౮. తరణియత్థేరఅపదానం

౧౪౮. ‘‘అత్థదస్సీ తు భగవా, సయమ్భూ లోకనాయకో;

వినతా నదియా తీరం [తీరే (స్యా. పీ. క.)], ఉపాగచ్ఛి తథాగతో.

౧౪౯. ‘‘ఉదకా అభినిక్ఖమ్మ, కచ్ఛపో వారిగోచరో;

బుద్ధం తారేతుకామోహం, ఉపేసిం లోకనాయకం.

౧౫౦. ‘‘‘అభిరూహతు మం బుద్ధో, అత్థదస్సీ మహాముని;

అహం తం తారయిస్సామి, దుక్ఖస్సన్తకరో తువం’.

౧౫౧. ‘‘మమ సఙ్కప్పమఞ్ఞాయ, అత్థదస్సీ మహాయసో;

అభిరూహిత్వా మే పిట్ఠిం, అట్ఠాసి లోకనాయకో.

౧౫౨. ‘‘యతో సరామి అత్తానం, యతో పత్తోస్మి విఞ్ఞుతం;

సుఖం మే తాదిసం నత్థి, ఫుట్ఠే పాదతలే యథా.

౧౫౩. ‘‘ఉత్తరిత్వాన సమ్బుద్ధో, అత్థదస్సీ మహాయసో;

నదీతీరమ్హి ఠత్వాన, ఇమా గాథా అభాసథ.

౧౫౪. ‘‘‘యావతా వత్తతే చిత్తం, గఙ్గాసోతం తరామహం;

అయఞ్చ కచ్ఛపో రాజా, తారేసి మమ పఞ్ఞవా.

౧౫౫. ‘‘‘ఇమినా బుద్ధతరణేన, మేత్తచిత్తవతాయ చ;

అట్ఠారసే కప్పసతే, దేవలోకే రమిస్సతి.

౧౫౬. ‘‘‘దేవలోకా ఇధాగన్త్వా, సుక్కమూలేన చోదితో;

ఏకాసనే నిసీదిత్వా, కఙ్ఖాసోతం తరిస్సతి.

౧౫౭. ‘‘‘యథాపి భద్దకే ఖేత్తే, బీజం అప్పమ్పి రోపితం;

సమ్మాధారే పవచ్ఛన్తే, ఫలం తోసేతి కస్సకం [కస్సకే (స్యా.)].

౧౫౮. ‘‘‘తథేవిదం బుద్ధఖేత్తం, సమ్మాసమ్బుద్ధదేసితం;

సమ్మాధారే పవచ్ఛన్తే, ఫలం మం తోసయిస్సతి’.

౧౫౯. ‘‘పధానపహితత్తోమ్హి, ఉపసన్తో నిరూపధి;

సబ్బాసవే పరిఞ్ఞాయ, విహరామి అనాసవో.

౧౬౦. ‘‘అట్ఠారసే కప్పసతే, యం కమ్మమకరిం తదా;

దుగ్గతిం నాభిజానామి, తరణాయ ఇదం ఫలం.

౧౬౧. ‘‘కిలేసా ఝాపితా మయ్హం…పే… విహరామి అనాసవో.

౧౬౨. ‘‘స్వాగతం వత మే ఆసి…పే… కతం బుద్ధస్స సాసనం.

౧౬౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తరణియో థేరో ఇమా గాథాయో

అభాసిత్థాతి.

తరణియత్థేరస్సాపదానం అట్ఠమం.