౭. పులినుప్పాదకత్థేరఅపదానం

౧౧౧. ‘‘పబ్బతే హిమవన్తమ్హి, దేవలో నామ తాపసో;

తత్థ మే చఙ్కమో ఆసి, అమనుస్సేహి మాపితో.

౧౧౨. ‘‘జటాభారేన [జటాభారస్స (స్యా. క.)] భరితో, కమణ్డలుధరో సదా;

ఉత్తమత్థం గవేసన్తో, విపినా నిక్ఖమిం తదా.

౧౧౩. ‘‘చుల్లాసీతిసహస్సాని, సిస్సా మయ్హం ఉపట్ఠహుం;

సకకమ్మాభిపసుతా, వసన్తి విపినే తదా.

౧౧౪. ‘‘అస్సమా అభినిక్ఖమ్మ, అకం పులినచేతియం;

నానాపుప్ఫం సమానేత్వా, తం చేతియమపూజయిం.

౧౧౫. ‘‘తత్థ చిత్తం పసాదేత్వా, అస్సమం పవిసామహం;

సబ్బే సిస్సా సమాగన్త్వా, ఏతమత్థం పుచ్ఛింసు మం [ఏతమత్థమపుచ్ఛు మం (సీ.), ఏతమత్తం అపుచ్ఛింసు (స్యా. క.)].

౧౧౬. ‘‘‘పులినేన కతో థూపో [కతో థూపే (సీ.)], యం త్వం దేవ [దేవం (సీ. పీ.)] మస్సతి;

మయమ్పి ఞాతుమిచ్ఛామ, పుట్ఠో ఆచిక్ఖ నో తువం’.

౧౧౭. ‘‘‘నిద్దిట్ఠా ను [నిద్దిట్ఠా నో (సీ. పీ.), దిట్ఠానో వో (స్యా.)] మన్తపదే, చక్ఖుమన్తో మహాయసా;

తే ఖో అహం నమస్సామి, బుద్ధసేట్ఠే మహాయసే’.

౧౧౮. ‘‘‘కీదిసా తే మహావీరా, సబ్బఞ్ఞూ లోకనాయకా;

కథంవణ్ణా కథంసీలా, కీదిసా తే మహాయసా’.

౧౧౯. ‘‘‘బాత్తింసలక్ఖణా బుద్ధా, చత్తాలీసదిజాపి చ;

నేత్తా గోపఖుమా తేసం, జిఞ్జుకా ఫలసన్నిభా.

౧౨౦. ‘‘‘గచ్ఛమానా చ తే బుద్ధా, యుగమత్తఞ్చ పేక్ఖరే;

న తేసం జాణు నదతి, సన్ధిసద్దో న సుయ్యతి.

౧౨౧. ‘‘‘గచ్ఛమానా చ సుగతా, ఉద్ధరన్తావ గచ్ఛరే;

పఠమం దక్ఖిణం పాదం, బుద్ధానం ఏస ధమ్మతా.

౧౨౨. ‘‘‘అసమ్భీతా చ తే బుద్ధా, మిగరాజావ కేసరీ;

నేవుక్కంసేన్తి అత్తానం, నో చ వమ్భేన్తి పాణినం.

౧౨౩. ‘‘‘మానావమానతో ముత్తా, సమా సబ్బేసు పాణిసు;

అనత్తుక్కంసకా బుద్ధా, బుద్ధానం ఏస ధమ్మతా.

౧౨౪. ‘‘‘ఉప్పజ్జన్తా చ సమ్బుద్ధా, ఆలోకం దస్సయన్తి తే;

ఛప్పకారం పకమ్పేన్తి, కేవలం వసుధం ఇమం.

౧౨౫. ‘‘‘పస్సన్తి నిరయఞ్చేతే, నిబ్బాతి నిరయో తదా;

పవస్సతి మహామేఘో, బుద్ధానం ఏస ధమ్మతా.

౧౨౬. ‘‘‘ఈదిసా తే మహానాగా, అతులా చ [తే (స్యా. క.)] మహాయసా;

వణ్ణతో అనతిక్కన్తా, అప్పమేయ్యా తథాగతా’.

౧౨౭. ‘‘‘అనుమోదింసు మే వాక్యం, సబ్బే సిస్సా సగారవా;

తథా చ పటిపజ్జింసు, యథాసత్తి యథాబలం’.

౧౨౮. ‘‘పటిపూజేన్తి పులినం, సకకమ్మాభిలాసినో;

సద్దహన్తా మమ వాక్యం, బుద్ధసక్కతమానసా [బుద్ధత్తగతమానసా (సీ. స్యా. పీ.)].

౧౨౯. ‘‘తదా చవిత్వా తుసితా, దేవపుత్తో మహాయసో;

ఉప్పజ్జి మాతుకుచ్ఛిమ్హి, దససహస్సి కమ్పథ.

౧౩౦. ‘‘అస్సమస్సావిదూరమ్హి, చఙ్కమమ్హి ఠితో అహం;

సబ్బే సిస్సా సమాగన్త్వా, ఆగచ్ఛుం మమ సన్తికే.

౧౩౧. ‘‘ఉసభోవ మహీ నదతి, మిగరాజావ కూజతి;

సుసుమారోవ [సుంసుమారోవ (సీ. స్యా. పీ.)] సళతి, కిం విపాకో భవిస్సతి.

౧౩౨. ‘‘యం పకిత్తేమి సమ్బుద్ధం, సికతాథూపసన్తికే;

సో దాని భగవా సత్థా, మాతుకుచ్ఛిముపాగమి.

౧౩౩. ‘‘తేసం ధమ్మకథం వత్వా, కిత్తయిత్వా మహామునిం;

ఉయ్యోజేత్వా సకే సిస్సే, పల్లఙ్కమాభుజిం అహం.

౧౩౪. ‘‘బలఞ్చ వత మే ఖీణం, బ్యాధినా [బ్యాధితో (సీ. స్యా. పీ. క.)] పరమేన తం;

బుద్ధసేట్ఠం సరిత్వాన, తత్థ కాలఙ్కతో [కాలకతో (సీ. పీ.)] అహం.

౧౩౫. ‘‘సబ్బే సిస్సా సమాగన్త్వా, అకంసు చితకం తదా;

కళేవరఞ్చ మే గయ్హ, చితకం అభిరోపయుం.

౧౩౬. ‘‘చితకం పరివారేత్వా, సీసే కత్వాన అఞ్జలిం;

సోకసల్లపరేతా తే, విక్కన్దింసు సమాగతా.

౧౩౭. ‘‘తేసం లాలప్పమానానం, అగమం చితకం తదా;

‘అహం ఆచరియో తుమ్హం, మా సోచిత్థ సుమేధసా.

౧౩౮. ‘‘‘సదత్థే వాయమేయ్యాథ, రత్తిన్దివమతన్దితా;

మా వో పమత్తా అహుత్థ [అహువత్థ (సీ.)], ఖణో వో పటిపాదితో’.

౧౩౯. ‘‘సకే సిస్సేనుసాసిత్వా, దేవలోకం పునాగమిం;

అట్ఠారస చ కప్పాని, దేవలోకే రమామహం.

౧౪౦. ‘‘సతానం పఞ్చక్ఖత్తుఞ్చ, చక్కవత్తీ అహోసహం;

అనేకసతక్ఖత్తుఞ్చ, దేవరజ్జమకారయిం.

౧౪౧. ‘‘అవసేసేసు కప్పేసు, వోకిణ్ణో [వోకిణ్ణం (సీ. స్యా. క.)] సంసరిం అహం;

దుగ్గతిం నాభిజానామి, ఉప్పాదస్స ఇదం ఫలం [పులినపూజాయిదం ఫలం (సీ.)].

౧౪౨. ‘‘యథా కోముదికే మాసే, బహూ పుప్ఫన్తి పాదపా;

తథేవాహమ్పి సమయే, పుప్ఫితోమ్హి మహేసినా.

౧౪౩. ‘‘వీరియం మే ధురధోరయ్హం, యోగక్ఖేమాధివాహనం;

నాగోవ బన్ధనం ఛేత్వా, విహరామి అనాసవో.

౧౪౪. ‘‘సతసహస్సితో కప్పే, యం బుద్ధమభికిత్తయిం;

దుగ్గతిం నాభిజానామి, కిత్తనాయ ఇదం ఫలం.

౧౪౫. ‘‘కిలేసా ఝాపితా మయ్హం…పే… విహరామి అనాసవో.

౧౪౬. ‘‘స్వాగతం వత మే ఆసి…పే… కతం బుద్ధస్స సాసనం.

౧౪౭. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పులినుప్పాదకో థేరో ఇమా గాథాయో

అభాసిత్థాతి.

పులినుప్పాదకత్థేరస్సాపదానం సత్తమం.