౧౦. చూళసుగన్ధత్థేరఅపదానం

౨౭౨. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౨౭౩. ‘‘అనుబ్యఞ్జనసమ్పన్నో, బాత్తింసవరలక్ఖణో;

బ్యామప్పభాపరివుతో, రంసిజాలసమోత్థటో.

౨౭౪. ‘‘అస్సాసేతా యథా చన్దో, సూరియోవ పభఙ్కరో;

నిబ్బాపేతా యథా మేఘో, సాగరోవ గుణాకరో.

౨౭౫. ‘‘ధరణీరివ సీలేన, హిమవావ సమాధినా;

ఆకాసో వియ పఞ్ఞాయ, అసఙ్గో అనిలో యథా.

౨౭౬. ‘‘తదాహం బారాణసియం, ఉపపన్నో మహాకులే;

పహూతధనధఞ్ఞస్మిం, నానారతనసఞ్చయే.

౨౭౭. ‘‘మహతా పరివారేన, నిసిన్నం లోకనాయకం;

ఉపేచ్చ ధమ్మమస్సోసిం, అమతంవ మనోహరం.

౨౭౮. ‘‘ద్వత్తింసలక్ఖణధరో, సనక్ఖత్తోవ చన్దిమా;

అనుబ్యఞ్జనసమ్పన్నో, సాలరాజావ ఫుల్లితో.

౨౭౯. ‘‘రంసిజాలపరిక్ఖిత్తో, దిత్తోవ కనకాచలో;

బ్యామప్పభాపరివుతో, సతరంసీ దివాకరో.

౨౮౦. ‘‘సోణ్ణాననో జినవరో, సమణీవ [రమ్మణీవ (స్యా.)] సిలుచ్చయో;

కరుణాపుణ్ణహదయో, గుణేన వియ సాగరో.

౨౮౧. ‘‘లోకవిస్సుతకిత్తి చ, సినేరూవ నగుత్తమో;

యససా విత్థతో వీరో, ఆకాససదిసో ముని.

౨౮౨. ‘‘అసఙ్గచిత్తో సబ్బత్థ, అనిలో వియ నాయకో;

పతిట్ఠా సబ్బభూతానం, మహీవ మునిసత్తమో.

౨౮౩. ‘‘అనుపలిత్తో లోకేన, తోయేన పదుమం యథా;

కువాదగచ్ఛదహనో, అగ్గిఖన్ధోవ సోభసి [సోభతి (సీ.), సో వసి (స్యా. క.)].

౨౮౪. ‘‘అగధో వియ సబ్బత్థ, కిలేసవిసనాసకో;

గన్ధమాదనసేలోవ, గుణగన్ధవిభూసితో.

౨౮౫. ‘‘గుణానం ఆకరో వీరో, రతనానంవ సాగరో;

సిన్ధూవ వనరాజీనం, కిలేసమలహారకో.

౨౮౬. ‘‘విజయీవ మహాయోధో, మారసేనావమద్దనో;

చక్కవత్తీవ సో రాజా, బోజ్ఝఙ్గరతనిస్సరో.

౨౮౭. ‘‘మహాభిసక్కసఙ్కాసో, దోసబ్యాధితికిచ్ఛకో;

సల్లకత్తో యథా వేజ్జో, దిట్ఠిగణ్డవిఫాలకో.

౨౮౮. ‘‘సో తదా లోకపజ్జోతో, సనరామరసక్కతో;

పరిసాసు నరాదిచ్చో, ధమ్మం దేసయతే జినో.

౨౮౯. ‘‘దానం దత్వా మహాభోగో, సీలేన సుగతూపగో;

భావనాయ చ నిబ్బాతి, ఇచ్చేవమనుసాసథ.

౨౯౦. ‘‘దేసనం తం మహస్సాదం, ఆదిమజ్ఝన్తసోభణం;

సుణన్తి పరిసా సబ్బా, అమతంవ మహారసం.

౨౯౧. ‘‘సుత్వా సుమధురం ధమ్మం, పసన్నో జినసాసనే;

సుగతం సరణం గన్త్వా, యావజీవం నమస్సహం.

౨౯౨. ‘‘మునినో గన్ధకుటియా, ఓపుఞ్జేసిం [ఉబ్బట్టేసిం (స్యా.)] తదా మహిం;

చతుజ్జాతేన గన్ధేన, మాసే అట్ఠ దినేస్వహం.

౨౯౩. ‘‘పణిధాయ సుగన్ధత్తం, సరీరవిస్సగన్ధినో [సరీరస్స విగన్ధినో (సీ. స్యా. పీ.)];

తదా జినో వియాకాసి, సుగన్ధతనులాభితం.

౨౯౪. ‘‘‘యో యం గన్ధకుటిభూమిం, గన్ధేనోపుఞ్జతే సకిం;

తేన కమ్మవిపాకేన, ఉపపన్నో తహిం తహిం.

౨౯౫. ‘‘‘సుగన్ధదేహో సబ్బత్థ, భవిస్సతి అయం నరో;

గుణగన్ధయుత్తో హుత్వా, నిబ్బాయిస్సతినాసవో’.

౨౯౬. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౯౭. ‘‘పచ్ఛిమే చ భవే దాని, జాతో విప్పకులే అహం;

గబ్భం మే వసతో మాతా, దేహేనాసి సుగన్ధితా.

౨౯౮. ‘‘యదా చ మాతుకుచ్ఛిమ్హా, నిక్ఖమామి తదా పురీ [పురం (స్యా. క.)];

సావత్థిసబ్బగన్ధేహి, వాసితా వియ వాయథ.

౨౯౯. ‘‘పుప్ఫవస్సఞ్చ సురభి, దిబ్బగన్ధం మనోరమం;

ధూపాని చ మహగ్ఘాని, ఉపవాయింసు తావదే.

౩౦౦. ‘‘దేవా చ సబ్బగన్ధేహి, ధూపపుప్ఫేహి తం ఘరం;

వాసయింసు సుగన్ధేన, యస్మిం జాతో అహం ఘరే.

౩౦౧. ‘‘యదా చ తరుణో భద్దో, పఠమే యోబ్బనే ఠితో;

తదా సేలం [సేసం (స్యా.)] సపరిసం, వినేత్వా నరసారథి.

౩౦౨. ‘‘తేహి సబ్బేహి పరివుతో [సహితో (సీ. స్యా. పీ.)], సావత్థిపురమాగతో;

తదా బుద్ధానుభావం తం, దిస్వా పబ్బజితో అహం.

౩౦౩. ‘‘సీలం సమాధిపఞ్ఞఞ్చ, విముత్తిఞ్చ అనుత్తరం;

భావేత్వా చతురో ధమ్మే, పాపుణిం ఆసవక్ఖయం.

౩౦౪. ‘‘యదా పబ్బజితో చాహం, యదా చ అరహా అహుం;

నిబ్బాయిస్సం యదా చాహం, గన్ధవస్సో తదా అహు.

౩౦౫. ‘‘సరీరగన్ధో చ సదాతిసేతి [సదా వాసేతి (క.)] మే, మహారహం చన్దనచమ్పకుప్పలం;

తథేవ గన్ధే ఇతరే చ సబ్బసో, పసయ్హ వాయామి తతో తహిం [యహిం (స్యా.)] తహిం.

౩౦౬. ‘‘కిలేసా ఝాపితా మయ్హం…పే… విహరామి అనాసవో.

౩౦౭. ‘‘స్వాగతం వత మే ఆసి…పే… కతం బుద్ధస్స సాసనం.

౩౦౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చూళసుగన్ధో థేరో ఇమా గాథాయో అభాసిత్థాతి;

చూళసుగన్ధత్థేరస్సాపదానం దసమం.

భద్దియవగ్గో పఞ్చపఞ్ఞాసమో.