౧. భాగినేయ్యుపాలిత్థేరఅపదానం

౧. ‘‘ఖీణాసవసహస్సేహి, పరివుతో [పరేతో (క. అట్ఠ)] లోకనాయకో;

వివేకమనుయుత్తో సో, గచ్ఛతే పటిసల్లితుం.

౨. ‘‘అజినేన నివత్థోహం, తిదణ్డపరిధారకో;

భిక్ఖుసఙ్ఘపరిబ్యూళ్హం, అద్దసం లోకనాయకం.

౩. ‘‘ఏకంసం అజినం కత్వా, సిరే కత్వాన అఞ్జలిం;

సమ్బుద్ధం అభివాదేత్వా, సన్థవిం లోకనాయకం.

౪. ‘‘యథాణ్డజా చ సంసేదా, ఓపపాతీ జలాబుజా;

కాకాదిపక్ఖినో సబ్బే, అన్తలిక్ఖచరా సదా.

౫. ‘‘యే కేచి పాణభూతత్థి, సఞ్ఞినో వా అసఞ్ఞినో;

సబ్బే తే తవ ఞాణమ్హి, అన్తో హోన్తి సమోగధా.

౬. ‘‘గన్ధా చ పబ్బతేయ్యా యే, హిమవన్తనగుత్తమే;

సబ్బే తే తవ సీలమ్హి, కలాయపి న యుజ్జరే.

౭. ‘‘మోహన్ధకారపక్ఖన్దో, అయం లోకో సదేవకో;

తవ ఞాణమ్హి జోతన్తే, అన్ధకారా విధంసితా.

౮. ‘‘యథా అత్థఙ్గతే సూరియే, హోన్తి సత్తా తమోగతా;

ఏవం బుద్ధే అనుప్పన్నే, హోతి లోకో తమోగతో.

౯. ‘‘యథోదయన్తో ఆదిచ్చో, వినోదేతి తమం సదా;

తథేవ త్వం బుద్ధసేట్ఠ, విద్ధంసేసి తమం సదా.

౧౦. ‘‘పధానపహితత్తోసి, బుద్ధో లోకే సదేవకే;

తవ కమ్మాభిరద్ధేన, తోసేసి జనతం బహుం.

౧౧. ‘‘తం సబ్బం అనుమోదిత్వా, పదుముత్తరో మహాముని;

నభం అబ్భుగ్గమీ ధీరో, హంసరాజావ అమ్బరే.

౧౨. ‘‘అబ్భుగ్గన్త్వాన సమ్బుద్ధో, మహేసి పదుముత్తరో;

అన్తలిక్ఖే ఠితో సత్థా, ఇమా గాథా అభాసథ.

౧౩. ‘‘యేనిదం థవితం ఞాణం, ఓపమ్మేహి సమాయుతం;

తమహం కిత్తయిస్సామి, సుణాథ మమ భాసతో.

౧౪. ‘‘‘అట్ఠారసఞ్చ ఖత్తుం సో, దేవరాజా భవిస్సతి;

పథబ్యా రజ్జం తిసతం, వసుధం ఆవసిస్సతి.

౧౫. ‘‘‘పఞ్చవీసతిక్ఖత్తుఞ్చ, చక్కవత్తీ భవిస్సతి;

పదేసరజ్జం విపులం, గణనాతో అసఙ్ఖియం.

౧౬. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౧౭. ‘‘‘తుసితా హి చవిత్వాన, సుక్కమూలేన చోదితో;

హీనోవ జాతియా సన్తో, ఉపాలి నామ హేస్సతి.

౧౮. ‘‘‘సో పచ్ఛా పబ్బజిత్వాన, విరాజేత్వాన పాపకం;

సబ్బాసవే పరిఞ్ఞాయ, నిబ్బాయిస్సతినాసవో.

౧౯. ‘‘‘తుట్ఠో చ గోతమో బుద్ధో, సక్యపుత్తో మహాయసో;

వినయాధిగతం తస్స, ఏతదగ్గే ఠపేస్సతి’.

౨౦. ‘‘సద్ధాయాహం పబ్బజితో, కతకిచ్చో అనాసవో;

సబ్బాసవే పరిఞ్ఞాయ, విహరామి అనాసవో.

౨౧. ‘‘భగవా చానుకమ్పీ మం, వినయేహం విసారదో;

సకకమ్మాభిరద్ధో చ, విహరామి అనాసవో.

౨౨. ‘‘సంవుతో పాతిమోక్ఖమ్హి, ఇన్ద్రియేసు చ పఞ్చసు;

ధారేమి వినయం సబ్బం, కేవలం రతనాకరం [రతనగ్ఘరం (క.)].

౨౩. ‘‘మమఞ్చ గుణమఞ్ఞాయ, సత్థా లోకే అనుత్తరో;

భిక్ఖుసఙ్ఘే నిసీదిత్వా, ఏతదగ్గే ఠపేసి మం.

౨౪. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా ఉపాలిథేరో ఇమా గాథాయో అభాసిత్థాతి.

భాగినేయ్యుపాలిత్థేరస్సాపదానం పఠమం.