౨. వక్కలిత్థేరఅపదానం

౨౮. ‘‘ఇతో సతసహస్సమ్హి, కప్పే ఉప్పజ్జి నాయకో;

అనోమనామో అమితో, నామేన పదుముత్తరో.

౨౯. ‘‘పదుమాకారవదనో, పదుమామలసుచ్ఛవీ;

లోకేనానుపలిత్తోవ తోయేన పదుమం యథా.

౩౦. ‘‘వీరో పదుమపత్తక్ఖో, కన్తో చ పదుమం యథా;

పదుముత్తరగన్ధోవ, తస్మా సో పదుముత్తరో.

౩౧. ‘‘లోకజేట్ఠో చ నిమ్మానో, అన్ధానం నయనూపమో;

సన్తవేసో గుణనిధి, కరుణామతిసాగరో.

౩౨. ‘‘స కదాచి మహావీరో, బ్రహ్మాసురసురచ్చితో;

సదేవమనుజాకిణ్ణే, జనమజ్ఝే జినుత్తమో [జనుత్తమో (స్యా. పీ.), అనుత్తమో (క.) వఙ్గీసత్థేరాపదానేపి].

౩౩. ‘‘వదనేన సుగన్ధేన, మధురేన రుతేన చ;

రఞ్జయం పరిసం సబ్బం, సన్థవీ సావకం సకం.

౩౪. ‘‘సద్ధాధిముత్తో సుమతి, మమ దస్సనలాలసో [దస్సనసాలయో (స్యా.)];

నత్థి ఏతాదిసో అఞ్ఞో, యథాయం భిక్ఖు వక్కలి.

౩౫. ‘‘తదాహం హంసవతియం, నగరే బ్రాహ్మణత్రజో;

హుత్వా సుత్వా చ తం వాక్యం, తం ఠానమభిరోచయిం.

౩౬. ‘‘ససావకం తం విమలం, నిమన్తేత్వా తథాగతం;

సత్తాహం భోజయిత్వాన, దుస్సేహచ్ఛాదయిం తదా.

౩౭. ‘‘నిపచ్చ సిరసా తస్స, అనన్తగుణసాగరే;

నిముగ్గో పీతిసమ్పుణ్ణో, ఇదం వచనమబ్రవిం.

౩౮. ‘‘‘యో సో తయా సన్థవితో, ఇతో సత్తమకే ముని [ఇధ సద్ధాధిముత్తో ఇసి (స్యా.), ఇతో సత్తమకేహని (సీ. పీ.)];

భిక్ఖు సద్ధావతం అగ్గో, తాదిసో హోమహం మునే’.

౩౯. ‘‘ఏవం వుత్తే మహావీరో, అనావరణదస్సనో;

ఇమం వాక్యం ఉదీరేసి, పరిసాయ మహాముని.

౪౦. ‘‘‘పస్సథేతం మాణవకం, పీతమట్ఠనివాసనం;

హేమయఞ్ఞోపచితఙ్గం [హేమయఞ్ఞోపవీతఙ్గం (సీ.)], జననేత్తమనోహరం.

౪౧. ‘‘‘ఏసో అనాగతద్ధానే, గోతమస్స మహేసినో;

అగ్గో సద్ధాధిముత్తానం, సావకోయం భవిస్సతి.

౪౨. ‘‘‘దేవభూతో మనుస్సో వా, సబ్బసన్తాపవజ్జితో;

సబ్బభోగపరిబ్యూళ్హో, సుఖితో సంసరిస్సతి.

౪౩. ‘‘‘సతసహస్సితో కప్పే, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౪౪. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

వక్కలి నామ నామేన, హేస్సతి సత్థు సావకో’.

౪౫. ‘‘తేన కమ్మవిసేసేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౪౬. ‘‘సబ్బత్థ సుఖితో హుత్వా, సంసరన్తో భవాభవే;

సావత్థియం పురే జాతో, కులే అఞ్ఞతరే అహం.

౪౭. ‘‘నోనీతసుఖుమాలం మం, జాతపల్లవకోమలం;

మన్దం ఉత్తానసయనం, పిసాచభయతజ్జితా.

౪౮. ‘‘పాదమూలే మహేసిస్స, సాయేసుం దీనమానసా;

ఇమం దదామ తే నాథ, సరణం హోహి నాయక.

౪౯. ‘‘తదా పటిగ్గహి సో మం, భీతానం సరణో ముని;

జాలినా చక్కఙ్కితేన [సఙ్కలఙ్కేన (సీ.)], ముదుకోమలపాణినా.

౫౦. ‘‘తదా పభుతి తేనాహం, అరక్ఖేయ్యేన రక్ఖితో;

సబ్బవేరవినిముత్తో [సబ్బబ్యాధివినిముత్తో (స్యా.), సబ్బూపధివినిముత్తో (పీ.)], సుఖేన పరివుద్ధితో.

౫౧. ‘‘సుగతేన వినా భూతో, ఉక్కణ్ఠామి ముహుత్తకం;

జాతియా సత్తవస్సోహం, పబ్బజిం అనగారియం.

౫౨. ‘‘సబ్బపారమిసమ్భూతం, నీలక్ఖినయనం [లఙ్కినీలయనం (సీ.)] వరం;

రూపం సబ్బసుభాకిణ్ణం, అతిత్తో విహరామహం [విహయామహం (సీ. పీ.)].

౫౩. ‘‘బుద్ధరూపరతిం [బుద్ధో రూపరతిం (సీ.)] ఞత్వా, తదా ఓవది మం జినో;

‘అలం వక్కలి కిం రూపే, రమసే బాలనన్దితే.

౫౪. ‘‘‘యో హి పస్సతి సద్ధమ్మం, సో మం పస్సతి పణ్డితో;

అపస్సమానో సద్ధమ్మం, మం పస్సమ్పి న పస్సతి.

౫౫. ‘‘‘అనన్తాదీనవో కాయో, విసరుక్ఖసమూపమో;

ఆవాసో సబ్బరోగానం, పుఞ్జో దుక్ఖస్స కేవలో.

౫౬. ‘‘‘నిబ్బిన్దియ తతో రూపే, ఖన్ధానం ఉదయబ్బయం;

పస్స ఉపక్కిలేసానం, సుఖేనన్తం గమిస్సతి’.

౫౭. ‘‘ఏవం తేనానుసిట్ఠోహం, నాయకేన హితేసినా;

గిజ్ఝకూటం సమారుయ్హ, ఝాయామి గిరికన్దరే.

౫౮. ‘‘ఠితో పబ్బతపాదమ్హి, అస్సాసయి [మమాహసో (సీ.)] మహాముని;

వక్కలీతి జినో వాచం, తం సుత్వా ముదితో అహం.

౫౯. ‘‘పక్ఖన్దిం సేలపబ్భారే, అనేకసతపోరిసే;

తదా బుద్ధానుభావేన, సుఖేనేవ మహిం గతో.

౬౦. ‘‘పునోపి [పునాపి (స్యా.), ముని మం (క.)] ధమ్మం దేసేతి, ఖన్ధానం ఉదయబ్బయం;

తమహం ధమ్మమఞ్ఞాయ, అరహత్తమపాపుణిం.

౬౧. ‘‘సుమహాపరిసమజ్ఝే, తదా మం చరణన్తగో;

అగ్గం సద్ధాధిముత్తానం, పఞ్ఞపేసి మహామతి.

౬౨. ‘‘సతసహస్సితో కప్పే, యం కమ్మమకరిం తదా;

దుగ్గతిం నాభిజానామి, బుద్ధపూజాయిదం ఫలం.

౬౩. ‘‘కిలేసా ఝాపితా మయ్హం…పే… విహరామి అనాసవో.

౬౪. ‘‘స్వాగతం వత మే ఆసి…పే… కతం బుద్ధస్స సాసనం.

౬౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా వక్కలిత్థేరో ఇమా గాథాయో

అభాసిత్థాతి.

వక్కలిత్థేరస్సాపదానం దుతియం.