౩. సీవలిత్థేరఅపదానం

౫౪. ‘‘పదుముత్తరో నామ జినో, సబ్బధమ్మేసు చక్ఖుమా;

ఇతో సతసహస్సమ్హి, కప్పే ఉప్పజ్జి నాయకో.

౫౫. ‘‘సీలం తస్స అసఙ్ఖేయ్యం, సమాధి వజిరూపమో;

అసఙ్ఖేయ్యం ఞాణవరం, విముత్తి చ అనోపమా.

౫౬. ‘‘మనుజామరనాగానం, బ్రహ్మానఞ్చ సమాగమే;

సమణబ్రాహ్మణాకిణ్ణే, ధమ్మం దేసేసి నాయకో.

౫౭. ‘‘ససావకం మహాలాభిం, పుఞ్ఞవన్తం జుతిన్ధరం;

ఠపేసి ఏతదగ్గమ్హి, పరిసాసు విసారదో.

౫౮. ‘‘తదాహం ఖత్తియో ఆసిం, నగరే హంససవ్హయే;

సుత్వా జినస్స తం వాక్యం, సావకస్స గుణం బహుం.

౫౯. ‘‘నిమన్తయిత్వా సత్తాహం, భోజయిత్వా ససావకం;

మహాదానం దదిత్వాన, తం ఠానమభిపత్థయిం.

౬౦. ‘‘తదా మం వినతం పాదే, దిస్వాన పురిసాసభో;

సరేన మహతా వీరో [సుస్సరేన మహావీరో (సీ. పీ.)], ఇదం వచనమబ్రవి.

౬౧. ‘‘‘తతో జినస్స వచనం, సోతుకామా మహాజనా;

దేవదానవగన్ధబ్బా, బ్రహ్మానో చ మహిద్ధికా’.

౬౨. ‘‘సమణబ్రాహ్మణా చేవ, నమస్సింసు కతఞ్జలీ;

‘నమో తే పురిసాజఞ్ఞ, నమో తే పురిసుత్తమ.

౬౩. ‘‘‘ఖత్తియేన మహాదానం, దిన్నం సత్తాహికమ్పి వో [సత్తహికం మి వో (సీ.), సత్తహికాధికం (స్యా.), సత్తహికం విభో (పీ.)];

సోతుకామా ఫలం తస్స, బ్యాకరోహి మహామునే’.

౬౪. ‘‘తతో అవోచ భగవా, ‘సుణాథ మమ భాసితం;

అప్పమేయ్యమ్హి బుద్ధమ్హి, ససఙ్ఘమ్హి పతిట్ఠితా [సంఘమ్హి సుప్పతిట్ఠితా (సీ. పీ.)].

౬౫. ‘‘‘దక్ఖిణా తాయ [దక్ఖిణాదాయ (స్యా. పీ.)] కో వత్తా, అప్పమేయ్యఫలా హి సా;

అపి చే స మహాభోగో, ఠానం పత్థేతి ఉత్తమం.

౬౬. ‘‘‘లాభీ విపులలాభానం, యథా భిక్ఖు సుదస్సనో;

తథాహమ్పి భవేయ్యన్తి, లచ్ఛసే తం అనాగతే.

౬౭. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౬౮. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సీవలి నామ నామేన, హేస్సతి సత్థు సావకో’.

౬౯. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసూపగో అహం.

౭౦. ‘‘ఏకనవుతితో కప్పే, విపస్సీ లోకనాయకో;

ఉప్పజ్జి చారుదస్సనో, సబ్బధమ్మవిపస్సకో.

౭౧. ‘‘తదాహం బన్ధుమతియం, కులస్సఞ్ఞతరస్స చ;

దయితో పస్సితో చేవ, ఆసిం కమ్మన్తవావటో [కమ్మన్తబ్యావటో (సీ. స్యా. క.)].

౭౨. ‘‘తదా అఞ్ఞతరో పూగో, విపస్సిస్స మహేసినో;

పరివేసం అకారయి, మహన్తమతివిస్సుతం.

౭౩. ‘‘నిట్ఠితే చ మహాదానే, దదుం ఖజ్జకసఞ్హితం;

నవం దధిం మధుఞ్చేవ, విచినం నేవ అద్దసుం.

౭౪. ‘‘తదాహం తం గహేత్వాన, నవం దధిం మధుమ్పి చ;

కమ్మస్సామిఘరం గచ్ఛిం, తమేసన్తా మమద్దసుం.

౭౫. ‘‘సహస్సమపి దత్వాన, నాలభింసు చ తం ద్వయం;

తతోహం ఏవం చిన్తేసిం, ‘నేతం హేస్సతి ఓరకం.

౭౬. ‘‘‘యథా ఇమే జనా సబ్బే, సక్కరోన్తి తథాగతం;

అహమ్పి కారం కస్సామి, ససఙ్ఘే లోకనాయకే’.

౭౭. ‘‘తదాహమేవం చిన్తేత్వా, దధిం మధుఞ్చ ఏకతో;

మద్దిత్వా లోకనాథస్స, ససఙ్ఘస్స అదాసహం.

౭౮. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౭౯. ‘‘పునాహం బారాణసియం, రాజా హుత్వా మహాయసో;

సత్తుకస్స తదా దుట్ఠో, ద్వారరోధమకారయిం.

౮౦. ‘‘తదా తపస్సినో రుద్ధా, ఏకాహం రక్ఖితా అహుం;

తతో తస్స విపాకేన, పాపతిం [పాపిట్ఠం (స్యా.) పాపత్తం (క.)] నిరయం భుసం.

౮౧. ‘‘పచ్ఛిమే చ భవే దాని, జాతోహం కోలియే పురే;

సుప్పవాసా చ మే మాతా, మహాలి లిచ్ఛవీ పితా.

౮౨. ‘‘ఖత్తియే పుఞ్ఞకమ్మేన, ద్వారరోధస్స వాహసా;

సత్త వస్సాని నివసిం, మాతుకుచ్ఛిమ్హి దుక్ఖితో.

౮౩. ‘‘సత్తాహం ద్వారమూళ్హోహం, మహాదుక్ఖసమప్పితో;

మాతా మే ఛన్దదానేన, ఏవం ఆసి సుదుక్ఖితా.

౮౪. ‘‘సువత్థితోహం నిక్ఖన్తో, బుద్ధేన అనుకమ్పితో;

నిక్ఖన్తదివసేయేవ, పబ్బజిం అనగారియం.

౮౫. ‘‘ఉపజ్ఝా సారిపుత్తో మే, మోగ్గల్లానో మహిద్ధికో;

కేసే ఓరోపయన్తో మే, అనుసాసి మహామతి.

౮౬. ‘‘కేసేసు ఛిజ్జమానేసు, అరహత్తమపాపుణిం;

దేవా నాగా మనుస్సా చ, పచ్చయే ఉపనేన్తి మే.

౮౭. ‘‘పదుముత్తరనాథఞ్చ, విపస్సిఞ్చ వినాయకం;

యం పూజయిం పముదితో, పచ్చయేహి విసేసతో.

౮౮. ‘‘తతో తేసం విసేసేన, కమ్మానం విపులుత్తమం;

లాభం లభామి సబ్బత్థ, వనే గామే జలే థలే.

౮౯. ‘‘రేవతం దస్సనత్థాయ, యదా యాతి వినాయకో;

తింసభిక్ఖుసహస్సేహి, సహ లోకగ్గనాయకో.

౯౦. ‘‘తదా దేవోపణీతేహి, మమత్థాయ మహామతి;

పచ్చయేహి మహావీరో, ససఙ్ఘో లోకనాయకో.

౯౧. ‘‘ఉపట్ఠితో మయా బుద్ధో, గన్త్వా రేవతమద్దస;

తతో జేతవనం గన్త్వా, ఏతదగ్గే ఠపేసి మం.

౯౨. ‘‘‘లాభీనం సీవలి అగ్గో, మమ సిస్సేసు భిక్ఖవో’;

సబ్బలోకహితో సత్థా, కిత్తయీ పరిసాసు మం.

౯౩. ‘‘కిలేసా ఝాపితా మయ్హం…పే… విహరామి అనాసవో.

౯౪. ‘‘స్వాగతం వత మే ఆసి…పే… కతం బుద్ధస్స సాసనం.

౯౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సీవలిథేరో ఇమా గాథాయో

అభాసిత్థాతి.

సీవలిత్థేరస్సాపదానం తతియం.