౭. మహాకోట్ఠికత్థేరఅపదానం

౨౨౧. ‘‘పదుముత్తరో నామ జినో, సబ్బలోకవిదూ ముని;

ఇతో సతసహస్సమ్హి, కప్పే ఉప్పజ్జి చక్ఖుమా.

౨౨౨. ‘‘ఓవాదకో విఞ్ఞాపకో, తారకో సబ్బపాణినం;

దేసనాకుసలో బుద్ధో, తారేసి జనతం బహుం.

౨౨౩. ‘‘అనుకమ్పకో కారుణికో, హితేసీ సబ్బపాణినం;

సమ్పత్తే తిత్థియే సబ్బే, పఞ్చసీలే పతిట్ఠపి.

౨౨౪. ‘‘ఏవం నిరాకులం ఆసి, సుఞ్ఞతం తిత్థియేహి చ;

విచిత్తం అరహన్తేహి, వసీభూతేహి తాదిభి.

౨౨౫. ‘‘రతనానట్ఠపఞ్ఞాసం, ఉగ్గతో సో మహాముని;

కఞ్చనగ్ఘియసఙ్కాసో, బాత్తింసవరలక్ఖణో.

౨౨౬. ‘‘వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౨౨౭. ‘‘తదాహం హంసవతియం, బ్రాహ్మణో వేదపారగూ;

ఉపేచ్చ సబ్బలోకగ్గం [సబ్బసారగ్గం (సీ.), సత్తపారగం (పీ.)], అస్సోసిం ధమ్మదేసనం.

౨౨౮. ‘‘తదా సో సావకం వీరో, పభిన్నమతిగోచరం;

అత్థే ధమ్మే నిరుత్తే చ, పటిభానే చ కోవిదం.

౨౨౯. ‘‘ఠపేసి ఏతదగ్గమ్హి, తం సుత్వా ముదితో అహం;

ససావకం జినవరం, సత్తాహం భోజయిం తదా.

౨౩౦. ‘‘దుస్సేహచ్ఛాదయిత్వాన, ససిస్సం బుద్ధిసాగరం [బుద్ధసాగరం (క.)];

నిపచ్చ పాదమూలమ్హి, తం ఠానం పత్థయిం అహం.

౨౩౧. ‘‘తతో అవోచ లోకగ్గో, ‘పస్సథేతం దిజుత్తమం;

వినతం పాదమూలే మే, కమలోదరసప్పభం.

౨౩౨. ‘‘‘బుద్ధసేట్ఠస్స [సేట్ఠం బుద్ధస్స (స్యా. క.)] భిక్ఖుస్స, ఠానం పత్థయతే అయం;

తాయ సద్ధాయ చాగేన, సద్ధమ్మస్సవనేన [తేన ధమ్మస్సవేన (సీ. పీ. క.)] చ.

౨౩౩. ‘‘‘సబ్బత్థ సుఖితో హుత్వా, సంసరిత్వా భవాభవే;

అనాగతమ్హి అద్ధానే, లచ్ఛసే తం మనోరథం.

౨౩౪. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౨౩౫. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

కోట్ఠికో నామ నామేన, హేస్సతి సత్థు సావకో’.

౨౩౬. ‘‘తం సుత్వా ముదితో హుత్వా, యావజీవం తదా జినం;

మేత్తచిత్తో పరిచరిం, సతో పఞ్ఞాసమాహితో.

౨౩౭. ‘‘తేన కమ్మవిపాకేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౨౩౮. ‘‘సతానం తీణిక్ఖత్తుఞ్చ, దేవరజ్జమకారయిం;

సతానం పఞ్చక్ఖత్తుఞ్చ, చక్కవత్తీ అహోసహం.

౨౩౯. ‘‘పదేసరజ్జం విపులం, గణనాతో అసఙ్ఖియం;

సబ్బత్థ సుఖితో ఆసిం, తస్స కమ్మస్స వాహసా.

౨౪౦. ‘‘దువే భవే సంసరామి, దేవత్తే అథ మానుసే;

అఞ్ఞం గతిం న గచ్ఛామి, సుచిణ్ణస్స ఇదం ఫలం.

౨౪౧. ‘‘దువే కులే పజాయామి, ఖత్తియే అథ బ్రాహ్మణే;

‘‘నీచే కులే న జాయామి, సుచిణ్ణస్స ఇదం ఫలం.

౨౪౨. ‘‘పచ్ఛిమే భవే సమ్పత్తే, బ్రహ్మబన్ధు అహోసహం;

సావత్థియం విప్పకులే, పచ్చాజాతో మహద్ధనే.

౨౪౩. ‘‘మాతా చన్దవతీ నామ, పితా మే అస్సలాయనో;

యదా మే పితరం బుద్ధో, వినయీ సబ్బసుద్ధియా.

౨౪౪. ‘‘తదా పసన్నో సుగతే, పబ్బజిం అనగారియం;

మోగ్గల్లానో ఆచరియో, ఉపజ్ఝా సారిసమ్భవో.

౨౪౫. ‘‘కేసేసు ఛిజ్జమానేసు, దిట్ఠి ఛిన్నా సమూలికా;

నివాసేన్తో చ కాసావం, అరహత్తమపాపుణిం.

౨౪౬. ‘‘అత్థధమ్మనిరుత్తీసు, పటిభానే చ మే మతి;

పభిన్నా తేన లోకగ్గో, ఏతదగ్గే ఠపేసి మం.

౨౪౭. ‘‘అసన్దిట్ఠం వియాకాసిం, ఉపతిస్సేన పుచ్ఛితో;

పటిసమ్భిదాసు తేనాహం, అగ్గో సమ్బుద్ధసాసనే.

౨౪౮. ‘‘కిలేసా ఝాపితా మయ్హం…పే… విహరామి అనాసవో.

౨౪౯. ‘‘స్వాగతం వత మే ఆసి…పే… కతం బుద్ధస్స సాసనం.

౨౫౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మహాకోట్ఠికో థేరో ఇమా గాథాయో

అభాసిత్థాతి.

మహాకోట్ఠికత్థేరస్సాపదానం సత్తమం.