౨. బుద్ధసఞ్ఞకత్థేరఅపదానం

౯. ‘‘అజ్ఝాయకో మన్తధరో, తిణ్ణం వేదాన పారగూ;

లక్ఖణే ఇతిహాసే చ, సనిఘణ్డుసకేటుభే.

౧౦. ‘‘నదీసోతపటిభాగా, సిస్సా ఆయన్తి మే తదా;

తేసాహం మన్తే [మన్తం (స్యా. క.)] వాచేమి, రత్తిన్దివమతన్దితో.

౧౧. ‘‘సిద్ధత్థో నామ సమ్బుద్ధో, లోకే ఉప్పజ్జి తావదే;

తమన్ధకారం నాసేత్వా, ఞాణాలోకం పవత్తయి.

౧౨. ‘‘మమ అఞ్ఞతరో సిస్సో, సిస్సానం సో కథేసి మే;

సుత్వాన తే ఏతమత్థం, ఆరోచేసుం మమం తదా.

౧౩. ‘‘బుద్ధో లోకే సముప్పన్నో, సబ్బఞ్ఞూ లోకనాయకో;

తస్సానువత్తతి జనో, లాభో అమ్హం న విజ్జతి [న హేస్సతి (సీ. పీ.)].

౧౪. ‘‘అధిచ్చుప్పత్తికా బుద్ధా, చక్ఖుమన్తో మహాయసా;

యంనూనాహం బుద్ధసేట్ఠం, పస్సేయ్యం లోకనాయకం.

౧౫. ‘‘అజినం మే గహేత్వాన, వాకచీరం కమణ్డలుం;

అస్సమా అభినిక్ఖమ్మ, సిస్సే ఆమన్తయిం అహం.

౧౬. ‘‘ఓదుమ్బరికపుప్ఫంవ, చన్దమ్హి ససకం యథా;

వాయసానం యథా ఖీరం, దుల్లభో లోకనాయకో [దుల్లభా లోకనాయకా (సీ.), దుల్లభం లోకనాయకం (స్యా. పీ. క.)].

౧౭. ‘‘బుద్ధో లోకమ్హి ఉప్పన్నో, మనుస్సత్తమ్పి దుల్లభం;

ఉభోసు విజ్జమానేసు, సవనఞ్చ సుదుల్లభం.

౧౮. ‘‘బుద్ధో లోకే సముప్పన్నో, చక్ఖుం లచ్ఛామ నో భవం;

ఏథ సబ్బే గమిస్సామ, సమ్మాసమ్బుద్ధసన్తికం.

౧౯. ‘‘కమణ్డలుధరా సబ్బే, ఖరాజిననివాసినో;

తే జటా భారభరితా, నిక్ఖముం విపినా తదా.

౨౦. ‘‘యుగమత్తం పేక్ఖమానా, ఉత్తమత్థం గవేసినో;

ఆసత్తిదోసరహితా, అసమ్భీతావ కేసరీ.

౨౧. ‘‘అప్పకిచ్చా అలోలుప్పా, నిపకా సన్తవుత్తినో;

ఉఞ్ఛాయ చరమానా తే, బుద్ధసేట్ఠముపాగముం.

౨౨. ‘‘దియడ్ఢయోజనే సేసే, బ్యాధి మే ఉపపజ్జథ;

బుద్ధసేట్ఠం సరిత్వాన, తత్థ కాలఙ్కతో అహం.

౨౩. ‘‘చతున్నవుతితో కప్పే, యం సఞ్ఞమలభిం తదా;

దుగ్గతిం నాభిజానామి, బుద్ధసఞ్ఞాయిదం ఫలం.

౨౪. ‘‘కిలేసా ఝాపితా మయ్హం…పే… విహరామి అనాసవో.

౨౫. ‘‘స్వాగతం వత మే ఆసి…పే… కతం బుద్ధస్స సాసనం.

౨౬. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా బుద్ధసఞ్ఞకో థేరో ఇమా గాథాయో

అభాసిత్థాతి.

బుద్ధసఞ్ఞకత్థేరస్సాపదానం దుతియం.