౧౦. మోఘరాజత్థేరఅపదానం

౩౨౭. ‘‘పదుముత్తరో నామ జినో, సబ్బలోకవిదూ ముని;

ఇతో సతసహస్సమ్హి, కప్పే ఉప్పజ్జి చక్ఖుమా.

౩౨౮. ‘‘ఓవాదకో విఞ్ఞాపకో, తారకో సబ్బపాణినం;

దేసనాకుసలో బుద్ధో, తారేసి జనతం బహుం.

౩౨౯. ‘‘అనుకమ్పకో కారుణికో, హితేసీ సబ్బపాణినం;

సమ్పత్తే తిత్థియే సబ్బే, పఞ్చసీలే పతిట్ఠపి.

౩౩౦. ‘‘ఏవం నిరాకులం ఆసి, సుఞ్ఞతం తిత్థియేహి చ;

విచిత్తం అరహన్తేహి, వసీభూతేహి తాదిభి.

౩౩౧. ‘‘రతనానట్ఠపఞ్ఞాసం, ఉగ్గతో సో మహాముని;

కఞ్చనగ్ఘియసఙ్కాసో, బాత్తింసవరలక్ఖణో.

౩౩౨. ‘‘వస్ససతసహస్సాని, ఆయు విజ్జతి తావదే;

తావతా తిట్ఠమానో సో, తారేసి జనతం బహుం.

౩౩౩. ‘‘తదాహం హంసవతియం, కులే అఞ్ఞతరే అహుం;

పరకమ్మాయనే యుత్తో, నత్థి మే కిఞ్చి సంధనం.

౩౩౪. ‘‘పటిక్కమనసాలాయం, వసన్తో కతభూమియం;

అగ్గిం ఉజ్జాలయిం తత్థ, దళ్హం కణ్హాసి సా [కణ్హా సియా (సీ. పీ.), డయ్హకణ్హా సిలా (స్యా.)] హీ.

౩౩౫. ‘‘తదా పరిసతిం నాథో, చతుసచ్చపకాసకో;

సావకం సమ్పకిత్తేసి, లూఖచీవరధారకం.

౩౩౬. ‘‘తస్స తమ్హి గుణే తుట్ఠో, పణిపచ్చ [పతిపజ్జ (స్యా.)] తథాగతం;

లూఖచీవరధారగ్గం, పత్థయిం ఠానముత్తమం.

౩౩౭. ‘‘తదా అవోచ భగవా, సావకే పదుముత్తరో;

‘పస్సథేతం పురిసకం, కుచేలం తనుదేహకం.

౩౩౮. ‘‘‘పీతిప్పసన్నవదనం, సద్ధాధనసమన్వితం [సద్ధాస్నేహసమన్వతం (క.)];

ఉదగ్గతనుజం హట్ఠం, అచలం సాలపిణ్డితం.

౩౩౯. ‘‘‘ఏసో పత్థేతి తం ఠానం, సచ్చసేనస్స భిక్ఖునో;

లూఖచీవరధారిస్స, తస్స వణ్ణసితాసయో [వణ్ణగతాసయో (సీ. స్యా. పీ.)].

౩౪౦. ‘‘తం సుత్వా ముదితో హుత్వా, నిపచ్చ సిరసా జినం;

యావజీవం సుభం కమ్మం, కరిత్వా జినసాసనే.

౩౪౧. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసూపగో అహం.

౩౪౨. ‘‘పటిక్కమనసాలాయం, భూమిదాహకకమ్మునా;

సమసహస్సం నిరయే, అదయ్హిం వేదనాట్టితో.

౩౪౩. ‘‘తేన కమ్మావసేసేన, పఞ్చ జాతిసతానిహం;

మనుస్సో కులజో హుత్వా, జాతియా లక్ఖణఙ్కితో.

౩౪౪. ‘‘పఞ్చ జాతిసతానేవ, కుట్ఠరోగసమప్పితో;

మహాదుక్ఖం అనుభవిం, తస్స కమ్మస్స వాహసా.

౩౪౫. ‘‘ఇమస్మిం భద్దకే కప్పే, ఉపరిట్ఠం యసస్సినం;

పిణ్డపాతేన తప్పేసిం, పసన్నమానసో అహం.

౩౪౬. ‘‘తేన కమ్మవిసేసేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౩౪౭. ‘‘పచ్ఛిమే భవే సమ్పత్తే, అజాయిం ఖత్తియే కులే;

పితునో అచ్చయేనాహం, మహారజ్జసమప్పితో.

౩౪౮. ‘‘కుట్ఠరోగాధిభూతోహం, న రతిం న సుఖం లభే;

మోఘం రజ్జం సుఖం యస్మా, మోఘరాజా తతో అహం.

౩౪౯. ‘‘కాయస్స దోసం దిస్వాన, పబ్బజిం అనగారియం;

బావరిస్స దిజగ్గస్స, సిస్సత్తం అజ్ఝుపాగమిం.

౩౫౦. ‘‘మహతా పరివారేన, ఉపేచ్చ నరనాయకం;

అపుచ్ఛిం నిపుణం పఞ్హం, తం వీరం వాదిసూదనం.

౩౫౧. ‘‘‘అయం లోకో పరో లోకో, బ్రహ్మలోకో సదేవకో;

దిట్ఠిం నో [దిట్ఠా నో (సీ.), దిట్ఠం నో (పీ.), దిట్ఠిం తే (స్యా.)] నాభిజానామి, గోతమస్స యసస్సినో.

౩౫౨. ‘‘‘ఏవాభిక్కన్తదస్సావిం, అత్థి పఞ్హేన ఆగమం;

కథం లోకం అవేక్ఖన్తం, మచ్చురాజా న పస్సతి’.

౩౫౩. ‘‘‘సుఞ్ఞతో లోకం అవేక్ఖస్సు, మోఘరాజ సదా సతో;

అత్తానుదిట్ఠిం ఉహచ్చ, ఏవం మచ్చుతరో సియా.

౩౫౪. ‘‘‘ఏవం లోకం అవేక్ఖన్తం, మచ్చురాజా న పస్సతి’;

ఇతి మం అభణి బుద్ధో, సబ్బరోగతికిచ్ఛకో.

౩౫౫. ‘‘సహ గాథావసానేన, కేసమస్సువివజ్జితో;

కాసావవత్థవసనో, ఆసిం భిక్ఖు తథారహా.

౩౫౬. ‘‘సఙ్ఘికేసు విహారేసు, న వసిం రోగపీళితో;

మా విహారో పదుస్సీతి, వాతరోగేహి పీళితో [వాచాయాభిసుపీళితో (స్యా. పీ.), వాతరోగీ సుపీళితో (క.)].

౩౫౭. ‘‘సఙ్కారకూటా ఆహిత్వా, సుసానా రథికాహి చ;

తతో సఙ్ఘాటిం కరిత్వా, ధారయిం లూఖచీవరం.

౩౫౮. ‘‘మహాభిసక్కో తస్మిం మే, గుణే తుట్ఠో వినాయకో;

లూఖచీవరధారీనం, ఏతదగ్గే ఠపేసి మం.

౩౫౯. ‘‘పుఞ్ఞపాపపరిక్ఖీణో, సబ్బరోగవివజ్జితో;

సిఖీవ అనుపాదానో, నిబ్బాయిస్సమనాసవో.

౩౬౦. ‘‘కిలేసా ఝాపితా మయ్హం…పే… విహరామి అనాసవో.

౩౬౧. ‘‘స్వాగతం వత మే ఆసి…పే… కతం బుద్ధస్స సాసనం.

౩౬౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మోఘరాజా థేరో ఇమా గాథాయో

అభాసిత్థాతి.

మోఘరాజత్థేరస్సాపదానం దసమం.

కచ్చాయనవగ్గో చతుపఞ్ఞాసమో.