౮. యాగుదాయకత్థేరఅపదానం

౧౪౯. ‘‘అతిథిం [అతీతం (క.)] మే గహేత్వాన, అగచ్ఛిం గామకం తదా;

సమ్పుణ్ణనదికం దిస్వా, సఙ్ఘారామం ఉపాగమిం.

౧౫౦. ‘‘ఆరఞ్ఞకా ధుతధరా, ఝాయినో లూఖచీవరా;

వివేకాభిరతా ధీరా, సఙ్ఘారామే వసన్తి తే.

౧౫౧. ‘‘గతి తేసం ఉపచ్ఛిన్నా, సువిముత్తాన తాదినం;

పిణ్డాయ తే న గచ్ఛన్తి, ఓరుద్ధనదితాయ హి [ఓరుద్ధనదికాయతిం (స్యా.)].

౧౫౨. ‘‘పసన్నచిత్తో సుమనో, వేదజాతో కతఞ్జలీ;

తణ్డులం మే గహేత్వాన, యాగుదానం అదాసహం.

౧౫౩. ‘‘పఞ్చన్నం యాగుం దత్వాన, పసన్నో సేహి పాణిభి;

సకకమ్మాభిరద్ధోహం, తావతింసమగచ్ఛహం.

౧౫౪. ‘‘మణిమయఞ్చ మే బ్యమ్హం, నిబ్బత్తి తిదసే గణే;

నారీగణేహి సహితో, మోదామి బ్యమ్హముత్తమే.

౧౫౫. ‘‘తేత్తింసక్ఖత్తుం దేవిన్దో, దేవరజ్జమకారయిం;

తింసక్ఖత్తుం చక్కవత్తీ, మహారజ్జమకారయిం.

౧౫౬. ‘‘పదేసరజ్జం విపులం, గణనాతో అసఙ్ఖియం;

దేవలోకే మనుస్సే వా, అనుభోత్వా సయం [యసం (స్యా.)] అహం.

౧౫౭. ‘‘పచ్ఛిమే భవే సమ్పత్తే, పబ్బజిం అనగారియం;

సహ ఓరోపితే కేసే, సబ్బం సమ్పటివిజ్ఝహం.

౧౫౮. ‘‘ఖయతో వయతో చాపి, సమ్మసన్తో కళేవరం;

పురే సిక్ఖాపదాదానా, అరహత్తమపాపుణిం.

౧౫౯. ‘‘సుదిన్నం మే దానవరం, వాణిజ్జం సమ్పయోజితం;

తేనేవ యాగుదానేన, పత్తోమ్హి అచలం పదం.

౧౬౦. ‘‘సోకం పరిద్దవం బ్యాధిం, దరథం చిత్తతాపనం;

నాభిజానామి ఉప్పన్నం, యాగుదానస్సిదం ఫలం.

౧౬౧. ‘‘యాగుం సఙ్ఘస్స దత్వాన, పుఞ్ఞక్ఖేత్తే అనుత్తరే;

పఞ్చానిసంసే అనుభోమి, అహో యాగుసుయిట్ఠతా.

౧౬౨. ‘‘అబ్యాధితా రూపవతా, ఖిప్పం ధమ్మనిసన్తితా [నిబుజ్ఝితా (స్యా.)];

లాభితా అన్నపానస్స, ఆయు పఞ్చమకం మమ.

౧౬౩. ‘‘యో కోచి వేదం జనయం, సఙ్ఘే యాగుం దదేయ్య సో;

ఇమాని పఞ్చ ఠానాని, పటిగణ్హేయ్య పణ్డితో.

౧౬౪. ‘‘కరణీయం కతం సబ్బం, భవా ఉగ్ఘాటితా మయా;

సబ్బాసవా పరిక్ఖీణా, నత్థి దాని పునబ్భవో.

౧౬౫. ‘‘సో అహం విచరిస్సామి, గామా గామం పురా పురం;

నమస్సమానో సమ్బుద్ధం, ధమ్మస్స చ సుధమ్మతం.

౧౬౬. ‘‘తింసకప్పసహస్సమ్హి, యం దానమదదిం తదా;

దుగ్గతిం నాభిజానామి, యాగుదానస్సిదం ఫలం.

౧౬౭. ‘‘కిలేసా ఝాపితా మయ్హం…పే… విహరామి అనాసవో.

౧౬౮. ‘‘స్వాగతం వత మే ఆసి…పే… కతం బుద్ధస్స సాసనం.

౧౬౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా యాగుదాయకో థేరో ఇమా గాథాయో అభాసిత్థాతి.

యాగుదాయకత్థేరస్సాపదానం అట్ఠమం.