదేత్వా, విపాకం పుచ్ఛహం ధజే.

౧౬౨. ‘‘సో మే కథేసి ఆనన్దీ, పీతిసఞ్జననం మమ;

‘తస్స ధజస్స విపాకం, అనుభోస్ససి సబ్బదా.

౧౬౩. ‘‘‘హత్థిఅస్సరథాపత్తీ, సేనా చ చతురఙ్గినీ;

పరివారేస్సన్తి తం నిచ్చం, ధజదానస్సిదం ఫలం.

౧౬౪. ‘‘‘సట్ఠితురియసహస్సాని, భేరియో సమలఙ్కతా;

పరివారేస్సన్తి తం నిచ్చం, ధజదానస్సిదం ఫలం.

౧౬౫. ‘‘‘ఛళసీతిసహస్సాని, నారియో సమలఙ్కతా;

విచిత్తవత్థాభరణా, ఆముక్కమణికుణ్డలా.

౧౬౬. ‘‘‘ఆళారపమ్హా హసులా, సుసఞ్ఞా [సుత్థనా (సీ.) అప. థేర ౨.౪౮.౧౯ మణిపూజకత్థేరాపదానేపి] తనుమజ్ఝిమా;

పరివారేస్సన్తి తం నిచ్చం, ధజదానస్సిదం ఫలం.

౧౬౭. ‘‘‘తింసకప్పసహస్సాని, దేవలోకే రమిస్ససి;

అసీతిక్ఖత్తుం దేవిన్దో, దేవరజ్జం కరిస్ససి.

౧౬౮. ‘‘‘సహస్సక్ఖత్తుం రాజా చ, చక్కవత్తీ భవిస్సతి;

పదేసరజ్జం విపులం, గణనాతో అసఙ్ఖియం.

౧౬౯. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౭౦. ‘‘‘దేవలోకా చవిత్వాన, సుక్కమూలేన చోదితో;

పుఞ్ఞకమ్మేన సఞ్ఞుత్తో, బ్రహ్మబన్ధు భవిస్ససి.

౧౭౧. ‘‘‘అసీతికోటిం ఛడ్డేత్వా, దాసే కమ్మకరే బహూ;

గోతమస్స భగవతో, సాసనే పబ్బజిస్ససి.

౧౭౨. ‘‘‘ఆరాధయిత్వా సమ్బుద్ధం, గోతమం సక్యపుఙ్గవం;

ఉపవానోతి నామేన, హేస్ససి సత్థు సావకో’.

౧౭౩. ‘‘సతసహస్సే కతం కమ్మం, ఫలం దస్సేసి మే ఇధ;

సుముత్తో సరవేగోవ, కిలేసే ఝాపయిం [కిలేసా ఝాపితా (సీ.)] మమ.

౧౭౪. ‘‘చక్కవత్తిస్స సన్తస్స, చాతుద్దీపిస్సరస్స మే;

తీణి యోజనాని సామన్తా, ఉస్సీయన్తి ధజా సదా.

౧౭౫. ‘‘సతసహస్సితో కప్పే, యం కమ్మమకరిం తదా;

దుగ్గతిం నాభిజానామి, ధజదానస్సిదం ఫలం.

౧౭౬. ‘‘కిలేసా ఝాపితా మయ్హం…పే… విహరామి అనాసవో.

౧౭౭. ‘‘స్వాగతం వత మే ఆసి…పే… కతం బుద్ధస్స సాసనం.

౧౭౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉపవానత్థేరో ఇమా గాథాయో

అభాసిత్థాతి.

ఉపవానత్థేరస్సాపదానం దసమం.