౩. భిసదాయకత్థేరఅపదానం

౨౭. ‘‘ఓగయ్హ యం [ఓగయ్హాహం (సీ. స్యా. పీ.)] పోక్ఖరణిం, నానాకుఞ్జరసేవితం;

ఉద్ధరామి భిసం తత్థ, ఘాసహేతు [అసనహేతు (స్యా.)] అహం తదా.

౨౮. ‘‘భగవా తమ్హి సమయే, పదుముత్తరసవ్హయో;

రత్తమ్బరధరో [రత్తకమ్బలధరో (స్యా.)] బుద్ధో, గచ్ఛతి అనిలఞ్జసే.

౨౯. ‘‘ధునన్తో పంసుకూలాని, సద్దమస్సోసహం తదా;

ఉద్ధం నిజ్ఝాయమానోహం, అద్దసం లోకనాయకం.

౩౦. ‘‘తత్థేవ ఠితకో సన్తో, ఆయాచిం లోకనాయకం;

మధుం భిసేహి సవతి, ఖీరం సప్పిం ముళాలిభి.

౩౧. ‘‘పటిగ్గణ్హాతు మే బుద్ధో, అనుకమ్పాయ చక్ఖుమా;

తతో కారుణికో సత్థా, ఓరుహిత్వా మహాయసో.

౩౨. ‘‘పటిగ్గణ్హి మమం భిక్ఖం, అనుకమ్పాయ చక్ఖుమా;

పటిగ్గహేత్వా సమ్బుద్ధో, అకా మే అనుమోదనం.

౩౩. ‘‘‘సుఖీ హోతు [హోహి (సీ. స్యా. పీ. క.)] మహాపుఞ్ఞ, గతి తుయ్హం సమిజ్ఝతు;

ఇమినా భిసదానేన, లభస్సు విపులం సుఖం’.

౩౪. ‘‘ఇదం వత్వాన సమ్బుద్ధో, జలజుత్తమనామకో;

భిక్ఖమాదాయ సమ్బుద్ధో, అమ్బరేనాగమా జినో.

౩౫. ‘‘తతో భిసం గహేత్వాన, ఆగచ్ఛిం మమ అస్సమం;

భిసం రుక్ఖే లగేత్వాన [లగ్గిత్వాన (స్యా. క.)], మమ దానమనుస్సరిం.

౩౬. ‘‘మహావాతో వుట్ఠహిత్వా, సఞ్చాలేసి వనం తదా;

ఆకాసో అభినాదిత్థ, అసనియా ఫలన్తియా.

౩౭. ‘‘తతో మే అసనిపాతో, మత్థకే నిపతీ తదా;

సోహం నిసిన్నకో సన్తో, తత్థ కాలఙ్కతో అహుం.

౩౮. ‘‘పుఞ్ఞకమ్మేన సంయుత్తో, తుసితం ఉపపజ్జహం;

కళేవరం మే పతితం, దేవలోకే రమిం అహం.

౩౯. ‘‘ఛళసీతిసహస్సాని, నారియో సమలఙ్కతా;

సాయపాతం [సాయం పాతం (స్యా. క.)] ఉపట్ఠన్తి, భిసదానస్సిదం ఫలం.

౪౦. ‘‘మనుస్సయోనిమాగన్త్వా, సుఖితో హోమహం సదా;

భోగే మే ఊనతా నత్థి, భిసదానస్సిదం ఫలం.

౪౧. ‘‘అనుకమ్పితకో తేన, దేవదేవేన తాదినా;

సబ్బాసవా పరిక్ఖీణా, నత్థి దాని పునబ్భవో.

౪౨. ‘‘సతసహస్సితో కప్పే, యం భిసం [భిక్ఖం (సబ్బత్థ)] అదదిం తదా;

దుగ్గతిం నాభిజానామి, భిసదానస్సిదం ఫలం.

౪౩. ‘‘కిలేసా ఝాపితా మయ్హం…పే… విహరామి అనాసవో.

౪౪. ‘‘స్వాగతం వత మే ఆసి…పే… కతం బుద్ధస్స సాసనం.

౪౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా భిసదాయకో థేరో ఇమా గాథాయో

అభాసిత్థాతి.

భిసదాయకత్థేరస్సాపదానం తతియం.