౬. ఏకదీపియత్థేరఅపదానం

౧౨౪. ‘‘పరినిబ్బుతే సుగతే, సిద్ధత్థే లోకనాయకే;

సదేవమానుసా సబ్బే, పూజేన్తి ద్విపదుత్తమం.

౧౨౫. ‘‘ఆరోపితే చ చితకే, సిద్ధత్థే లోకనాయకే;

యథాసకేన థామేన, చితం పూజేన్తి సత్థునో.

౧౨౬. ‘‘అవిదూరే చితకస్స, దీపం ఉజ్జాలయిం అహం;

యావ ఉదేతి సూరియో, దీపం మే తావ ఉజ్జలి.

౧౨౭. ‘‘తేన కమ్మేన సుకతేన, చేతనాపణిధీహి చ;

జహిత్వా మానుసం దేహం, తావతింసమగచ్ఛహం.

౧౨౮. ‘‘తత్థ మే సుకతం బ్యమ్హం, ఏకదీపీతి ఞాయతి;

దీపసతసహస్సాని, బ్యమ్హే పజ్జలరే మమ.

౧౨౯. ‘‘ఉదయన్తోవ సూరియో, దేహో మే జోతతే సదా;

సప్పభాహి సరీరస్స, ఆలోకో హోతి మే సదా.

౧౩౦. ‘‘తిరోకుట్టం [తిరోకుడ్డం (సీ. స్యా. క.)] తిరోసేలం, సమతిగ్గయ్హ [సబ్బత్థపి ఏవమేవ దిస్సతి] పబ్బతం;

సమన్తా యోజనసతం, పస్సామి చక్ఖునా అహం.

౧౩౧. ‘‘సత్తసత్తతిక్ఖత్తుఞ్చ, దేవలోకే రమిం అహం;

ఏకతింసతిక్ఖత్తుఞ్చ, దేవరజ్జమకారయిం.

౧౩౨. ‘‘అట్ఠవీసతిక్ఖత్తుఞ్చ, చక్కవత్తీ అహోసహం;

పదేసరజ్జం విపులం, గణనాతో అసఙ్ఖియం.

౧౩౩. ‘‘దేవలోకా చవిత్వాన, నిబ్బత్తిం మాతుకుచ్ఛియం;

మాతుకుచ్ఛిగతస్సాపి, అక్ఖి మే న నిమీలతి.

౧౩౪. ‘‘జాతియా చతువస్సోహం, పబ్బజిం అనగారియం;

అడ్ఢమాసే అసమ్పత్తే, అరహత్తమపాపుణిం.

౧౩౫. ‘‘దిబ్బచక్ఖుం విసోధేసిం, భవా సబ్బే సమూహతా;

సబ్బే కిలేసా సఞ్ఛిన్నా, ఏకదీపస్సిదం ఫలం.

౧౩౬. ‘‘తిరోకుట్టం తిరోసేలం, పబ్బతఞ్చాపి కేవలం;

సమతిక్కమ్మ [సబ్బత్థపీ ఏవమేవ దిస్సతి] పస్సామి, ఏకదీపస్సిదం ఫలం.

౧౩౭. ‘‘విసమా మే సమా హోన్తి, అన్ధకారో న విజ్జతి;

నాహం పస్సామి తిమిరం, ఏకదీపస్సిదం ఫలం.

౧౩౮. ‘‘చతున్నవుతితో కప్పే, యం దీపమదదిం తదా;

దుగ్గతిం నాభిజానామి, ఏకదీపస్సిదం ఫలం.

౧౩౯. ‘‘కిలేసా ఝాపితా మయ్హం…పే… విహరామి అనాసవో.

౧౪౦. ‘‘స్వాగతం వత మే ఆసి…పే… కతం బుద్ధస్స సాసనం.

౧౪౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ఏకదీపియో థేరో ఇమా గాథాయో అభాసిత్థాతి.

ఏకదీపియత్థేరస్సాపదానం ఛట్ఠం.