౩. కాళిగోధాపుత్తభద్దియత్థేరఅపదానం

౫౪. ‘‘పదుముత్తరసమ్బుద్ధం, మేత్తచిత్తం మహామునిం;

ఉపేతి జనతా సబ్బా, సబ్బలోకగ్గనాయకం.

౫౫. ‘‘సత్తుకఞ్చ బద్ధకఞ్చ [వత్థం సేనాసనఞ్చేవ (సీ.), సత్తుకఞ్చ పదకఞ్చ (సీ. అట్ఠ.), సత్తుకఞ్చ పవాకఞ్చ (స్యా.)], ఆమిసం పానభోజనం;

దదన్తి సత్థునో సబ్బే, పుఞ్ఞక్ఖేత్తే అనుత్తరే.

౫౬. ‘‘అహమ్పి దానం దస్సామి, దేవదేవస్స తాదినో;

బుద్ధసేట్ఠం నిమన్తేత్వా, సఙ్ఘమ్పి చ అనుత్తరం.

౫౭. ‘‘ఉయ్యోజితా మయా చేతే, నిమన్తేసుం తథాగతం;

కేవలం భిక్ఖుసఙ్ఘఞ్చ, పుఞ్ఞక్ఖేత్తం అనుత్తరం.

౫౮. ‘‘సతసహస్సపల్లఙ్కం, సోవణ్ణం గోనకత్థతం;

తూలికాపటలికాయ, ఖోమకప్పాసికేహి చ;

మహారహం పఞ్ఞాపయిం, ఆసనం బుద్ధయుత్తకం.

౫౯. ‘‘పదుముత్తరో లోకవిదూ, దేవదేవో నరాసభో;

భిక్ఖుసఙ్ఘపరిబ్యూళ్హో, మమ ద్వారముపాగమి.

౬౦. ‘‘పచ్చుగ్గన్త్వాన సమ్బుద్ధం, లోకనాథం యసస్సినం;

పసన్నచిత్తో సుమనో, అభినామయిం సఙ్ఘరం [సకం ఘరం (సీ.)].

౬౧. ‘‘భిక్ఖూనం సతసహస్సం, బుద్ధఞ్చ లోకనాయకం;

పసన్నచిత్తో సుమనో, పరమన్నేన తప్పయిం.

౬౨. ‘‘పదుముత్తరో లోకవిదూ, ఆహుతీనం పటిగ్గహో;

భిక్ఖుసఙ్ఘే నిసీదిత్వా, ఇమా గాథా అభాసథ.

౬౩. ‘‘‘యేనిదం ఆసనం దిన్నం, సోవణ్ణం గోనకత్థతం;

తమహం కిత్తయిస్సామి, సుణాథ మమ భాసతో.

౬౪. ‘‘‘చతుసత్తతిక్ఖత్తుం సో, దేవరజ్జం కరిస్సతి;

అనుభోస్సతి సమ్పత్తిం, అచ్ఛరాహి పురక్ఖతో.

౬౫. ‘‘‘పదేసరజ్జం సహస్సం, వసుధం ఆవసిస్సతి;

ఏకపఞ్ఞాసక్ఖత్తుఞ్చ, చక్కవత్తీ భవిస్సతి.

౬౬. ‘‘‘సబ్బాసు భవయోనీసు, ఉచ్చాకులీ [ఉచ్చాకులే (క.)] భవిస్సతి;

సో చ పచ్ఛా పబ్బజిత్వా, సుక్కమూలేన చోదితో;

భద్దియో నామ నామేన, హేస్సతి సత్థు సావకో.

౬౭. ‘‘‘వివేకమనుయుత్తోమ్హి, పన్తసేననివాసహం;

ఫలఞ్చాధిగతం సబ్బం, చత్తక్లేసోమ్హి అజ్జహం.

౬౮. ‘‘‘మమ సబ్బం [కమ్మం (?)] అభిఞ్ఞాయ, సబ్బఞ్ఞూ లోకనాయకో;

భిక్ఖుసఙ్ఘే నిసీదిత్వా, ఏతదగ్గే ఠపేసి మం’.

౬౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా భద్దియో కాళిగోధాయ పుత్తో థేరో ఇమా గాథాయో అభాసిత్థాతి.

భద్దియస్స కాళిగోధాయ పుత్తత్థేరస్సాపదానం తతియం.