౨. ఏకఛత్తియత్థేరఅపదానం
౩౨. ‘‘చన్దభాగానదీతీరే, అస్సమో సుకతో మమ;
సుసుద్ధపులినాకిణ్ణో, పన్నసాలా సుమాపితా.
౩౩. ‘‘ఉత్తానకూలా నదికా, సుపతిత్థా మనోరమా;
మచ్ఛకచ్ఛపసమ్పన్నా [… సఞ్ఛన్నా (క.)], సుసుమారనిసేవితా.
౩౪. ‘‘అచ్ఛా దీపీ చ మయూరా, కరవీకా చ సాళికా;
కూజన్తి సబ్బదా ఏతే, సోభయన్తా మమస్సమం.
౩౫. ‘‘కోకిలా మఞ్జుభాణీ చ, హంసా చ మధురస్సరా;
అభికూజన్తి తే తత్థ, సోభయన్తా మమస్సమం.
౩౬. ‘‘సీహా బ్యగ్ఘా వరాహా చ, అచ్ఛ [వక (సీ. పీ.), బకా (స్యా.), వకా (క.)] కోకతరచ్ఛకా;
గిరిదుగ్గమ్హి నాదేన్తి, సోభయన్తా మమస్సమం.
౩౭. ‘‘ఏణీమిగా చ సరభా, భేరణ్డా సూకరా బహూ;
గిరిదుగ్గమ్హి నాదేన్తి, సోభయన్తా మమస్సమం.
౩౮. ‘‘ఉద్దాలకా చమ్పకా చ, పాటలీ సిన్దువారకా;
అతిముత్తా అసోకా చ, సోభయన్తి మమస్సమం [పుప్ఫన్తి మమ అస్సమే (సీ. పీ.)].
౩౯. ‘‘అఙ్కోలా యూథికా చేవ, సత్తలీ బిమ్బిజాలికా;
కణికారా చ పుప్ఫన్తి, సోభయన్తా మమస్సమం [కణికాకణికారా చ, పుప్ఫన్తి మమ అస్సమే (సీ. స్యా. పీ.)].
౪౦. ‘‘నాగా సాలా చ సళలా, పుణ్డరీకేత్థ పుప్ఫితా;
దిబ్బగన్ధం సమ్పవన్తా, సోభయన్తి మమస్సమం.
౪౧. ‘‘అజ్జునా అసనా చేత్థ, మహానామా చ పుప్ఫితా;
సాలా చ కఙ్గుపుప్ఫా చ, సోభయన్తి మమస్సమం.
౪౨. ‘‘అమ్బా జమ్బూ చ తిలకా, నిమ్బా చ సాలకల్యాణీ;
దిబ్బగన్ధం సమ్పవన్తా, సోభయన్తి మమస్సమం.
౪౩. ‘‘అసోకా చ కపిట్ఠా చ, గిరిమాలేత్థ [భగినిమాలేత్థ (సీ. పీ.), భగినిమాలా చ (స్యా.)] పుప్ఫితా;
దిబ్బగన్ధం సమ్పవన్తా, సోభయన్తి మమస్సమం.
౪౪. ‘‘కదమ్బా కదలీ చేవ, ఇసిముగ్గా చ రోపితా;
ధువం ఫలాని ధారేన్తి, సోభయన్తా మమస్సమం.
౪౫. ‘‘హరీతకా ఆమలకా, అమ్బజమ్బువిభీతకా;
కోలా భల్లాతకా బిల్లా, ఫలినో మమ అస్సమే.
౪౬. ‘‘అవిదూరే పోక్ఖరణీ, సుపతిత్థా మనోరమా;
మన్దాలకేహి సఞ్ఛన్నా, పదుముప్పలకేహి చ.
౪౭. ‘‘గబ్భం గణ్హన్తి పదుమా, అఞ్ఞే పుప్ఫన్తి కేసరీ;
ఓపత్తకణ్ణికా చేవ, పుప్ఫన్తి మమ అస్సమే.
౪౮. ‘‘పాఠీనా పావుసా మచ్ఛా, బలజా ముఞ్జరోహితా;
అచ్ఛోదకమ్హి విచరం, సోభయన్తి మమస్సమం.
౪౯. ‘‘నయితా అమ్బగన్ధీ చ, అనుకూలే చ కేతకా;
దిబ్బగన్ధం సమ్పవన్తా, సోభయన్తి మమస్సమం.
౫౦. ‘‘మధు భిసమ్హా సవతి, ఖీరసప్పి ముళాలిభి;
దిబ్బగన్ధం సమ్పవన్తా, సోభయన్తి మమస్సమం.
౫౧. ‘‘పులినా సోభనా తత్థ, ఆకిణ్ణా జలసేవితా;
ఓపుప్ఫా పుప్ఫితా సేన్తి, సోభయన్తా మమస్సమం.
౫౨. ‘‘జటాభారేన భరితా, అజినుత్తరవాసనా;
వాకచీరధరా సబ్బే, సోభయన్తి మమస్సమం.
౫౩. ‘‘యుగమత్తమపేక్ఖన్తా, నిపకా సన్తవుత్తినో;
కామభోగే అనపేక్ఖా, వసన్తి మమ అస్సమే.
౫౪. ‘‘పరూళ్హకచ్ఛనఖలోమా, పఙ్కదన్తా రజస్సిరా;
రజోజల్లధరా సబ్బే, వసన్తి మమ అస్సమే.
౫౫. ‘‘అభిఞ్ఞాపారమిప్పత్తా, అన్తలిక్ఖచరా చ తే;
ఉగ్గచ్ఛన్తా నభం ఏతే, సోభయన్తి మమస్సమం.
౫౬. ‘‘తేహి సిస్సేహి పరివుతో, వసామి విపినే తదా;
రత్తిన్దివం న జానామి, సదా ఝానసమప్పితో.
౫౭. ‘‘భగవా తమ్హి సమయే, అత్థదస్సీ మహాముని;
తమన్ధకారం నాసేన్తో, ఉప్పజ్జి లోకనాయకో.
౫౮. ‘‘అథ అఞ్ఞతరో సిస్సో, ఆగచ్ఛి మమ సన్తికం;
మన్తే అజ్ఝేతుకామో సో, ఛళఙ్గం నామ లక్ఖణం.
౫౯. ‘‘బుద్ధో లోకే సముప్పన్నో, అత్థదస్సీ మహాముని;
చతుసచ్చం పకాసేన్తో, దేసేతి అమతం పదం.
౬౦. ‘‘తుట్ఠహట్ఠో పముదితో, ధమ్మన్తరగతాసయో;
అస్సమా అభినిక్ఖమ్మ, ఇదం వచనమబ్రవిం.
౬౧. ‘‘‘బుద్ధో లోకే సముప్పన్నో, ద్వత్తింసవరలక్ఖణో;
ఏథ సబ్బే గమిస్సామ, సమ్మాసమ్బుద్ధసన్తికం’.
౬౨. ‘‘ఓవాదపటికరా తే, సధమ్మే పారమిం గతా;
సాధూతి సమ్పటిచ్ఛింసు, ఉత్తమత్థగవేసకా.
౬౩. ‘‘జటాభారభరితా తే [జటాభారేన భరితా (క.)], అజినుత్తరవాసనా;
ఉత్తమత్థం గవేసన్తా, నిక్ఖమింసు వనా తదా.
౬౪. ‘‘భగవా తమ్హి సమయే, అత్థదస్సీ మహాయసో;
చతుసచ్చం పకాసేన్తో, దేసేతి అమతం పదం.
౬౫. ‘‘సేతచ్ఛత్తం గహేత్వాన, బుద్ధసేట్ఠస్స ధారయిం;
ఏకాహం ధారయిత్వాన, బుద్ధసేట్ఠం అవన్దహం.
౬౬. ‘‘అత్థదస్సీ తు భగవా, లోకజేట్ఠో నరాసభో;
భిక్ఖుసఙ్ఘే నిసీదిత్వా, ఇమా గాథా అభాసథ.
౬౭. ‘‘‘యో మే ఛత్తం అధారేసి, పసన్నో సేహి పాణిభి;
తమహం కిత్తయిస్సామి, సుణాథ మమ భాసతో.
౬౮. ‘‘‘ఇమస్స జాయమానస్స, దేవత్తే అథ మానుసే;
ధారేస్సతి సదా ఛత్తం, ఛత్తదానస్సిదం ఫలం.
౬౯. ‘‘‘సత్తసత్తతికప్పాని, దేవలోకే రమిస్సతి;
సహస్సక్ఖత్తుం రాజా చ, చక్కవత్తీ భవిస్సతి.
౭౦. ‘‘‘సత్తసత్తతిక్ఖత్తుఞ్చ, దేవరజ్జం కరిస్సతి;
పదేసరజ్జం విపులం, గణనాతో అసఙ్ఖియం.
౭౧. ‘‘‘అట్ఠారసే కప్పసతే, గోతమో సక్యపుఙ్గవో;
తమన్ధకారం నాసేన్తో, ఉప్పజ్జిస్సతి చక్ఖుమా.
౭౨. ‘‘‘తస్స ధమ్మేసు దాయాదో, ఓరసో ధమ్మనిమ్మితో;
సబ్బాసవే పరిఞ్ఞాయ, విహరిస్సతినాసవో’.
౭౩. ‘‘యతో అహం కమ్మమకం, ఛత్తం బుద్ధస్స ధారయం;
ఏత్థన్తరే న జానామి, సేతచ్ఛత్తం అధారితం.
౭౪. ‘‘ఇదం పచ్ఛిమకం మయ్హం, చరిమో వత్తతే భవో;
ఛత్తధారణమజ్జాపి, వత్తతే నిచ్చకాలికం.
౭౫. ‘‘అహో మే సుకతం కమ్మం, అత్థదస్సిస్స తాదినో;
సబ్బాసవా పరిక్ఖీణా, నత్థి దాని పునబ్భవో.
౭౬. ‘‘కిలేసా ఝాపితా మయ్హం…పే… విహరామి అనాసవో.
౭౭. ‘‘స్వాగతం వత మే ఆసి…పే… కతం బుద్ధస్స సాసనం.
౭౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఏకఛత్తియో థేరో ఇమా గాథాయో అభాసిత్థాతి;
ఏకఛత్తియత్థేరస్సాపదానం దుతియం.