౨. సోణకోళివిసత్థేరఅపదానం

౨౫. ‘‘అనోమదస్సిస్స మునినో, లోకజేట్ఠస్స తాదినో;

సుధాయ లేపనం కత్వా, చఙ్కమం కారయిం అహం.

౨౬. ‘‘నానావణేహి పుప్ఫేహి, చఙ్కమం సన్థరిం అహం;

ఆకాసే వితానం కత్వా, భోజయిం బుద్ధముత్తమం.

౨౭. ‘‘అఞ్జలిం పగ్గహేత్వాన, అభివాదేత్వాన సుబ్బతం [పుప్ఫకం (క.)];

దీఘసాలం భగవతో, నియ్యాదేసిమహం తదా.

౨౮. ‘‘మమ సఙ్కప్పమఞ్ఞాయ, సత్థా లోకే అనుత్తరో;

పటిగ్గహేసి భగవా, అనుకమ్పాయ చక్ఖుమా.

౨౯. ‘‘పటిగ్గహేత్వాన సమ్బుద్ధో, దక్ఖిణేయ్యో సదేవకే;

భిక్ఖుసఙ్ఘే నిసీదిత్వా, ఇమా గాథా అభాసథ.

౩౦. ‘‘‘యో సో హట్ఠేన చిత్తేన, దీఘసాలం అదాసి [అకాసి (సీ.)] మే;

తమహం కిత్తయిస్సామి, సుణాథ మమ భాసతో.

౩౧. ‘‘‘ఇమస్స మచ్చుకాలమ్హి, పుఞ్ఞకమ్మసమఙ్గినో;

సహస్సయుత్తస్సరథో, ఉపట్ఠిస్సతి తావదే.

౩౨. ‘‘‘తేన యానేనయం పోసో, దేవలోకం గమిస్సతి;

అనుమోదిస్సరే దేవా, సమ్పత్తే కుసలబ్భవే [కుసలే భవే (సీ. స్యా.)].

౩౩. ‘‘‘మహారహం బ్యమ్హం సేట్ఠం, రతనమత్తికలేపనం;

కూటాగారవరూపేతం, బ్యమ్హం అజ్ఝావసిస్సతి.

౩౪. ‘‘‘తింసకప్పసహస్సాని, దేవలోకే రమిస్సతి;

పఞ్చవీసతి కప్పాని, దేవరాజా భవిస్సతి.

౩౫. ‘‘‘సత్తసత్తతిక్ఖత్తుఞ్చ, చక్కవత్తీ భవిస్సతి;

యసోధరసనామా [యసేధరా సమానా (సీ.)] తే, సబ్బేపి ఏకనామకా.

౩౬. ‘‘‘ద్వే సమ్పత్తీ అనుభోత్వా, వడ్ఢేత్వా [చినిత్వా (స్యా.)] పుఞ్ఞసఞ్చయం;

అట్ఠవీసతికప్పమ్హి, చక్కవత్తీ భవిస్సతి.

౩౭. ‘‘‘తత్రాపి బ్యమ్హం పవరం, విస్సకమ్మేన మాపితం;

దససద్దావివిత్తం తం, పురమజ్ఝావసిస్సతి.

౩౮. ‘‘‘అపరిమేయ్యే ఇతో కప్పే, భూమిపాలో మహిద్ధికో;

ఓక్కాకో నామ నామేన, రాజా రట్ఠే భవిస్సతి.

౩౯. ‘‘‘సోళసిత్థిసహస్సానం, సబ్బాసం పవరా చ సా [పవరావ యా (స్యా.), పవరా పియా (?)];

అభిజాతా ఖత్తియానీ, నవ పుత్తే జనేస్సతి.

౪౦. ‘‘‘నవ పుత్తే జనేత్వాన, ఖత్తియానీ మరిస్సతి;

తరుణీ చ పియా కఞ్ఞా, మహేసిత్తం కరిస్సతి.

౪౧. ‘‘‘ఓక్కాకం తోసయిత్వాన, వరం కఞ్ఞా లభిస్సతి;

వరం లద్ధాన సా కఞ్ఞా, పుత్తే పబ్బాజయిస్సతి.

౪౨. ‘‘‘పబ్బాజితా చ తే సబ్బే, గమిస్సన్తి నగుత్తమం;

జాతిభేదభయా సబ్బే, భగినీహి వసిస్సరే [సంవసిస్సరే (సీ.)].

౪౩. ‘‘‘ఏకా చ కఞ్ఞా బ్యాధీహి, భవిస్సతి పరిక్ఖతా [పురక్ఖతా (స్యా. క.)];

మా నో జాతి పభిజ్జీతి, నిఖణిస్సన్తి ఖత్తియా.

౪౪. ‘‘‘ఖత్తియో నీహరిత్వాన, తాయ సద్ధిం వసిస్సతి;

భవిస్సతి తదా భేదో, ఓక్కాకకులసమ్భవో.

౪౫. ‘‘‘తేసం పజా భవిస్సన్తి, కోళియా నామ జాతియా;

తత్థ మానుసకం భోగం, అనుభోస్సతినప్పకం.

౪౬. ‘‘‘తమ్హా కాయా చవిత్వాన, దేవలోకం గమిస్సతి;

తత్రాపి పవరం బ్యమ్హం, లభిస్సతి మనోరమం.

౪౭. ‘‘‘దేవలోకా చవిత్వాన, సుక్కమూలేన చోదితో;

ఆగన్త్వాన మనుస్సత్తం, సోణో నామ భవిస్సతి.

౪౮. ‘‘‘ఆరద్ధవీరియో పహితత్తో, పదహం సత్థు సాసనే;

సబ్బాసవే పరిఞ్ఞాయ, నిబ్బాయిస్సతినాసవో.

౪౯. ‘‘‘అనన్తదస్సీ భగవా, గోతమో సక్యపుఙ్గవో;

విసేసఞ్ఞూ మహావీరో, అగ్గట్ఠానే ఠపేస్సతి’.

౫౦. ‘‘వుట్ఠమ్హి దేవే చతురఙ్గులమ్హి, తిణే అనిలేరితఅఙ్గణమ్హి;

ఠత్వాన యోగస్స పయుత్తతాదినో, తతోత్తరిం పారమతా న విజ్జతి.

౫౧. ‘‘ఉత్తమే దమథే దన్తో, చిత్తం మే సుపణీహితం;

భారో మే ఓహితో సబ్బో, నిబ్బుతోమ్హి అనాసవో.

౫౨. ‘‘అఙ్గీరసో మహానాగో, అభిజాతోవ కేసరీ;

భిక్ఖుసఙ్ఘే నిసీదిత్వా, ఏతదగ్గే ఠపేసి మం.

౫౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా సోణో కోళివిసో [కోళియవేస్సో (సీ. స్యా.), కోటికణ్ణో (క.)] థేరో ఇమా గాథాయో అభాసిత్థాతి.

సోణకోళివిసత్థేరస్సాపదానం దుతియం.