౭. అభయత్థేరఅపదానం

౧౯౫. ‘‘పదుముత్తరో నామ జినో, సబ్బధమ్మేసు చక్ఖుమా;

ఇతో సతసహస్సమ్హి, కప్పే ఉప్పజ్జి నాయకో.

౧౯౬. ‘‘సరణగమనే కిఞ్చి, నివేసేసి తథాగతో;

కిఞ్చి సీలే నివేసేసి, దసకమ్మపథుత్తమే.

౧౯౭. ‘‘దేతి కస్సచి సో వీరో, సామఞ్ఞఫలముత్తమం;

సమాపత్తీ తథా అట్ఠ, తిస్సో విజ్జా పవచ్ఛతి.

౧౯౮. ‘‘ఛళభిఞ్ఞాసు యోజేసి, కిఞ్చి సత్తం నరుత్తమో;

దేతి కస్సచి నాథో సో, చతస్సో పటిసమ్భిదా.

౧౯౯. ‘‘బోధనేయ్యం పజం దిస్వా, అసఙ్ఖేయ్యమ్పి యోజనం [అసఙ్ఖేయ్యేపి యోజనే సీ. స్యా. పీ.)];

ఖణేన ఉపగన్త్వాన, వినేతి నరసారథి.

౨౦౦. ‘‘తదాహం హంసవతియం, అహోసిం బ్రాహ్మణత్రజో;

పారగూ సబ్బవేదానం, వేయ్యాకరణసమ్మతో.

౨౦౧. ‘‘నిరుత్తియా చ కుసలో, నిఘణ్డుమ్హి విసారదో;

పదకో కేటుభవిదూ, ఛన్దోవిచితికోవిదో.

౨౦౨. ‘‘జఙ్ఘావిహారం విచరం, హంసారామముపేచ్చహం;

అద్దసం వరదం [వదతం (సీ. పీ.), పవరం (స్యా.)] సేట్ఠం, మహాజనపురక్ఖతం.

౨౦౩. ‘‘దేసేన్తం విరజం ధమ్మం, పచ్చనీకమతీ అహం;

ఉపేత్వా తస్స కల్యాణం, సుత్వాన విమలం అహం [వాక్యాని, సుత్వాన విమలానహం (సీ. స్యా. పీ.)].

౨౦౪. ‘‘బ్యాహతం పునరుత్తం వా, అపత్థం వా నిరత్థకం;

నాద్దసం తస్స మునినో, తతో పబ్బజితో అహం.

౨౦౫. ‘‘నచిరేనేవ కాలేన, సబ్బసత్తవిసారదో;

నిపుణో బుద్ధవచనే, అహోసిం గుణిసమ్మతో.

౨౦౬. ‘‘తదా చతస్సో గాథాయో, గన్థయిత్వా సుబ్యఞ్జనా;

సన్థవిత్వా తిలోకగ్గం, దేసయిస్సం దినే దినే.

౨౦౭. ‘‘విరత్తోసి మహావీరో, సంసారే సభయే వసం;

కరుణాయ న నిబ్బాయి, తతో కారుణికో ముని.

౨౦౮. ‘‘పుథుజ్జనో వయో సన్తో, న కిలేసవసో అహు;

సమ్పజానో సతియుత్తో, తస్మా ఏసో అచిన్తియో.

౨౦౯. ‘‘దుబ్బలాని కిలేసాని, యస్సాసయగతాని మే;

ఞాణగ్గిపరిదడ్ఢాని, న ఖీయింసు తమబ్భుతం.

౨౧౦. ‘‘యో సబ్బలోకస్స గరు, లోకో [లోకే (స్యా. క.)] యస్స తథా గరు;

తథాపి లోకాచరియో, లోకో తస్సానువత్తకో.

౨౧౧. ‘‘ఏవమాదీహి సమ్బుద్ధం, కిత్తయం ధమ్మదేసనం;

యావజీవం కరిత్వాన, గతో సగ్గం తతో చుతో.

౨౧౨. ‘‘సతసహస్సితో కప్పే, యం బుద్ధమభికిత్తయిం;

దుగ్గతిం నాభిజానామి, కిత్తనాయ ఇదం ఫలం.

౨౧౩. ‘‘దేవలోకే మహారజ్జం, పాదేసిం కఞ్చనగ్ఘియం [దిబ్బానుభోజహం తదా (స్యా.), రజ్జం పాదేసి కంచయం (సీ.)];

చక్కవత్తీ మహారజ్జం, బహుసోనుభవిం అహం.

౨౧౪. ‘‘దువే భవే పజాయామి, దేవత్తే అథ మానుసే;

అఞ్ఞం గతిం న జానామి, కిత్తనాయ ఇదం ఫలం.

౨౧౫. ‘‘దువే కులే పజాయామి, ఖత్తియే అథ బ్రాహ్మణే;

నీచే కులే న జాయామి, కిత్తనాయ ఇదం ఫలం.

౨౧౬. ‘‘పచ్ఛిమే చ భవే దాని, గిరిబ్బజపురుత్తమే;

రఞ్ఞోహం బిమ్బిసారస్స, పుత్తో నామేన చాభయో.

౨౧౭. ‘‘పాపమిత్తవసం గన్త్వా, నిగణ్ఠేన విమోహితో;

పేసితో నాటపుత్తేన, బుద్ధసేట్ఠముపేచ్చహం.

౨౧౮. ‘‘పుచ్ఛిత్వా నిపుణం పఞ్హం, సుత్వా బ్యాకరణుత్తమం;

పబ్బజిత్వాన నచిరం, అరహత్తమపాపుణిం.

౨౧౯. ‘‘కిత్తయిత్వా జినవరం, కిత్తితో హోమి సబ్బదా;

సుగన్ధదేహవదనో, ఆసిం సుఖసమప్పితో.

౨౨౦. ‘‘తిక్ఖహాసలహుపఞ్ఞో, మహాపఞ్ఞో తథేవహం;

విచిత్తపటిభానో చ, తస్స కమ్మస్స వాహసా.

౨౨౧. ‘‘అభిత్థవిత్వా పదుముత్తరాహం, పసన్నచిత్తో అసమం సయమ్భుం;

న గచ్ఛి కప్పాని అపాయభూమిం, సతం సహస్సాని బలేన తస్స.

౨౨౨. ‘‘కిలేసా ఝాపితా మయ్హం…పే… విహరామి అనాసవో.

౨౨౩. ‘‘స్వాగతం వత మే ఆసి…పే… కతం బుద్ధస్స సాసనం.

౨౨౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా అభయో థేరో ఇమా గాథాయో

అభాసిత్థాతి.

అభయత్థేరస్సాపదానం సత్తమం.