౩. మహాకప్పినత్థేరఅపదానం
౬౬. ‘‘పదుముత్తరో నామ జినో, సబ్బధమ్మాన పారగూ;
ఉదితో అజటాకాసే [జగదాకాసే (సీ.), జలదాకాసే (పీ.)], రవీవ సరదమ్బరే.
౬౭. ‘‘వచనాభాయ బోధేతి, వేనేయ్యపదుమాని సో;
కిలేసపఙ్కం సోసేతి, మతిరంసీహి నాయకో.
౬౮. ‘‘తిత్థియానం యసే [యసో (సీ. పీ.)] హన్తి, ఖజ్జోతాభా యథా రవి;
సచ్చత్థాభం పకాసేతి, రతనంవ దివాకరో.
౬౯. ‘‘గుణానం ఆయతిభూతో, రతనానంవ సాగరో;
పజ్జున్నోరివ భూతాని, ధమ్మమేఘేన వస్సతి.
౭౦. ‘‘అక్ఖదస్సో తదా ఆసిం, నగరే హంససవ్హయే;
ఉపేచ్చ ధమ్మమస్సోసిం, జలజుత్తమనామినో.
౭౧. ‘‘ఓవాదకస్స భిక్ఖూనం, సావకస్స కతావినో;
గుణం పకాసయన్తస్స, తప్పయన్తస్స [తోసయన్తస్స (సీ.), హాసయన్తస్స (స్యా.), వాసయన్తస్స (పీ.)] మే మనం.
౭౨. ‘‘సుత్వా పతీతో సుమనో, నిమన్తేత్వా తథాగతం;
ససిస్సం భోజయిత్వాన, తం ఠానమభిపత్థయిం.
౭౩. ‘‘తదా హంససమభాగో, హంసదున్దుభినిస్సనో [హంసదున్దుభిసుస్సరో (సీ.)];
పస్సథేతం మహామత్తం, వినిచ్ఛయవిసారదం.
౭౪. ‘‘పతితం పాదమూలే మే, సముగ్గతతనూరుహం;
జీమూతవణ్ణం పీణంసం, పసన్ననయనాననం.
౭౫. ‘‘పరివారేన మహతా, రాజయుత్తం మహాయసం;
ఏసో కతావినో ఠానం, పత్థేతి ముదితాసయో.
౭౬. ‘‘‘ఇమినా పణిపాతేన, చాగేన పణిధీహి చ [పిణ్డపాతేన, చేతనా పణిధీహి చ (సీ.)];
కప్పసతసహస్సాని, నుపపజ్జతి దుగ్గతిం.
౭౭. ‘‘‘దేవేసు దేవసోభగ్గం, మనుస్సేసు మహన్తతం;
అనుభోత్వాన సేసేన [అభుత్వావ సేసేన (సీ.), అనుభోత్వావ సేసేన (స్యా.)], నిబ్బానం పాపుణిస్సతి.
౭౮. ‘‘‘సతసహస్సితో కప్పే, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౭౯. ‘‘‘తస్స ధమ్మేసు దాయాదో, ఓరసో ధమ్మనిమ్మితో;
కప్పినో నామ నామేన, హేస్సతి సత్థు సావకో’.
౮౦. ‘‘తతోహం సుకతం కారం, కత్వాన జినసాసనే;
జహిత్వా మానుసం దేహం, తుసితం అగమాసహం.
౮౧. ‘‘దేవమానుసరజ్జాని, సతసో అనుసాసియ;
బారాణసియమాసన్నే, జాతో కేనియజాతియం.
౮౨. ‘‘సహస్సపరివారేన [సతసహస్సపరివారో (స్యా.)], సపజాపతికో అహం;
పఞ్చ పచ్చేకబుద్ధానం, సతాని సముపట్ఠహిం.
౮౩. ‘‘తేమాసం భోజయిత్వాన, పచ్ఛాదమ్హ తిచీవరం;
తతో చుతా మయం సబ్బే, అహుమ్హ తిదసూపగా.
౮౪. ‘‘పునో సబ్బే మనుస్సత్తం, అగమిమ్హ తతో చుతా;
కుక్కుటమ్హి పురే జాతా, హిమవన్తస్స పస్సతో.
౮౫. ‘‘కప్పినో నామహం ఆసిం, రాజపుత్తో మహాయసో;
సేసామచ్చకులే జాతా, మమేవ పరివారయుం.
౮౬. ‘‘మహారజ్జసుఖం పత్తో, సబ్బకామసమిద్ధిమా;
వాణిజేహి సమక్ఖాతం, బుద్ధుప్పాదమహం సుణిం.
౮౭. ‘‘‘బుద్ధో లోకే సముప్పన్నో, అసమో ఏకపుగ్గలో;
సో పకాసేతి సద్ధమ్మం, అమతం సుఖముత్తమం.
౮౮. ‘‘‘సుయుత్తా తస్స సిస్సా చ, సుముత్తా చ అనాసవా’;
‘‘సుత్వా నేసం సువచనం, సక్కరిత్వాన వాణిజే.
౮౯. ‘‘పహాయ రజ్జం సామచ్చో, నిక్ఖమిం బుద్ధమామకో;
నదిం దిస్వా మహాచన్దం, పూరితం సమతిత్తికం.
౯౦. ‘‘అప్పతిట్ఠం అనాలమ్బం, దుత్తరం సీఘవాహినిం;
గుణం సరిత్వా బుద్ధస్స, సోత్థినా సమతిక్కమిం.
౯౧. ‘‘‘భవసోతం సచే బుద్ధో, తిణ్ణో లోకన్తగూ విదూ [విభూ (క.)];
ఏతేన సచ్చవజ్జేన, గమనం మే సమిజ్ఝతు.
౯౨. ‘‘‘యది సన్తిగమో మగ్గో, మోక్ఖో చచ్చన్తికం [మోక్ఖదం సన్తికం (స్యా.)] సుఖం;
ఏతేన సచ్చవజ్జేన, గమనం మే సమిజ్ఝతు.
౯౩. ‘‘‘సఙ్ఘో చే తిణ్ణకన్తారో, పుఞ్ఞక్ఖేత్తో అనుత్తరో;
ఏతేన సచ్చవజ్జేన, గమనం మే సమిజ్ఝతు’.
౯౪. ‘‘సహ కతే సచ్చవరే, మగ్గా అపగతం జలం;
తతో సుఖేన ఉత్తిణ్ణో, నదీతీరే మనోరమే.
౯౫. ‘‘నిసిన్నం అద్దసం బుద్ధం, ఉదేన్తంవ పభఙ్కరం;
జలన్తం హేమసేలంవ, దీపరుక్ఖంవ జోతితం.
౯౬. ‘‘ససింవ తారాసహితం, సావకేహి పురక్ఖతం;
వాసవం వియ వస్సన్తం, దేసనాజలదన్తరం [దేవేన జలనన్దనం (స్యా. పీ.)].
౯౭. ‘‘వన్దిత్వాన సహామచ్చో, ఏకమన్తముపావిసిం;
తతో నో ఆసయం [తతో అజ్ఝాసయం (స్యా.)] ఞత్వా, బుద్ధో ధమ్మమదేసయి.
౯౮. ‘‘సుత్వాన ధమ్మం విమలం, అవోచుమ్హ మయం జినం;
‘పబ్బాజేహి మహావీర, నిబ్బిన్దామ్హ [నిబ్బిన్నామ్హ (సీ. పీ.), ఓతిణ్ణమ్హ (స్యా.)] మయం భవే’.
౯౯. ‘‘‘స్వక్ఖాతో భిక్ఖవే ధమ్మో, దుక్ఖన్తకరణాయ వో;
చరథ బ్రహ్మచరియం’, ఇచ్చాహ మునిసత్తమో.
౧౦౦. ‘‘సహ వాచాయ సబ్బేపి, భిక్ఖువేసధరా మయం;
అహుమ్హ ఉపసమ్పన్నా, సోతాపన్నా చ సాసనే.
౧౦౧. ‘‘తతో జేతవనం గన్త్వా, అనుసాసి వినాయకో;
అనుసిట్ఠో జినేనాహం, అరహత్తమపాపుణిం.
౧౦౨. ‘‘తతో భిక్ఖుసహస్సాని [భిక్ఖుసహస్సం తం (సీ. పీ.)], అనుసాసిమహం తదా;
మమానుసాసనకరా, తేపి ఆసుం అనాసవా.
౧౦౩. ‘‘జినో తస్మిం గుణే తుట్ఠో, ఏతదగ్గే ఠపేసి మం;
భిక్ఖుఓవాదకానగ్గో, కప్పినోతి మహాజనే.
౧౦౪. ‘‘సతసహస్సే కతం కమ్మం, ఫలం దస్సేసి మే ఇధ;
పముత్తో సరవేగోవ, కిలేసే ఝాపయిం [ఝాపయీ (సీ.)] మమ.
౧౦౫. ‘‘కిలేసా ఝాపితా మయ్హం…పే… విహరామి అనాసవో.
౧౦౬. ‘‘స్వాగతం వత మే ఆసి…పే… కతం బుద్ధస్స సాసనం.
౧౦౭. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా మహాకప్పినో థేరో ఇమా గాథాయో
అభాసిత్థాతి.
మహాకప్పినత్థేరస్సాపదానం తతియం.