౭. ఉచ్ఛఙ్గపుప్ఫియత్థేరఅపదానం

౧౪౨. ‘‘నగరే బన్ధుమతియా, అహోసిం మాలికో తదా;

ఉచ్ఛఙ్గం పూరయిత్వాన, అగమం అన్తరాపణం.

౧౪౩. ‘‘భగవా తమ్హి సమయే, భిక్ఖుసఙ్ఘపురక్ఖతో;

మహతా ఆనుభావేన, నియ్యాతి లోకనాయకో.

౧౪౪. ‘‘దిస్వాన లోకపజ్జోతం, విపస్సిం లోకతారణం;

పుప్ఫం పగ్గయ్హ ఉచ్ఛఙ్గా, బుద్ధసేట్ఠం అపూజయిం.

౧౪౫. ‘‘ఏకనవుతితో కప్పే, యం పుప్ఫమభిపూజయిం;

దుగ్గతిం నాభిజానామి, బుద్ధపూజాయిదం ఫలం.

౧౪౬. ‘‘కిలేసా ఝాపితా మయ్హం…పే… విహరామి అనాసవో.

౧౪౭. ‘‘స్వాగతం వత మే ఆసి…పే… కతం బుద్ధస్స సాసనం.

౧౪౮. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఉచ్ఛఙ్గపుప్ఫియో థేరో ఇమా గాథాయో అభాసిత్థాతి.

ఉచ్ఛఙ్గపుప్ఫియత్థేరస్సాపదానం సత్తమం.