౧౦. చున్దత్థేరఅపదానం

౧౨౫. ‘‘సిద్ధత్థస్స భగవతో, లోకజేట్ఠస్స తాదినో;

అగ్ఘియం కారయిత్వాన, జాతిపుప్ఫేహి ఛాదయిం.

౧౨౬. ‘‘నిట్ఠాపేత్వాన తం పుప్ఫం, బుద్ధస్స ఉపనామయిం;

పుప్ఫావసేసం పగ్గయ్హ, బుద్ధస్స అభిరోపయిం.

౧౨౭. ‘‘కఞ్చనగ్ఘియసఙ్కాసం, బుద్ధం లోకగ్గనాయకం;

పసన్నచిత్తో సుమనో, పుప్ఫగ్ఘియముపానయిం.

౧౨౮. ‘‘వితిణ్ణకఙ్ఖో సమ్బుద్ధో, తిణ్ణోఘేహి పురక్ఖతో;

భిక్ఖుసఙ్ఘే నిసీదిత్వా, ఇమా గాథా అభాసథ.

౧౨౯. ‘‘‘దిబ్బగన్ధం పవాయన్తం, యో మే పుప్ఫగ్ఘియం అదా;

తమహం కిత్తయిస్సామి, సుణాథ మమ భాసతో.

౧౩౦. ‘‘‘ఇతో చుతో అయం పోసో, దేవసఙ్ఘపురక్ఖతో;

జాతిపుప్ఫేహి పరికిణ్ణో, దేవలోకం గమిస్సతి.

౧౩౧. ‘‘‘ఉబ్బిద్ధం భవనం తస్స, సోవణ్ణఞ్చ మణీమయం;

బ్యమ్హం పాతుభవిస్సతి, పుఞ్ఞకమ్మప్పభావితం.

౧౩౨. ‘‘‘చతుసత్తతిక్ఖత్తుం సో, దేవరజ్జం కరిస్సతి;

అనుభోస్సతి సమ్పత్తిం, అచ్ఛరాహి పురక్ఖతో.

౧౩౩. ‘‘‘పథబ్యా రజ్జం తిసతం, వసుధం ఆవసిస్సతి;

పఞ్చసత్తతిక్ఖత్తుఞ్చ, చక్కవత్తీ భవిస్సతి.

౧౩౪. ‘‘‘దుజ్జయో నామ నామేన, హేస్సతి మనుజాధిపో;

అనుభోత్వాన తం పుఞ్ఞం, సకకమ్మం అపస్సితో [సకకమ్మూపసంహితో (స్యా.)].

౧౩౫. ‘‘‘వినిపాతం అగన్త్వాన, మనుస్సత్తం గమిస్సతి;

హిరఞ్ఞం తస్స [హిరఞ్ఞస్స చ (సీ. క.)] నిచితం, కోటిసతమనప్పకం.

౧౩౬. ‘‘‘నిబ్బత్తిస్సతి యోనిమ్హి, బ్రాహ్మణే సో భవిస్సతి;

వఙ్గన్తస్స సుతో ధీమా, సారియా ఓరసో పియో.

౧౩౭. ‘‘‘సో చ పచ్ఛా పబ్బజిత్వా, అఙ్గీరసస్స సాసనే;

చూళచున్దోతి [చూలచున్దోతి (సీ.)] నామేన, హేస్సతి సత్థు సావకో.

౧౩౮. ‘‘‘సామణేరోవ సో సన్తో, ఖీణాసవో భవిస్సతి;

సబ్బాసవే పరిఞ్ఞాయ, నిబ్బాయిస్సతినాసవో’.

౧౩౯. ‘‘ఉపట్ఠహిం మహావీరం, అఞ్ఞే చ పేసలే బహూ;

భాతరం మే చుపట్ఠాసిం, ఉత్తమత్థస్స పత్తియా.

౧౪౦. ‘‘భాతరం మే ఉపట్ఠిత్వా, ధాతుం పత్తమ్హి ఓహియ [ఓపియ (సీ.), ఓచియ (స్యా.)];

సమ్బుద్ధం ఉపనామేసిం, లోకజేట్ఠం నరాసభం.

౧౪౧. ‘‘ఉభో హత్థేహి పగ్గయ్హ, బుద్ధో లోకే సదేవకే;

సన్దస్సయన్తో తం ధాతుం, కిత్తయి అగ్గసావకం.

౧౪౨. ‘‘చిత్తఞ్చ సువిముత్తం మే, సద్ధా మయ్హం పతిట్ఠితా;

సబ్బాసవే పరిఞ్ఞాయ, విహరామి అనాసవో.

౧౪౩. ‘‘పటిసమ్భిదానుప్పత్తా, విమోక్ఖాపి చ ఫస్సితా [పటిసమ్భిదా చతస్సో, విమోక్ఖాపి చ అట్ఠిమే (స్యా.)];

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా చున్దో థేరో ఇమా గాథాయో అభాసిత్థాతి.

చున్దత్థేరస్సాపదానం దసమం.

ఉపాలివగ్గో పఞ్చమో.