౧. పంసుకూలసఞ్ఞకత్థేరఅపదానం

౧. ‘‘తిస్సో నామాసి భగవా, సయమ్భూ అగ్గపుగ్గలో;

పంసుకూలం ఠపేత్వాన, విహారం పావిసీ జినో.

౨. ‘‘వినతం [సజ్జితం (స్యా.), తియన్తం (పీ.)] ధనుమాదాయ, భక్ఖత్థాయ చరిం అహం;

మణ్డలగ్గం గహేత్వాన, కాననం పావిసిం అహం.

౩. ‘‘తత్థద్దసం పంసుకూలం, దుమగ్గే లగ్గితం తదా;

చాపం తత్థేవ నిక్ఖిప్ప, సిరే కత్వాన అఞ్జలిం.

౪. ‘‘పసన్నచిత్తో సుమనో, విపులాయ చ పీతియా;

బుద్ధసేట్ఠం సరిత్వాన, పంసుకూలం అవన్దహం.

౫. ‘‘ద్వేనవుతే ఇతో కప్పే, పంసుకూలమవన్దహం;

దుగ్గతిం నాభిజానామి, వన్దనాయ ఇదం ఫలం.

౬. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౭. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౮. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా పంసుకూలసఞ్ఞకో థేరో ఇమా గాథాయో

అభాసిత్థాతి.

పంసుకూలసఞ్ఞకత్థేరస్సాపదానం పఠమం.