౪. సన్నిట్ఠాపకత్థేరఅపదానం

౭౦. ‘‘అరఞ్ఞే కుటికం కత్వా, వసామి పబ్బతన్తరే;

లాభాలాభేన సన్తుట్ఠో, యసేన అయసేన చ.

౭౧. ‘‘పదుముత్తరో లోకవిదూ, ఆహుతీనం పటిగ్గహో;

వసీసతసహస్సేహి [భిక్ఖుసతసహస్సేహి (స్యా.)], ఆగచ్ఛి మమ సన్తికం.

౭౨. ‘‘ఉపాగతం మహానాగం [మహావీరం (సీ.)], జలజుత్తమనామకం;

తిణసన్థరం [తిణత్థరం (క.)] పఞ్ఞాపేత్వా, అదాసిం సత్థునో అహం.

౭౩. ‘‘పసన్నచిత్తో సుమనో, ఆమణ్డం పానీయఞ్చహం;

అదాసిం ఉజుభూతస్స, విప్పసన్నేన చేతసా.

౭౪. ‘‘సతసహస్సితో కప్పే [సతసహస్సే ఇతో కప్పే (సీ.)], యం దానమదదిం తదా;

దుగ్గతిం నాభిజానామి, ఆమణ్డస్స ఇదం ఫలం.

౭౫. ‘‘ఏకతాలీసకప్పమ్హి, ఏకో ఆసిం అరిన్దమో;

సత్తరతనసమ్పన్నో, చక్కవత్తీ మహబ్బలో.

౭౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సన్నిట్ఠాపకో [సన్నిధాపకో (సీ.)] థేరో ఇమా గాథాయో అభాసిత్థాతి.

సన్నిట్ఠాపకత్థేరస్సాపదానం చతుత్థం.