౮. చఙ్కమనదాయకత్థేరఅపదానం

౯౩. ‘‘అత్థదస్సిస్స మునినో, లోకజేట్ఠస్స తాదినో;

ఇట్ఠకాహి చినిత్వాన, చఙ్కమం కారయిం అహం.

౯౪. ‘‘ఉచ్చతో పఞ్చరతనం, చఙ్కమం సాధుమాపితం;

ఆయామతో హత్థసతం, భావనీయ్యం మనోరమం.

౯౫. ‘‘పటిగ్గహేసి భగవా, అత్థదస్సీ నరుత్తమో;

హత్థేన పులినం గయ్హ, ఇమా గాథా అభాసథ.

౯౬. ‘‘‘ఇమినా పులినదానేన, చఙ్కమం సుకతేన చ;

సత్తరతనసమ్పన్నం, పులినం అనుభోస్సతి.

౯౭. ‘‘‘తీణి కప్పాని దేవేసు, దేవరజ్జం కరిస్సతి;

అనుభోస్సతి సమ్పత్తిం, అచ్ఛరాహి పురక్ఖతో.

౯౮. ‘‘‘మనుస్సలోకమాగన్త్వా, రాజా రట్ఠే భవిస్సతి;

తిక్ఖత్తుం చక్కవత్తీ చ, మహియా సో భవిస్సతి’.

౯౯. ‘‘అట్ఠారసే కప్పసతే, యం కమ్మమకరిం తదా;

దుగ్గతిం నాభిజానామి, చఙ్కమస్స ఇదం ఫలం.

౧౦౦. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా చఙ్కమనదాయకో థేరో ఇమా గాథాయో అభాసిత్థాతి.

చఙ్కమనదాయకత్థేరస్సాపదానం అట్ఠమం.