౪. వఙ్గీసత్థేరఅపదానం

౯౬. ‘‘పదుముత్తరో నామ జినో, సబ్బధమ్మేసు చక్ఖుమా;

ఇతో సతసహస్సమ్హి, కప్పే ఉప్పజ్జి నాయకో.

౯౭. ‘‘యథాపి సాగరే ఊమి, గగనే వియ తారకా;

ఏవం పావచనం తస్స, అరహన్తేహి చిత్తితం.

౯౮. ‘‘సదేవాసురనాగేహి, మనుజేహి పురక్ఖతో;

సమణబ్రాహ్మణాకిణ్ణే, జనమజ్ఝే జినుత్తమో.

౯౯. ‘‘పభాహి అనురఞ్జన్తో, లోకే [లోకం (సీ.)] లోకన్తగూ జినో;

వచనేన విబోధేన్తో, వేనేయ్యపదుమాని సో.

౧౦౦. ‘‘వేసారజ్జేహి సమ్పన్నో, చతూహి పురిసుత్తమో;

పహీనభయసారజ్జో, ఖేమప్పత్తో విసారదో.

౧౦౧. ‘‘ఆసభం పవరం ఠానం, బుద్ధభూమిఞ్చ కేవలం;

పటిజానాతి లోకగ్గో, నత్థి సఞ్చోదకో క్వచి.

౧౦౨. ‘‘సీహనాదమసమ్భీతం, నదతో తస్స తాదినో;

దేవో నరో వా బ్రహ్మా వా, పటివత్తా న విజ్జతి.

౧౦౩. ‘‘దేసేన్తో పవరం ధమ్మం, సన్తారేన్తో సదేవకం;

ధమ్మచక్కం పవత్తేతి, పరిసాసు విసారదో.

౧౦౪. ‘‘పటిభానవతం అగ్గం, సావకం సాధుసమ్మతం;

గుణం బహుం పకిత్తేత్వా, ఏతదగ్గే ఠపేసి తం.

౧౦౫. ‘‘తదాహం హంసవతియం, బ్రాహ్మణో సాధుసమ్మతో;

సబ్బవేదవిదూ జాతో, వాగీసో వాదిసూదనో.

౧౦౬. ‘‘ఉపేచ్చ తం మహావీరం, సుత్వాహం ధమ్మదేసనం;

పీతివరం పటిలభిం, సావకస్స గుణే రతో.

౧౦౭. ‘‘నిమన్తేత్వావ సుగతం, ససఙ్ఘం లోకనన్దనం;

సత్తాహం భోజయిత్వాహం, దుస్సేహచ్ఛాదయిం తదా.

౧౦౮. ‘‘నిపచ్చ సిరసా పాదే, కతోకాసో కతఞ్జలీ;

ఏకమన్తం ఠితో హట్ఠో, సన్థవిం జినముత్తమం.

౧౦౯. ‘‘‘నమో తే వాదిమద్దన [వాదిసద్దుల (సీ. పీ.), వాదిసూదన (స్యా.)], నమో తే ఇసిసత్తమ [పురిసుత్తమ (సీ. పీ.)];

నమో తే సబ్బలోకగ్గ, నమో తే అభయఙ్కర.

౧౧౦. ‘‘‘నమో తే మారమథన [మారమసన (అట్ఠ.)], నమో తే దిట్ఠిసూదన;

నమో తే సన్తిసుఖద, నమో తే సరణఙ్కర.

౧౧౧. ‘‘‘అనాథానం భవం నాథో, భీతానం అభయప్పదో;

విస్సామభూమి [విస్సాసం భూమి (స్యా.), విస్సానభూమి (పీ.)] సన్తానం, సరణం సరణేసినం’.

౧౧౨. ‘‘ఏవమాదీహి సమ్బుద్ధం, సన్థవిత్వా మహాగుణం;

అవోచం వాదిసూదస్స [వాదిసూరస్స (సీ. స్యా. పీ.)], గతిం పప్పోమి భిక్ఖునో.

౧౧౩. ‘‘తదా అవోచ భగవా, అనన్తపటిభానవా;

‘యో సో బుద్ధం అభోజేసి, సత్తాహం సహసావకం.

౧౧౪. ‘‘‘గుణఞ్చ మే పకిత్తేసి, పసన్నో సేహి పాణిభి;

ఏసో పత్థయతే ఠానం, వాదిసూదస్స భిక్ఖునో.

౧౧౫. ‘‘‘అనాగతమ్హి అద్ధానే, లచ్ఛసే తం మనోరథం;

దేవమానుససమ్పత్తిం, అనుభోత్వా అనప్పకం.

౧౧౬. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౧౭. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

వఙ్గీసో నామ నామేన, హేస్సతి సత్థు సావకో’.

౧౧౮. ‘‘తం సుత్వా ముదితో హుత్వా, యావజీవం తదా జినం;

పచ్చయేహి ఉపట్ఠాసిం, మేత్తచిత్తో తథాగతం.

౧౧౯. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తుసితం [తావతింసం (స్యా.)] అగమాసహం.

౧౨౦. ‘‘పచ్ఛిమే చ భవే దాని, జాతో విప్పకులే [పరిబ్బాజకులే (సీ. స్యా. పీ.)] అహం;

పచ్చాజాతో [సమ్పత్తో చ (క.)] యదా ఆసిం, జాతియా సత్తవస్సికో.

౧౨౧. ‘‘సబ్బవేదవిదూ జాతో, వాదసత్థవిసారదో;

వాదిస్సరో [వగ్గుస్సరో (స్యా. పీ.)] చిత్తకథీ, పరవాదప్పమద్దనో.

౧౨౨. ‘‘వఙ్గే జాతోతి వఙ్గీసో, వచనే ఇస్సరోతి వా;

వఙ్గీసో ఇతి మే నామం, అభవీ లోకసమ్మతం.

౧౨౩. ‘‘యదాహం విఞ్ఞుతం పత్తో, ఠితో పఠమయోబ్బనే;

తదా రాజగహే రమ్మే, సారిపుత్తమహద్దసం [మథద్దసం (సీ. పీ.), చ అద్దసం (స్యా.)].

పఞ్చవీసతిమం భాణవారం.

౧౨౪. ‘‘పిణ్డాయ విచరన్తం తం, పత్తపాణిం సుసంవుతం;

అలోలక్ఖిం మితభాణిం, యుగమత్తం నిదక్ఖితం [నిరిక్ఖతం (సీ. పీ.), ఉదిక్ఖతం (స్యా.)].

౧౨౫. ‘‘తం దిస్వా విమ్హితో హుత్వా, అవోచం మమనుచ్ఛవం [మననుచ్ఛవం (సీ. స్యా.)];

కణికారంవ నిచితం [కణికారపరిచితం (పీ.), ఖణికం ఠానరచితం (సీ.)], చిత్తం గాథాపదం అహం.

౧౨౬. ‘‘ఆచిక్ఖి సో మే సత్థారం, సమ్బుద్ధం లోకనాయకం;

తదా సో పణ్డితో వీరో, ఉత్తరిం [ఉత్తరం (సీ. పీ.)] సమవోచ మే.

౧౨౭. ‘‘విరాగసంహితం వాక్యం, కత్వా దుద్దసముత్తమం;

విచిత్తపటిభానేహి, తోసితో తేన తాదినా.

౧౨౮. ‘‘నిపచ్చ సిరసా పాదే, ‘పబ్బాజేహీ’తి మం బ్రవి;

తతో మం స మహాపఞ్ఞో, బుద్ధసేట్ఠముపానయి.

౧౨౯. ‘‘నిపచ్చ సిరసా పాదే, నిసీదిం సత్థు సన్తికే;

మమాహ వదతం సేట్ఠో, కచ్చి వఙ్గీస జానాసి [సచ్చం వఙ్గీస కచ్చి తే (స్యా.)].

౧౩౦. ‘‘కిఞ్చి సిప్పన్తి తస్సాహం, ‘జానామీ’తి చ అబ్రవిం;

మతసీసం వనచ్ఛుద్ధం, అపి బారసవస్సికం;

తవ విజ్జావిసేసేన, సచే సక్కోసి వాచయ [భాసయ (సీ. పీ.)].

౧౩౧. ‘‘ఆమోతి మే పటిఞ్ఞాతే, తీణి సీసాని దస్సయి;

నిరయనరదేవేసు, ఉపపన్నే అవాచయిం.

౧౩౨. ‘‘తదా ఖీణాసవస్సేవ [పచ్చేకబుద్ధస్స (సీ. పీ.)], సీసం దస్సేసి నాయకో;

తతోహం విహతారబ్భో, పబ్బజ్జం సమయాచిసం.

౧౩౩. ‘‘పబ్బజిత్వాన సుగతం, సన్థవామి తహిం తహిం;

తతో మం కబ్బవిత్తోసి [కవిచిత్తోతి (స్యా. పీ.)], ఉజ్ఝాయన్తిహ భిక్ఖవో.

౧౩౪. ‘‘తతో వీమంసనత్థం మే, ఆహ బుద్ధో వినాయకో;

తక్కికా పనిమా గాథా, ఠానసో పటిభన్తి తం.

౧౩౫. ‘‘న కబ్బవిత్తోహం వీర, ఠానసో పటిభన్తి మం;

తేన హి దాని వఙ్గీస, ఠానసో సన్థవాహి మం.

౧౩౬. ‘‘తదాహం సన్థవిం వీరం, గాథాహి ఇసిసత్తమం;

ఠానసో మే తదా తుట్ఠో, జినో అగ్గే ఠపేసి మం.

౧౩౭. ‘‘పటిభానేన చిత్తేన, అఞ్ఞేసమతిమఞ్ఞహం;

పేసలే తేన సంవిగ్గో, అరహత్తమపాపుణిం.

౧౩౮. ‘‘‘పటిభానవతం అగ్గో, అఞ్ఞో కోచి న విజ్జతి;

యథాయం భిక్ఖు వఙ్గీసో, ఏవం ధారేథ భిక్ఖవో’.

౧౩౯. ‘‘సతసహస్సే కతం కమ్మం, ఫలం దస్సేసి మే ఇధ;

సుముత్తో సరవేగోవ కిలేసే ఝాపయిం మమ.

౧౪౦. ‘‘కిలేసా ఝాపితా మయ్హం…పే… విహరామి అనాసవో.

౧౪౧. ‘‘స్వాగతం వత మే ఆసి…పే… కతం బుద్ధస్స సాసనం.

౧౪౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వఙ్గీసో థేరో ఇమా గాథాయో

అభాసిత్థాతి.

వఙ్గీసత్థేరస్సాపదానం చతుత్థం.