౫. నన్దకత్థేరఅపదానం

౧౪౩. ‘‘పదుముత్తరో నామ జినో, సబ్బధమ్మేసు చక్ఖుమా;

ఇతో సతసహస్సమ్హి, కప్పే ఉప్పజ్జి నాయకో.

౧౪౪. ‘‘హితాయ సబ్బసత్తానం, సుఖాయ వదతం వరో;

అత్థాయ పురిసాజఞ్ఞో, పటిపన్నో సదేవకే.

౧౪౫. ‘‘యసగ్గపత్తో సిరిమా, కిత్తివణ్ణభతో [కిత్తివణ్ణ భటో (స్యా. క.)] జినో;

పూజితో సబ్బలోకస్స, దిసా సబ్బాసు విస్సుతో.

౧౪౬. ‘‘ఉత్తిణ్ణవిచికిచ్ఛో సో, వీతివత్తకథంకథో;

పరిపుణ్ణమనసఙ్కప్పో, పత్తో సమ్బోధిముత్తమం.

౧౪౭. ‘‘అనుప్పన్నస్స మగ్గస్స, ఉప్పాదేతా నరుత్తమో;

అనక్ఖాతఞ్చ అక్ఖాసి, అసఞ్జాతఞ్చ సఞ్జనీ.

౧౪౮. ‘‘మగ్గఞ్ఞూ మగ్గవిదూ [సో మగ్గవిదూ (సీ. పీ.)] చ, మగ్గక్ఖాయీ నరాసభో;

మగ్గస్స కుసలో సత్థా, సారథీనం వరుత్తమో [నరుత్తమో (స్యా.)].

౧౪౯. ‘‘తదా మహాకారుణికో, ధమ్మం దేసేసి నాయకో;

నిముగ్గే కామపఙ్కమ్హి [మోహపఙ్కమ్హి (సీ. స్యా.), మోహమగ్గమ్హి (పీ.)], సముద్ధరతి పాణినే.

౧౫౦. ‘‘భిక్ఖునీనం ఓవదనే, సావకం సేట్ఠసమ్మతం;

వణ్ణయం ఏతదగ్గమ్హి, పఞ్ఞపేసి మహాముని.

౧౫౧. ‘‘తం సుత్వాహం పముదితో, నిమన్తేత్వా తథాగతం;

భోజయిత్వా ససఙ్ఘం తం, పత్థయిం ఠానముత్తమం.

౧౫౨. ‘‘తదా పముదితో నాథో, మం అవోచ మహాఇసి;

‘సుఖీ భవస్సు దీఘావు [దీఘాయు (సీ. స్యా.)], లచ్ఛసే తం మనోరథం.

౧౫౩. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౫౪. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

నన్దకో నామ నామేన, హేస్సతి సత్థు సావకో’.

౧౫౫. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసూపగో అహం.

౧౫౬. ‘‘పచ్ఛిమే చ భవే దాని, జాతో సేట్ఠికులే అహం;

సావత్థియం పురే వరే, ఇద్ధే ఫీతే మహద్ధనే.

౧౫౭. ‘‘పురప్పవేసే సుగతం, దిస్వా విమ్హితమానసో;

జేతారామపటిగ్గాహే, పబ్బజిం అనగారియం.

౧౫౮. ‘‘నచిరేనేవ కాలేన, అరహత్తమపాపుణిం;

తతోహం తిణ్ణసంసారో, సాసితో సబ్బదస్సినా.

౧౫౯. ‘‘భిక్ఖునీనం ధమ్మకథం, పటిపుచ్ఛాకరిం అహం;

సాసితా తా మయా సబ్బా, అభవింసు అనాసవా.

౧౬౦. ‘‘సతాని పఞ్చనూనాని, తదా తుట్ఠో మహాహితో;

భిక్ఖునీనం ఓవదతం, అగ్గట్ఠానే ఠపేసి మం.

౧౬౧. ‘‘సతసహస్సే కతం కమ్మం, ఫలం దస్సేసి మే ఇధ;

సుముత్తో సరవేగోవ, కిలేసే ఝాపయిం మమ.

౧౬౨. ‘‘కిలేసా ఝాపితా మయ్హం…పే… విహరామి అనాసవో.

౧౬౩. ‘‘స్వాగతం వత మే ఆసి…పే… కతం బుద్ధస్స సాసనం.

౧౬౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నన్దకో థేరో ఇమా గాథాయో

అభాసిత్థాతి.

నన్దకత్థేరస్సాపదానం పఞ్చమం.