౮. లోమసకఙ్గియత్థేరఅపదానం

౨౨౫. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౨౨౬. ‘‘తదాహం చన్దనో చేవ, పబ్బజిత్వాన సాసనే;

ఆపాణకోటికం ధమ్మం, పూరయిత్వాన సాసనే.

౨౨౭. ‘‘తతో చుతా సన్తుసితం, ఉపపన్నా ఉభో మయం;

తత్థ దిబ్బేహి నచ్చేహి, గీతేహి వాదితేహి చ.

౨౨౮. ‘‘రూపాదిదసహఙ్గేహి, అభిభోత్వాన సేసకే;

యావతాయుం వసిత్వాన, అనుభోత్వా మహాసుఖం.

౨౨౯. ‘‘తతో చవిత్వా తిదసం, చన్దనో ఉపపజ్జథ;

అహం కపిలవత్థుస్మిం, అజాయిం సాకియత్రజో.

౨౩౦. ‘‘యదా ఉదాయిత్థేరేన, అజ్ఝిట్ఠో లోకనాయకో;

అనుకమ్పియ సక్యానం, ఉపేసి కపిలవ్హయం.

౨౩౧. ‘‘తదాతిమానినో సక్యా, న బుద్ధస్స గుణఞ్ఞునో;

పణమన్తి న సమ్బుద్ధం, జాతిథద్ధా అనాదరా.

౨౩౨. ‘‘తేసం సఙ్కప్పమఞ్ఞాయ, ఆకాసే చఙ్కమీ జినో;

పజ్జున్నో వియ వస్సిత్థ, పజ్జలిత్థ యథా సిఖీ.

౨౩౩. ‘‘దస్సేత్వా రూపమతులం, పున అన్తరధాయథ;

ఏకోపి హుత్వా బహుధా, అహోసి పునరేకకో.

౨౩౪. ‘‘అన్ధకారం పకాసఞ్చ, దస్సయిత్వా అనేకధా;

పాటిహేరం కరిత్వాన, వినయీ ఞాతకే ముని.

౨౩౫. ‘‘చాతుద్దీపో మహామేఘో, తావదేవ పవస్సథ;

తదా హి జాతకం బుద్ధో, వేస్సన్తరమదేసయి.

౨౩౬. ‘‘తదా తే ఖత్తియా సబ్బే, నిహన్త్వా జాతిజం మదం;

ఉపేసుం సరణం బుద్ధం, ఆహ సుద్ధోదనో తదా.

౨౩౭. ‘‘‘ఇదం తతియం తవ భూరిపఞ్ఞ, పాదాని వన్దామి సమన్తచక్ఖు;

యదాభిజాతో పథవీ పకమ్పయీ, యదా చ తం నజ్జహి జమ్బుఛాయా’.

౨౩౮. ‘‘తదా బుద్ధానుభావం తం, దిస్వా విమ్హితమానసో;

పబ్బజిత్వాన తత్థేవ, నివసిం మాతుపూజకో.

౨౩౯. ‘‘చన్దనో దేవపుత్తో మం, ఉపగన్త్వానుపుచ్ఛథ;

భద్దేకరత్తస్స తదా, సఙ్ఖేపవిత్థారం నయం.

౨౪౦. ‘‘చోదితోహం తదా తేన, ఉపేచ్చ నరనాయకం;

భద్దేకరత్తం సుత్వాన, సంవిగ్గో వనమామకో.

౨౪౧. ‘‘తదా మాతరమపుచ్ఛిం, వనే వచ్ఛామి ఏకకో;

సుఖుమాలోతి మే మాతా, వారయీ తం [తే (స్యా. పీ. క.)] తదా వచం.

౨౪౨. ‘‘కాసం [దబ్బం (సీ. స్యా. పీ.)] కుసం పోటకిలం, ఉసీరం ముఞ్జపబ్బజం [ముఞ్జబబ్బజం (సీ. పీ.)];

ఉరసా పనుదిస్సామి, వివేకమనుబ్రూహయం.

౨౪౩. ‘‘తదా వనం పవిట్ఠోహం, సరిత్వా జినసాసనం;

భద్దేకరత్తఓవాదం, అరహత్తమపాపుణిం.

౨౪౪. ‘‘‘అతీతం నాన్వాగమేయ్య, నప్పటికఙ్ఖే అనాగతం;

యదతీతం పహీనం తం, అప్పత్తఞ్చ అనాగతం.

౨౪౫. ‘‘‘పచ్చుప్పన్నఞ్చ యో ధమ్మం, తత్థ తత్థ విపస్సతి;

అసంహీరం అసంకుప్పం, తం విద్వా మనుబ్రూహయే.

౨౪౬. ‘‘‘అజ్జేవ కిచ్చమాతప్పం, కో జఞ్ఞా మరణం సువే;

న హి నో సఙ్గరం [సఙ్కరం (క.)] తేన, మహాసేనేన మచ్చునా.

౨౪౭. ‘‘‘ఏవంవిహారిం ఆతాపిం, అహోరత్తమతన్దితం;

తం వే భద్దేకరత్తోతి, సన్తో ఆచిక్ఖతే ముని’.

౨౪౮. ‘‘కిలేసా ఝాపితా మయ్హం…పే… విహరామి అనాసవో.

౨౪౯. ‘‘స్వాగతం వత మే ఆసి…పే… కతం బుద్ధస్స సాసనం.

౨౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా లోమసకఙ్గియో [లోమసఙ్ఖియో (స్యా. క.)] థేరో ఇమా గాథాయో

అభాసిత్థాతి.

లోమసకఙ్గియత్థేరస్సాపదానం అట్ఠమం.