౪. దబ్బమల్లపుత్తత్థేరఅపదానం

౧౦౮. ‘‘పదుముత్తరో నామ జినో, సబ్బలోకవిదూ ముని;

ఇతో సతసహస్సమ్హి, కప్పే ఉప్పజ్జి చక్ఖుమా.

౧౦౯. ‘‘ఓవాదకో విఞ్ఞాపకో, తారకో సబ్బపాణినం;

దేసనాకుసలో బుద్ధో, తారేసి జనతం బహుం.

౧౧౦. ‘‘అనుకమ్పకో కారుణికో, హితేసీ సబ్బపాణినం;

సమ్పత్తే తిత్థియే సబ్బే, పఞ్చసీలే పతిట్ఠపి [పతిట్ఠహి (స్యా. క.)].

౧౧౧. ‘‘ఏవం నిరాకులం ఆసి, సుఞ్ఞతం [సుఞ్ఞకం (సీ.) ఏవముపరిపి] తిత్థియేహి చ;

విచిత్తం అరహన్తేహి, వసీభూతేహి తాదిభి.

౧౧౨. ‘‘రతనానట్ఠపఞ్ఞాసం, ఉగ్గతో సో మహాముని;

కఞ్చనగ్ఘియసఙ్కాసో, బాత్తింసవరలక్ఖణో.

౧౧౩. ‘‘వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౧౧౪. ‘‘తదాహం హంసవతియం, సేట్ఠిపుత్తో మహాయసో;

ఉపేత్వా లోకపజ్జోతం, అస్సోసిం ధమ్మదేసనం.

౧౧౫. ‘‘సేనాసనాని భిక్ఖూనం, పఞ్ఞాపేన్తం ససావకం;

కిత్తయన్తస్స వచనం, సుణిత్వా ముదితో అహం.

౧౧౬. ‘‘అధికారం ససఙ్ఘస్స, కత్వా తస్స మహేసినో;

నిపచ్చ సిరసా పాదే, తం ఠానమభిపత్థయిం.

౧౧౭. ‘‘తదాహ స మహావీరో, మమ కమ్మం పకిత్తయం;

‘యో ససఙ్ఘమభోజేసి, సత్తాహం లోకనాయకం.

౧౧౮. ‘‘‘సోయం కమలపత్తక్ఖో, సీహంసో కనకత్తచో;

మమ పాదమూలే నిపతి [పతితో (పీ.)], పత్థయం ఠానముత్తమం.

౧౧౯. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౨౦. ‘‘‘సావకో తస్స బుద్ధస్స, దబ్బో నామేన విస్సుతో;

సేనాసనపఞ్ఞాపకో, అగ్గో హేస్సతియం తదా’.

౧౨౧. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౨౨. ‘‘సతానం తీణిక్ఖత్తుఞ్చ, దేవరజ్జమకారయిం;

సతానం పఞ్చక్ఖత్తుఞ్చ, చక్కవత్తీ అహోసహం.

౧౨౩. ‘‘పదేసరజ్జం విపులం, గణనాతో అసఙ్ఖియం;

సబ్బత్థ సుఖితో ఆసిం, తస్స కమ్మస్స వాహసా.

౧౨౪. ‘‘ఏకనవుతితో కప్పే, విపస్సీ నామ నాయకో;

ఉప్పజ్జి చారుదస్సనో [చారునయనో (సీ. స్యా. పీ.)], సబ్బధమ్మవిపస్సకో.

౧౨౫. ‘‘దుట్ఠచిత్తో ఉపవదిం, సావకం తస్స తాదినో;

సబ్బాసవపరిక్ఖీణం, సుద్ధోతి చ విజానియ.

౧౨౬. ‘‘తస్సేవ నరవీరస్స, సావకానం మహేసినం;

సలాకఞ్చ గహేత్వాన [సలాకం పగ్గహేత్వాన (సీ. పీ.)], ఖీరోదనమదాసహం.

౧౨౭. ‘‘ఇమమ్హి భద్దకే కప్పే, బ్రహ్మబన్ధు మహాయసో;

కస్సపో నామ గోత్తేన, ఉప్పజ్జి వదతం వరో.

౧౨౮. ‘‘సాసనం జోతయిత్వాన, అభిభుయ్య కుతిత్థియే;

వినేయ్యే వినయిత్వావ, నిబ్బుతో సో ససావకో.

౧౨౯. ‘‘ససిస్సే నిబ్బుతే నాథే, అత్థమేన్తమ్హి సాసనే;

దేవా కన్దింసు సంవిగ్గా, ముత్తకేసా రుదమ్ముఖా.

౧౩౦. ‘‘నిబ్బాయిస్సతి ధమ్మక్ఖో, న పస్సిస్సామ సుబ్బతే;

న సుణిస్సామ సద్ధమ్మం, అహో నో అప్పపుఞ్ఞతా.

౧౩౧. ‘‘తదాయం పథవీ సబ్బా, అచలా సా చలాచలా [చలాచలీ (సీ.), పులాపులీ (స్యా.)];

సాగరో చ ససోకోవ, వినదీ కరుణం గిరం.

౧౩౨. ‘‘చతుద్దిసా దున్దుభియో, నాదయింసు అమానుసా;

సమన్తతో అసనియో, ఫలింసు చ భయావహా.

౧౩౩. ‘‘ఉక్కా పతింసు నభసా, ధూమకేతు చ దిస్సతి;

సధూమా జాలవట్టా చ [సబ్బథలజసత్తా చ (సీ.)], రవింసు కరుణం మిగా.

౧౩౪. ‘‘ఉప్పాదే దారుణే దిస్వా, సాసనత్థఙ్గసూచకే;

సంవిగ్గా భిక్ఖవో సత్త, చిన్తయిమ్హ మయం తదా.

౧౩౫. ‘‘సాసనేన వినామ్హాకం, జీవితేన అలం మయం;

పవిసిత్వా మహారఞ్ఞం, యుఞ్జామ జినసాసనం.

౧౩౬. ‘‘అద్దసమ్హ తదారఞ్ఞే, ఉబ్బిద్ధం సేలముత్తమం;

నిస్సేణియా తమారుయ్హ, నిస్సేణిం పాతయిమ్హసే.

౧౩౭. ‘‘తదా ఓవది నో థేరో, బుద్ధుప్పాదో సుదుల్లభో;

సద్ధాతిదుల్లభా లద్ధా, థోకం సేసఞ్చ సాసనం.

౧౩౮. ‘‘నిపతన్తి ఖణాతీతా, అనన్తే దుక్ఖసాగరే;

తస్మా పయోగో కత్తబ్బో, యావ ఠాతి మునే మతం [యావ తిట్ఠతి సాసనం (స్యా.)].

౧౩౯. ‘‘అరహా ఆసి సో థేరో, అనాగామీ తదానుగో;

సుసీలా ఇతరే యుత్తా, దేవలోకం అగమ్హసే.

౧౪౦. ‘‘నిబ్బుతో తిణ్ణసంసారో, సుద్ధావాసే చ ఏకకో;

అహఞ్చ పక్కుసాతి చ, సభియో బాహియో తథా.

౧౪౧. ‘‘కుమారకస్సపో చేవ, తత్థ తత్థూపగా మయం;

సంసారబన్ధనా ముత్తా, గోతమేనానుకమ్పితా.

౧౪౨. ‘‘మల్లేసు కుసినారాయం, జాతో గబ్భేవ మే సతో;

మాతా మతా చితారుళ్హా, తతో నిప్పతితో అహం.

౧౪౩. ‘‘పతితో దబ్బపుఞ్జమ్హి, తతో దబ్బోతి విస్సుతో;

బ్రహ్మచారీబలేనాహం, విముత్తో సత్తవస్సికో.

౧౪౪. ‘‘ఖీరోదనబలేనాహం, పఞ్చహఙ్గేహుపాగతో;

ఖీణాసవోపవాదేన, పాపేహి బహుచోదితో.

౧౪౫. ‘‘ఉభో పుఞ్ఞఞ్చ పాపఞ్చ, వీతివత్తోమ్హి దానిహం;

పత్వాన పరమం సన్తిం, విహరామి అనాసవో.

౧౪౬. ‘‘సేనాసనం పఞ్ఞాపయిం, హాసయిత్వాన సుబ్బతే;

జినో తస్మిం గుణే తుట్ఠో, ఏతదగ్గే ఠపేసి మం.

౧౪౭. ‘‘కిలేసా ఝాపితా మయ్హం…పే… విహరామి అనాసవో.

౧౪౮. ‘‘స్వాగతం వత మే ఆసి…పే… కతం బుద్ధస్స సాసనం.

౧౪౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా దబ్బమల్లపుత్తో థేరో ఇమా గాథాయో

అభాసిత్థాతి.

దబ్బమల్లపుత్తత్థేరస్సాపదానం చతుత్థం.