౫. నాగపల్లవత్థేరఅపదానం

౧౧౮. ‘‘నగరే బన్ధుమతియా, రాజుయ్యానే వసామహం;

మమ అస్సమసామన్తా, నిసీది లోకనాయకో.

౧౧౯. ‘‘నాగపల్లవమాదాయ, బుద్ధస్స అభిరోపయిం;

పసన్నచిత్తో సుమనో, సుగతం అభివాదయిం.

౧౨౦. ‘‘ఏకనవుతితో కప్పే, యం పల్లవమపూజయిం;

దుగ్గతిం నాభిజానామి, బుద్ధపూజాయిదం ఫలం.

౧౨౧. ‘‘కిలేసా ఝాపితా మయ్హం…పే… విహరామి అనాసవో.

౧౨౨. ‘‘స్వాగతం వత మే ఆసి…పే… కతం బుద్ధస్స సాసనం.

౧౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నాగపల్లవో థేరో ఇమా గాథాయో అభాసిత్థాతి.

నాగపల్లవత్థేరస్సాపదానం పఞ్చమం.