౯. వనవచ్ఛత్థేరఅపదానం

౨౫౧. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౨౫౨. ‘‘తదాహం పబ్బజిత్వాన, తస్స బుద్ధస్స సాసనే;

యావజీవం చరిత్వాన, బ్రహ్మచారం తతో చుతో.

౨౫౩. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౫౪. ‘‘తతో చుతో అరఞ్ఞమ్హి, కపోతో ఆసహం తహిం;

వసతే గుణసమ్పన్నో, భిక్ఖు ఝానరతో సదా.

౨౫౫. ‘‘మేత్తచిత్తో కారుణికో, సదా పముదితాననో;

ఉపేక్ఖకో మహావీరో, అప్పమఞ్ఞాసు కోవిదో.

౨౫౬. ‘‘వినీవరణసఙ్కప్పే, సబ్బసత్తహితాసయే;

విసట్ఠో నచిరేనాసిం, తస్మిం సుగతసావకే.

౨౫౭. ‘‘ఉపేచ్చ పాదమూలమ్హి, నిసిన్నస్స తదాస్సమే;

కదాచి సామిసం దేతి, ధమ్మం దేసేసి చేకదా.

౨౫౮. ‘‘తదా విపులపేమేన, ఉపాసిత్వా జినత్రజం;

తతో చుతో గతో సగ్గం, పవాసో సఘరం యథా.

౨౫౯. ‘‘సగ్గా చుతో మనుస్సేసు, నిబ్బత్తో పుఞ్ఞకమ్మునా;

అగారం ఛడ్డయిత్వాన, పబ్బజిం బహుసో అహం.

౨౬౦. ‘‘సమణో తాపసో విప్పో, పరిబ్బజో తథేవహం;

హుత్వా వసిం అరఞ్ఞమ్హి, అనేకసతసో అహం.

౨౬౧. ‘‘పచ్ఛిమే చ భవే దాని, రమ్మే కపిలవత్థవే;

వచ్ఛగోత్తో దిజో తస్స, జాయాయ అహమోక్కమిం.

౨౬౨. ‘‘మాతు మే దోహళో ఆసి, తిరోకుచ్ఛిగతస్స మే;

జాయమానసమీపమ్హి, వనవాసాయ నిచ్ఛయో.

౨౬౩. ‘‘తతో మే అజనీ మాతా, రమణీయే వనన్తరే;

గబ్భతో నిక్ఖమన్తం మం, కాసాయేన పటిగ్గహుం.

౨౬౪. ‘‘తతో కుమారో సిద్ధత్థో, జాతో సక్యకులద్ధజో;

తస్స మిత్తో పియో ఆసిం, సంవిసట్ఠో సుమానియో.

౨౬౫. ‘‘సత్తసారేభినిక్ఖన్తే, ఓహాయ విపులం యసం;

అహమ్పి పబ్బజిత్వాన, హిమవన్తముపాగమిం.

౨౬౬. ‘‘వనాలయం భావనీయం, కస్సపం ధుతవాదికం;

దిస్వా సుత్వా జినుప్పాదం, ఉపేసిం నరసారథిం.

౨౬౭. ‘‘సో మే ధమ్మమదేసేసి, సబ్బత్థం సమ్పకాసయం;

తతోహం పబ్బజిత్వాన, వనమేవ పునాగమం [పునాగమిం (సీ. పీ.), పునోక్కమం (స్యా.)].

౨౬౮. ‘‘తత్థాప్పమత్తో విహరం, ఛళభిఞ్ఞా అఫస్సయిం [అపస్సయిం (స్యా. క.)];

అహో సులద్ధలాభోమ్హి, సుమిత్తేనానుకమ్పితో.

౨౬౯. ‘‘కిలేసా ఝాపితా మయ్హం…పే… విహరామి అనాసవో.

౨౭౦. ‘‘స్వాగతం వత మే ఆసి…పే… కతం బుద్ధస్స సాసనం.

౨౭౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వనవచ్ఛో థేరో ఇమా గాథాయో

అభాసిత్థాతి.

వనవచ్ఛత్థేరస్సాపదానం నవమం.