౮. ఉరువేళకస్సపత్థేరఅపదానం

౨౫౧. ‘‘పదుముత్తరో నామ జినో, సబ్బలోకవిదూ ముని;

ఇతో సతసహస్సమ్హి, కప్పే ఉప్పజ్జి చక్ఖుమా.

౨౫౨. ‘‘ఓవాదకో విఞ్ఞాపకో, తారకో సబ్బపాణినం;

దేసనాకుసలో బుద్ధో, తారేసి జనతం బహుం.

౨౫౩. ‘‘అనుకమ్పకో కారుణికో, హితేసీ సబ్బపాణినం;

సమ్పత్తే తిత్థియే సబ్బే, పఞ్చసీలే పతిట్ఠపి.

౨౫౪. ‘‘ఏవం నిరాకులం ఆసి, సుఞ్ఞతం తిత్థియేహి చ;

విచిత్తం అరహన్తేహి, వసీభూతేహి తాదిభి.

౨౫౫. ‘‘రతనానట్ఠపఞ్ఞాసం, ఉగ్గతో సో మహాముని;

కఞ్చనగ్ఘియసఙ్కాసో, బాత్తింసవరలక్ఖణో.

౨౫౬. ‘‘వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౫౭. ‘‘తదాహం హంసవతియా, బ్రాహ్మణో సాధుసమ్మతో;

ఉపేచ్చ లోకపజ్జోతం, అస్సోసిం ధమ్మదేసనం.

౨౫౮. ‘‘తదా మహాపరిసతిం, మహాపరిససావకం;

ఠపేన్తం ఏతదగ్గమ్హి, సుత్వాన ముదితో అహం.

౨౫౯. ‘‘మహతా పరివారేన, నిమన్తేత్వా మహాజినం;

బ్రాహ్మణానం సహస్సేన, సహదానమదాసహం.

౨౬౦. ‘‘మహాదానం దదిత్వాన, అభివాదియ నాయకం;

ఏకమన్తం ఠితో హట్ఠో, ఇదం వచనమబ్రవిం.

౨౬౧. ‘‘‘తయి సద్ధాయ మే వీర, అధికారగుణేన చ;

పరిసా మహతీ హోతు, నిబ్బత్తస్స తహిం తహిం’.

౨౬౨. ‘‘తదా అవోచ పరిసం, గజగజ్జితసుస్సరో;

కరవీకరుతో సత్థా, ‘ఏతం పస్సథ బ్రాహ్మణం.

౨౬౩. ‘‘‘హేమవణ్ణం మహాబాహుం, కమలాననలోచనం;

ఉదగ్గతనుజం హట్ఠం, సద్ధవన్తం గుణే మమ.

౨౬౪. ‘‘‘ఏస పత్థయతే ఠానం [పత్థయి తం ఠానం (స్యా.)], సీహఘోసస్స భిక్ఖునో;

అనాగతమ్హి అద్ధానే, లచ్ఛసే తం మనోరథం.

౨౬౫. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౨౬౬. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

కస్సపో నామ గోత్తేన, హేస్సతి సత్థు సావకో’.

౨౬౭. ‘‘ఇతో ద్వేనవుతే కప్పే, అహు సత్థా అనుత్తరో;

అనూపమో అసదిసో, ఫుస్సో లోకగ్గనాయకో.

౨౬౮. ‘‘సో చ సబ్బం తమం హన్త్వా, విజటేత్వా మహాజటం;

వస్సతే అమతం వుట్ఠిం, తప్పయన్తో సదేవకం.

౨౬౯. ‘‘తదా హి బారాణసియం, రాజా పచ్చా అహుమ్హసే;

భాతరోమ్హ తయో సబ్బే, సంవిసట్ఠావ రాజినో.

౨౭౦. ‘‘వీరఙ్గరూపా బలినో, సఙ్గామే అపరాజితా;

తదా కుపితపచ్చన్తో [కుప్పతి పచ్చన్తో (క.)], అమ్హే ఆహ మహీపతి.

౨౭౧. ‘‘‘ఏథ గన్త్వాన పచ్చన్తం, సోధేత్వా అట్టవీబలం;

ఖేమం విజిరితం కత్వా, పున దేథాతి భాసథ’.

౨౭౨. ‘‘తతో మయం అవోచుమ్హ, యది దేయ్యాసి నాయకం;

ఉపట్ఠానాయ అమ్హాకం, సాధయిస్సామ వో తతో.

౨౭౩. ‘‘తతో మయం లద్ధవరా, భూమిపాలేన పేసితా;

నిక్ఖిత్తసత్థం పచ్చన్తం, కత్వా పునరుపచ్చ తం.

౨౭౪. ‘‘యాచిత్వా సత్థుపట్ఠానం, రాజానం లోకనాయకం;

మునివీరం లభిత్వాన, యావజీవం యజిమ్హ తం.

౨౭౫. ‘‘మహగ్ఘాని చ వత్థాని, పణీతాని రసాని చ;

సేనాసనాని రమ్మాని, భేసజ్జాని హితాని చ.

౨౭౬. ‘‘దత్వా ససఙ్ఘమునినో [ససంఘస్స మునే (సీ. పీ.)], ధమ్మేనుప్పాదితాని నో;

సీలవన్తో కారుణికా, భావనాయుత్తమానసా.

౨౭౭. ‘‘సద్ధా పరిచరిత్వాన, మేత్తచిత్తేన నాయకం;

నిబ్బుతే తమ్హి లోకగ్గే, పూజం కత్వా యథాబలం.

౨౭౮. ‘‘తతో చుతా సన్తుసితం [తావతింసం (స్యా.)], గతా తత్థ మహాసుఖం;

అనుభూతా మయం సబ్బే, బుద్ధపూజాయిదం ఫలం.

౨౭౯. ‘‘మాయాకారో యథా రఙ్గే [లద్ధో (స్యా. పీ.)], దస్సేసి వికతిం బహుం;

తథా భవే భమన్తోహం [గమేన్తోహం (క.), భవన్తోహం (స్యా.)], విదేహాధిపతీ అహుం.

౨౮౦. ‘‘గుణాచేళస్స వాక్యేన, మిచ్ఛాదిట్ఠిగతాసయో;

నరకం మగ్గమారూళ్హో, రుచాయ మమ ధీతుయా.

౨౮౧. ‘‘ఓవాదం నాదియిత్వాన, బ్రహ్మునా నారదేనహం;

బహుధా సంసితో సన్తో, దిట్ఠిం హిత్వాన పాపికం.

౨౮౨. ‘‘పూరయిత్వా విసేసేన, దస కమ్మపథానిహం;

హిత్వాన దేహమగమిం, సగ్గం సభవనం యథా.

౨౮౩. ‘‘పచ్ఛిమే భవే సమ్పత్తే, బ్రహ్మబన్ధు అహోసహం;

బారాణసియం ఫీతాయం, జాతో విప్పమహాకులే.

౨౮౪. ‘‘మచ్చుబ్యాధిజరా భీతో, ఓగాహేత్వా మహావనం [జహిత్వాన మహాధనం (సీ.), జహిత్వా చ మహాధనం (పీ.)];

నిబ్బానం పదమేసన్తో, జటిలేసు పరిబ్బజిం.

౨౮౫. ‘‘తదా ద్వే భాతరో మయ్హం, పబ్బజింసు మయా సహ;

ఉరువేళాయం మాపేత్వా, అస్సమం నివసిం అహం.

౨౮౬. ‘‘కస్సపో నామ గోత్తేన, ఉరువేళనివాసికో [ఉరువేళాయ నివసిం (స్యా.)];

తతో మే ఆసి పఞ్ఞత్తి, ఉరువేళకస్సపో ఇతి.

౨౮౭. ‘‘నదీసకాసే భాతా మే, నదీకస్సపసవ్హయో;

ఆసీ సకాసనామేన, గయాయం గయాకస్సపో.

౨౮౮. ‘‘ద్వే సతాని కనిట్ఠస్స, తీణి మజ్ఝస్స భాతునో;

మమ పఞ్చ సతానూనా, సిస్సా సబ్బే మమానుగా.

౨౮౯. ‘‘తదా ఉపేచ్చ మం బుద్ధో, కత్వాన వివిధాని మే [కత్వా నానావిధాని మే (సీ.)];

పాటిహీరాని లోకగ్గో, వినేసి నరసారథి.

౨౯౦. ‘‘సహస్సపరివారేన, అహోసిం ఏహిభిక్ఖుకో;

తేహేవ సహ సబ్బేహి, అరహత్తమపాపుణిం.

౨౯౧. ‘‘తే చేవఞ్ఞే చ బహవో, సిస్సా మం పరివారయుం;

సాసితుఞ్చ సమత్థోహం, తతో మం ఇసిసత్తమో.

౨౯౨. ‘‘మహాపరిసభావస్మిం, ఏతదగ్గే ఠపేసి మం;

అహో బుద్ధే కతం కారం, సఫలం మే అజాయథ.

౨౯౩. ‘‘కిలేసా ఝాపితా మయ్హం…పే… విహరామి అనాసవో.

౨౯౪. ‘‘స్వాగతం వత మే ఆసి…పే… కతం బుద్ధస్స సాసనం.

౨౯౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉరువేళకస్సపో థేరో ఇమా గాథాయో

అభాసిత్థాతి.

ఉరువేళకస్సపత్థేరస్సాపదానం అట్ఠమం.