౯. సుభద్దత్థేరఅపదానం

౧౦౧. ‘‘పదుముత్తరో లోకవిదూ, ఆహుతీనం పటిగ్గహో;

జనతం ఉద్ధరిత్వాన, నిబ్బాయతి మహాయసో.

౧౦౨. ‘‘నిబ్బాయన్తే చ సమ్బుద్ధే, దససహస్సి కమ్పథ;

జనకాయో మహా ఆసి, దేవా సన్నిపతుం తదా.

౧౦౩. ‘‘చన్దనం పూరయిత్వాన, తగరామల్లికాహి చ;

హట్ఠో హట్ఠేన చిత్తేన, ఆరోపయిం [ఆలేపేసిం (సీ.), ఆరోపేసిం (స్యా.)] నరుత్తమం.

౧౦౪. ‘‘మమ సఙ్కప్పమఞ్ఞాయ, సత్థా లోకే అనుత్తరో;

నిపన్నకోవ సమ్బుద్ధో, ఇమా గాథా అభాసథ.

౧౦౫. ‘‘‘యో మే పచ్ఛిమకే కాలే, గన్ధమాలేన [గన్ధమల్లేన (స్యా. క.) నపుంసకేకత్తం మనసికాతబ్బం] ఛాదయి;

తమహం కిత్తయిస్సామి, సుణాథ మమ భాసతో.

౧౦౬. ‘‘‘ఇతో చుతో అయం పోసో, తుసితకాయం గమిస్సతి;

తత్థ రజ్జం కరిత్వాన, నిమ్మానం సో గమిస్సతి.

౧౦౭. ‘‘‘ఏతేనేవ ఉపాయేన, దత్వా మాలం [మల్యం (సీ.), మల్లం (స్యా. క.)] వరుత్తమం;

సకకమ్మాభిరద్ధో సో, సమ్పత్తిం అనుభోస్సతి.

౧౦౮. ‘‘‘పునాపి తుసితే కాయే, నిబ్బత్తిస్సతియం నరో;

తమ్హా కాయా చవిత్వాన, మనుస్సత్తం గమిస్సతి.

౧౦౯. ‘‘‘సక్యపుత్తో మహానాగో, అగ్గో లోకే సదేవకే;

బోధయిత్వా బహూ సత్తే, నిబ్బాయిస్సతి చక్ఖుమా.

౧౧౦. ‘‘‘తదా సోపగతో సన్తో, సుక్కమూలేన చోదితో;

ఉపసఙ్కమ్మ సమ్బుద్ధం, పఞ్హం పుచ్ఛిస్సతి తదా.

౧౧౧. ‘‘‘హాసయిత్వాన సమ్బుద్ధో, సబ్బఞ్ఞూ లోకనాయకో;

పుఞ్ఞకమ్మం పరిఞ్ఞాయ, సచ్చాని వివరిస్సతి.

౧౧౨. ‘‘‘ఆరద్ధో చ అయం పఞ్హో, తుట్ఠో ఏకగ్గమానసో;

సత్థారం అభివాదేత్వా, పబ్బజ్జం యాచయిస్సతి.

౧౧౩. ‘‘‘పసన్నమానసం దిస్వా, సకకమ్మేన తోసితం;

పబ్బాజేస్సతి సో బుద్ధో, అగ్గమగ్గస్స కోవిదో.

౧౧౪. ‘‘‘వాయమిత్వానయం పోసో, సమ్మాసమ్బుద్ధసాసనే;

సబ్బాసవే పరిఞ్ఞాయ, నిబ్బాయిస్సతినాసవో’.

పఞ్చమభాణవారం.

౧౧౫. ‘‘పుబ్బకమ్మేన సంయుత్తో, ఏకగ్గో సుసమాహితో;

బుద్ధస్స ఓరసో పుత్తో, ధమ్మజోమ్హి సునిమ్మితో.

౧౧౬. ‘‘ధమ్మరాజం ఉపగమ్మ, అపుచ్ఛిం పఞ్హముత్తమం;

కథయన్తో చ మే పఞ్హం, ధమ్మసోతం ఉపానయి.

౧౧౭. ‘‘తస్సాహం ధమ్మమఞ్ఞాయ, విహాసిం సాసనే రతో;

సబ్బాసవే పరిఞ్ఞాయ, విహరామి అనాసవో.

౧౧౮. ‘‘సతసహస్సితో కప్పే, జలజుత్తమనాయకో;

నిబ్బాయి అనుపాదానో, దీపోవ తేలసఙ్ఖయా.

౧౧౯. ‘‘సత్తయోజనికం ఆసి, థూపఞ్చ రతనామయం;

ధజం తత్థ అపూజేసిం, సబ్బభద్దం మనోరమం.

౧౨౦. ‘‘కస్సపస్స చ బుద్ధస్స, తిస్సో నామగ్గసావకో;

పుత్తో మే ఓరసో ఆసి, దాయాదో జినసాసనే.

౧౨౧. ‘‘తస్స హీనేన మనసా, వాచం భాసిం అభద్దకం;

తేన కమ్మవిపాకేన, పచ్ఛా మే ఆసి భద్దకం [పచ్ఛిమే అద్దసం జినం (సీ.)].

౧౨౨. ‘‘ఉపవత్తనే సాలవనే, పచ్ఛిమే సయనే ముని;

పబ్బాజేసి మహావీరో, హితో కారుణికో జినో.

౧౨౩. ‘‘అజ్జేవ దాని పబ్బజ్జా, అజ్జేవ ఉపసమ్పదా;

అజ్జేవ పరినిబ్బానం, సమ్ముఖా ద్విపదుత్తమే.

౧౨౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సుభద్దో థేరో ఇమా గాథాయో అభాసిత్థాతి.

సుభద్దత్థేరస్సాపదానం నవమం.