౯. ధమ్మరుచియత్థేరఅపదానం

౧౬౪. ‘‘యదా దీపఙ్కరో బుద్ధో, సుమేధం బ్యాకరీ జినో;

‘అపరిమేయ్యే ఇతో కప్పే, అయం బుద్ధో భవిస్సతి.

౧౬౫. ‘‘‘ఇమస్స జనికా మాతా, మాయా నామ భవిస్సతి;

పితా సుద్ధోదనో నామ, అయం హేస్సతి గోతమో.

౧౬౬. ‘‘‘పధానం పదహిత్వాన, కత్వా దుక్కరకారికం;

అస్సత్థమూలే సమ్బుద్ధో, బుజ్ఝిస్సతి మహాయసో.

౧౬౭. ‘‘‘ఉపతిస్సో కోలితో చ, అగ్గా హేస్సన్తి సావకా;

ఆనన్దో నామ నామేన [ఆనన్దో నాముపట్ఠాకో (స్యా.)], ఉపట్ఠిస్సతిమం జినం.

౧౬౮. ‘‘‘ఖేమా ఉప్పలవణ్ణా చ, అగ్గా హేస్సన్తి సావికా;

చిత్తో ఆళవకో చేవ, అగ్గా హేస్సన్తుపాసకా.

౧౬౯. ‘‘‘ఖుజ్జుత్తరా నన్దమాతా, అగ్గా హేస్సన్తుపాసికా;

బోధి ఇమస్స వీరస్స, అస్సత్థోతి పవుచ్చతి’.

౧౭౦. ‘‘ఇదం సుత్వాన వచనం, అసమస్స మహేసినో;

ఆమోదితా నరమరూ, నమస్సన్తి కతఞ్జలీ.

౧౭౧. ‘‘తదాహం మాణవో ఆసిం, మేఘో నామ సుసిక్ఖితో;

సుత్వా బ్యాకరణం సేట్ఠం, సుమేధస్స మహామునే.

౧౭౨. ‘‘సంవిసట్ఠో భవిత్వాన, సుమేధే కరుణాసయే [కరుణాలయే (స్యా.)];

పబ్బజన్తఞ్చ తం వీరం, సహావ అనుపబ్బజిం.

౧౭౩. ‘‘సంవుతో పాతిమోక్ఖస్మిం, ఇన్ద్రియేసు చ పఞ్చసు;

సుద్ధాజీవో సతో వీరో, జినసాసనకారకో.

౧౭౪. ‘‘ఏవం విహరమానోహం, పాపమిత్తేన కేనచి;

నియోజితో అనాచారే, సుమగ్గా పరిధంసితో.

౧౭౫. ‘‘వితక్కవసికో హుత్వా, సాసనతో అపక్కమిం;

పచ్ఛా తేన కుమిత్తేన, పయుత్తో మాతుఘాతనం.

౧౭౬. ‘‘అకరిం ఆనన్తరియం [అకరిం నన్తరియఞ్చ (స్యా. క.)], ఘాతయిం దుట్ఠమానసో;

తతో చుతో మహావీచిం, ఉపపన్నో సుదారుణం.

౧౭౭. ‘‘వినిపాతగతో సన్తో, సంసరిం దుక్ఖితో చిరం;

న పునో అద్దసం వీరం, సుమేధం నరపుఙ్గవం.

౧౭౮. ‘‘అస్మిం కప్పే సముద్దమ్హి, మచ్ఛో ఆసిం తిమిఙ్గలో;

దిస్వాహం సాగరే నావం, గోచరత్థముపాగమిం.

౧౭౯. ‘‘దిస్వా మం వాణిజా భీతా, బుద్ధసేట్ఠమనుస్సరుం;

గోతమోతి మహాఘోసం, సుత్వా తేహి ఉదీరితం.

౧౮౦. ‘‘పుబ్బసఞ్ఞం సరిత్వాన, తతో కాలఙ్కతో అహం;

సావత్థియం కులే ఇద్ధే, జాతో బ్రాహ్మణజాతియం.

౧౮౧. ‘‘ఆసిం ధమ్మరుచి నామ, సబ్బపాపజిగుచ్ఛకో;

దిస్వాహం లోకపజ్జోతం, జాతియా సత్తవస్సికో.

౧౮౨. ‘‘మహాజేతవనం గన్త్వా, పబ్బజిం అనగారియం;

ఉపేమి బుద్ధం తిక్ఖత్తుం, రత్తియా దివసస్స చ.

౧౮౩. ‘‘తదా దిస్వా ముని ఆహ, చిరం ధమ్మరుచీతి మం;

తతోహం అవచం బుద్ధం, పుబ్బకమ్మపభావితం.

౧౮౪. ‘‘సుచిరం సతపుఞ్ఞలక్ఖణం, పతిపుబ్బేన విసుద్ధపచ్చయం;

అహమజ్జసుపేక్ఖనం వత, తవ పస్సామి నిరుపమం విగ్గహం [నిరూపమగ్గహం (సీ.)].

౧౮౫. ‘‘సుచిరం విహతత్తమో మయా, సుచిరక్ఖేన నదీ విసోసితా;

సుచిరం అమలం విసోధితం, నయనం ఞాణమయం మహామునే.

౧౮౬. ‘‘చిరకాలసమఙ్గితో [చిరకాలం సమాగతో (పీ.)] తయా, అవినట్ఠో పునరన్తరం చిరం;

పునరజ్జసమాగతో తయా, న హి నస్సన్తి కతాని గోతమ.

౧౮౭. ‘‘కిలేసా ఝాపితా మయ్హం…పే… విహరామి అనాసవో.

౧౮౮. ‘‘స్వాగతం వత మే ఆసి…పే… కతం బుద్ధస్స సాసనం.

౧౮౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ధమ్మరుచియో థేరో ఇమా గాథాయో

అభాసిత్థాతి.

ధమ్మరుచియత్థేరస్సాపదానం నవమం.