౧. భద్దాలిత్థేరఅపదానం

౧. ‘‘సుమేధో నామ సమ్బుద్ధో, అగ్గో కారుణికో ముని;

వివేకకామో లోకగ్గో, హిమవన్తముపాగమి.

౨. ‘‘అజ్ఝోగాహేత్వా హిమవం, సుమేధో లోకనాయకో;

పల్లఙ్కం ఆభుజిత్వాన, నిసీది పురిసుత్తమో.

౩. ‘‘సమాధిం సో సమాపన్నో, సుమేధో లోకనాయకో;

సత్తరత్తిన్దివం బుద్ధో, నిసీది పురిసుత్తమో.

౪. ‘‘ఖారిభారం [ఖారికాజం (సీ.)] గహేత్వాన, వనమజ్ఝోగహిం అహం;

తత్థద్దసాసిం సమ్బుద్ధం, ఓఘతిణ్ణమనాసవం.

౫. ‘‘సమ్మజ్జనిం గహేత్వాన, సమ్మజ్జిత్వాన అస్సమం;

చతుదణ్డే ఠపేత్వాన, అకాసిం మణ్డపం తదా.

౬. ‘‘సాలపుప్ఫం ఆహరిత్వా, మణ్డపం ఛాదయిం అహం;

పసన్నచిత్తో సుమనో, అభివన్దిం తథాగతం.

౭. ‘‘యం వదన్తి సుమేధోతి, భూరిపఞ్ఞం సుమేధసం;

భిక్ఖుసఙ్ఘే నిసీదిత్వా, ఇమా గాథా అభాసథ.

౮. ‘‘‘బుద్ధస్స గిరమఞ్ఞాయ, సబ్బే దేవా సమాగముం;

అసంసయం బుద్ధసేట్ఠో, ధమ్మం దేసేతి చక్ఖుమా.

౯. ‘‘‘సుమేధో నామ సమ్బుద్ధో, ఆహుతీనం పటిగ్గహో;

దేవసఙ్ఘే నిసీదిత్వా, ఇమా గాథా అభాసథ.

౧౦. ‘‘‘యో మే సత్తాహం మణ్డపం, ధారయీ సాలఛాదితం;

తమహం కిత్తయిస్సామి, సుణాథ మమ భాసతో.

౧౧. ‘‘‘దేవభూతో మనుస్సో వా, హేమవణ్ణో భవిస్సతి;

పహూతభోగో హుత్వాన, కామభోగీ భవిస్సతి.

౧౨. ‘‘‘సట్ఠి నాగసహస్సాని, సబ్బాలఙ్కారభూసితా;

సువణ్ణకచ్ఛా మాతఙ్గా, హేమకప్పనవాససా.

౧౩. ‘‘‘ఆరూళ్హా గామణీయేహి, తోమరఙ్కుసపాణిభి;

సాయం పాతో [సాయపాతో (పీ.)] ఉపట్ఠానం, ఆగమిస్సన్తిమం నరం;

తేహి నాగేహి పరివుతో, రమిస్సతి అయం నరో.

౧౪. ‘‘‘సట్ఠి అస్ససహస్సాని, సబ్బాలఙ్కారభూసితా;

ఆజానీయావ జాతియా, సిన్ధవా సీఘవాహినో.

౧౫. ‘‘‘ఆరూళ్హా గామణీయేహి, ఇల్లియాచాపధారిభి;

పరివారేస్సన్తిమం నిచ్చం, బుద్ధపూజాయిదం ఫలం.

౧౬. ‘‘‘సట్ఠి రథసహస్సాని, సబ్బాలఙ్కారభూసితా;

దీపా అథోపి వేయగ్ఘా, సన్నద్ధా ఉస్సితద్ధజా.

౧౭. ‘‘‘ఆరూళ్హా గామణీయేహి, చాపహత్థేహి వమ్మిభి;

పరివారేస్సన్తిమం నిచ్చం, బుద్ధపూజాయిదం ఫలం.

౧౮. ‘‘‘సట్ఠి గామసహస్సాని, పరిపుణ్ణాని సబ్బసో;

పహూతధనధఞ్ఞాని, సుసమిద్ధాని సబ్బసో;

సదా పాతుభవిస్సన్తి, బుద్ధపూజాయిదం ఫలం.

౧౯. ‘‘‘హత్థీ అస్సా రథా పత్తీ, సేనా చ చతురఙ్గినీ;

పరివారేస్సన్తిమం నిచ్చం, బుద్ధపూజాయిదం ఫలం.

౨౦. ‘‘‘అట్ఠారసే కప్పసతే, దేవలోకే రమిస్సతి;

సహస్సక్ఖత్తుం రాజా చ, చక్కవత్తీ భవిస్సతి.

౨౧. ‘‘‘సతానం తీణిక్ఖత్తుఞ్చ, దేవరజ్జం కరిస్సతి;

పదేసరజ్జం విపులం, గణనాతో అసఙ్ఖియం.

౨౨. ‘‘‘తింసకప్పసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౨౩. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సబ్బాసవే పరిఞ్ఞాయ, విహరిస్సతినాసవో’.

౨౪. ‘‘తింసకప్పసహస్సమ్హి, అద్దసం లోకనాయకం;

ఏత్థన్తరముపాదాయ, గవేసిం అమతం పదం.

౨౫. ‘‘లాభా మయ్హం సులద్ధం మే, యమహఞ్ఞాసి సాసనం;

తిస్సో విజ్జా అనుప్పత్తా, కతం బుద్ధస్స సాసనం.

౨౬. ‘‘నమో తే పురిసాజఞ్ఞ, నమో తే పురిసుత్తమ;

తవ ఞాణం పకిత్తేత్వా, పత్తోమ్హి అచలం పదం.

౨౭. ‘‘యం యం యోనుపపజ్జామి, దేవత్తం అథ మానుసం;

సబ్బత్థ సుఖితో హోమి, ఫలం మే ఞాణకిత్తనే.

౨౮. ‘‘ఇదం పచ్ఛిమకం మయ్హం, చరిమో వత్తతే భవో;

నాగోవ బన్ధనం ఛేత్వా, విహరామి అనాసవో.

౨౯. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౩౦. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౩౧. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా భద్దాలిత్థేరో ఇమా గాథాయో అభాసిత్థాతి.

భద్దాలిత్థేరస్సాపదానం పఠమం.