౨. కఙ్ఖారేవతత్థేరఅపదానం

౩౪. ‘‘పదుముత్తరో నామ జినో, సబ్బధమ్మేసు చక్ఖుమా;

ఇతో సతసహస్సమ్హి, కప్పే ఉప్పజ్జి నాయకో.

౩౫. ‘‘సీహహను బ్రహ్మగిరో, హంసదున్దుభినిస్సనో [హంసదున్దుభినిస్సరో (సీ.) … నిస్సవనో (పీ.) … సావనో (స్యా.)];

నాగవిక్కన్తగమనో, చన్దసూరాదికప్పభో.

౩౬. ‘‘మహామతీ మహావీరో, మహాఝాయీ మహాబలో [మహాగతి (స్యా.), మహాహితో (పీ.)];

మహాకారుణికో నాథో, మహాతమపనూదనో [మహాతమవిధంసనో (స్యా.), మహాతమనిసూదనో (పీ.)].

౩౭. ‘‘స కదాచి తిలోకగ్గో, వేనేయ్యం వినయం బహుం [వేనేయ్యే వినియం బహూ (సీ.)];

ధమ్మం దేసేసి సమ్బుద్ధో, సత్తాసయవిదూ ముని.

౩౮. ‘‘ఝాయిం ఝానరతం వీరం, ఉపసన్తం అనావిలం;

వణ్ణయన్తో పరిసతిం, తోసేసి [తోసేతి (స్యా. పీ. క.)] జనతం జినో.

౩౯. ‘‘తదాహం హంసవతియం, బ్రాహ్మణో వేదపారగూ;

ధమ్మం సుత్వాన ముదితో, తం ఠానమభిపత్థయిం.

౪౦. ‘‘తదా జినో వియాకాసి, సఙ్ఘమజ్ఝే వినాయకో;

‘ముదితో హోహి త్వం బ్రహ్మే, లచ్ఛసే తం మనోరథం.

౪౧. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౪౨. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

రేవతో నామ నామేన, హేస్సతి సత్థు సావకో’.

౪౩. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౪౪. ‘‘పచ్ఛిమే చ భవే దాని, జాతోహం కోలియే పురే;

ఖత్తియే కులసమ్పన్నే, ఇద్ధే ఫీతే మహద్ధనే.

౪౫. ‘‘యదా కపిలవత్థుస్మిం, బుద్ధో ధమ్మమదేసయి;

తదా పసన్నో సుగతే, పబ్బజిం అనగారియం.

౪౬. ‘‘కఙ్ఖా మే బహులా ఆసి, కప్పాకప్పే తహిం తహిం;

సబ్బం తం వినయీ బుద్ధో, దేసేత్వా ధమ్మముత్తమం.

౪౭. ‘‘తతోహం తిణ్ణసంసారో, సదా ఝానసుఖే రతో;

విహరామి తదా బుద్ధో, మం దిస్వా ఏతదబ్రవి.

౪౮. ‘‘‘యా కాచి కఙ్ఖా ఇధ వా హురం వా, సకవేదియా వా పరవేదియా వా;

యే ఝాయినో తా పజహన్తి సబ్బా, ఆతాపినో బ్రహ్మచరియం చరన్తా’.

౪౯. ‘‘సతసహస్సే కతం కమ్మం, ఫలం దస్సేసి మే ఇధ;

సుముత్తో సరవేగోవ కిలేసే ఝాపయిం మమ.

౫౦. ‘‘తతో ఝానరతం దిస్వా, బుద్ధో లోకన్తగూ ముని;

ఝాయీనం భిక్ఖూనం అగ్గో, పఞ్ఞాపేతి మహామతి.

౫౧. ‘‘కిలేసా ఝాపితా మయ్హం…పే… విహరామి అనాసవో.

౫౨. ‘‘స్వాగతం వత మే ఆసి…పే… కతం బుద్ధస్స సాసనం.

౫౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా కఙ్ఖారేవతో థేరో ఇమా గాథాయో

అభాసిత్థాతి.

కఙ్ఖారేవతత్థేరస్సాపదానం దుతియం.