౬. కాళుదాయిత్థేరఅపదానం

౧౬౫. ‘‘పదుముత్తరో నామ జినో, సబ్బధమ్మేసు చక్ఖుమా;

ఇతో సతసహస్సమ్హి, కప్పే ఉప్పజ్జి నాయకో.

౧౬౬. ‘‘నాయకానం వరో సత్థా, గుణాగుణవిదూ జినో;

కతఞ్ఞూ కతవేదీ చ, తిత్థే యోజేతి పాణినే [పాణినో (సీ. స్యా పీ.)].

౧౬౭. ‘‘సబ్బఞ్ఞుతేన ఞాణేన, తులయిత్వా దయాసయో;

దేసేతి పవరం ధమ్మం, అనన్తగుణసఞ్చయో.

౧౬౮. ‘‘స కదాచి మహావీరో, అనన్తజినసంసరి [అనన్తజనసంసది (సీ.), అనన్తజనసంసుధి (స్యా.), అనన్తజనసంసరీ (పీ.)];

దేసేతి మధురం ధమ్మం, చతుసచ్చూపసఞ్హితం.

౧౬౯. ‘‘సుత్వాన తం ధమ్మవరం, ఆదిమజ్ఝన్తసోభణం;

పాణసతసహస్సానం, ధమ్మాభిసమయో అహు.

౧౭౦. ‘‘నిన్నాదితా తదా భూమి, గజ్జింసు చ పయోధరా;

సాధుకారం పవత్తింసు, దేవబ్రహ్మనరాసురా.

౧౭౧. ‘‘‘అహో కారుణికో సత్థా, అహో సద్ధమ్మదేసనా;

అహో భవసముద్దమ్హి, నిముగ్గే ఉద్ధరీ జినో’.

౧౭౨. ‘‘ఏవం పవేదజాతేసు, సనరామరబ్రహ్మసు;

కులప్పసాదకానగ్గం, సావకం వణ్ణయీ జినో.

౧౭౩. ‘‘తదాహం హంసవతియం, జాతోమచ్చకులే అహుం;

పాసాదికో దస్సనియో, పహూతధనధఞ్ఞవా.

౧౭౪. ‘‘హంసారామముపేచ్చాహం, వన్దిత్వా తం తథాగతం;

సుణిత్వా మధురం ధమ్మం, కారం కత్వా చ తాదినో.

౧౭౫. ‘‘నిపచ్చ పాదమూలేహం, ఇమం వచనమబ్రవిం;

‘కులప్పసాదకానగ్గో, యో తయా సన్థుతో [యో తవ సాసనే (స్యా.)] మునే.

౧౭౬. ‘‘‘తాదిసో హోమహం వీర [తాదిసోహం మహావీర (స్యా. క.)], బుద్ధసేట్ఠస్స సాసనే’;

తదా మహాకారుణికో, సిఞ్చన్తో వా మతేన మం.

౧౭౭. ‘‘ఆహ మం ‘పుత్త ఉత్తిట్ఠ, లచ్ఛసే తం మనోరథం;

కథం నామ జినే కారం, కత్వాన విఫలో సియా.

౧౭౮. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౭౯. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

ఉదాయి నామ నామేన, హేస్సతి సత్థు సావకో’.

౧౮౦. ‘‘తం సుత్వా ముదితో హుత్వా, యావజీవం తదా జినం;

మేత్తచిత్తో పరిచరిం, పచ్చయేహి వినాయకం.

౧౮౧. ‘‘తేన కమ్మవిపాకేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౮౨. ‘‘పచ్ఛిమే చ భవే దాని, రమ్మే కపిలవత్థవే;

జాతో మహామచ్చకులే, సుద్ధోదనమహీపతే [సుద్ధోదనో మహీపతి (స్యా.)].

౧౮౩. ‘‘తదా అజాయి సిద్ధత్థో, రమ్మే లుమ్బినికాననే;

హితాయ సబ్బలోకస్స, సుఖాయ చ నరాసభో.

౧౮౪. ‘‘తదహేవ అహం జాతో, సహ తేనేవ వడ్ఢితో;

పియో సహాయో దయితో, వియత్తో నీతికోవిదో.

౧౮౫. ‘‘ఏకూనతింసో వయసా, నిక్ఖమిత్వా అగారతో [నిక్ఖన్తో పబ్బజిత్థసో (సీ. స్యా.)];

ఛబ్బస్సం వీతినామేత్వా, ఆసి బుద్ధో వినాయకో.

౧౮౬. ‘‘జేత్వా ససేనకం మారం, ఖేపయిత్వాన ఆసవే;

భవణ్ణవం తరిత్వాన, బుద్ధో ఆసి సదేవకే.

౧౮౭. ‘‘ఇసివ్హయం గమిత్వాన [ఇసివ్హయం పతనం గన్త్వా (స్యా.)], వినేత్వా పఞ్చవగ్గియే;

తతో వినేసి భగవా, గన్త్వా గన్త్వా తహిం తహిం.

౧౮౮. ‘‘వేనేయ్యే వినయన్తో సో, సఙ్గణ్హన్తో సదేవకం;

ఉపేచ్చ మగధే గిరిం [మాగదగిరిం (సీ.), మఙ్గలాగిరిం (పీ.)], విహరిత్థ తదా జినో.

౧౮౯. ‘‘తదా సుద్ధోదనేనాహం, భూమిపాలేన పేసితో;

గన్త్వా దిస్వా దసబలం, పబ్బజిత్వారహా అహుం.

౧౯౦. ‘‘తదా మహేసిం యాచిత్వా, పాపయిం కపిలవ్హయం;

తతో పురాహం గన్త్వాన, పసాదేసిం మహాకులం.

౧౯౧. ‘‘జినో తస్మిం గుణే తుట్ఠో, మం మహాపరిసాయ సో [మమాహ పురిసాసభో (స్యా. పీ.)];

కులప్పసాదకానగ్గం, పఞ్ఞాపేసి వినాయకో.

౧౯౨. ‘‘కిలేసా ఝాపితా మయ్హం…పే… విహరామి అనాసవో.

౧౯౩. ‘‘స్వాగతం వత మే ఆసి…పే… కతం బుద్ధస్స సాసనం.

౧౯౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కాళుదాయిథేరో ఇమా గాథాయో

అభాసిత్థాతి.

కాళుదాయిత్థేరస్సాపదానం ఛట్ఠం.