౯. జతుకణ్ణిత్థేరఅపదానం
౨౭౬. ‘‘నగరే హంసవతియా, సేట్ఠిపుత్తో అహోసహం;
సమప్పితో కామగుణే, పరిచారేమహం తదా.
౨౭౭. ‘‘తతో [తయో (సీ.)] పాసాదమారుయ్హ, మహాభోగే వలఞ్జకో [ఉబ్బిద్ధా గేహలుఞ్జకా (క.), ఉబ్బిద్ధాగేహలఞ్ఛకా (సీ.)];
తత్థ నచ్చేహి గీతేహి, పరిచారేమహం తదా.
౨౭౮. ‘‘తూరియా ఆహతా మయ్హం, సమ్మతాళసమాహితా;
నచ్చన్తా [రఞ్జన్తీ (స్యా.), రజ్జన్తా (క.)] ఇత్థియో సబ్బా, హరన్తియేవ మే మనో.
౨౭౯. ‘‘చేలాపికా [చేలావకా (స్యా.), వేలామికా (పీ.)] లామణికా [వామనికా (స్యా. పీ.)], కుఞ్జవాసీ తిమజ్ఝికా [కుఞ్జవా సీహిమజ్ఝితా (స్యా.), కుజ్జా వా సీహిమజ్ఝికా (పీ.)];
లఙ్ఘికా సోకజ్ఝాయీ చ, పరివారేన్తి మం సదా.
౨౮౦. ‘‘వేతాళినో కుమ్భథూనీ, నటా చ నచ్చకా బహూ;
నటకా నాటకా చేవ, పరివారేన్తి మం సదా.
౨౮౧. ‘‘కప్పకా న్హాపకా సూదా, మాలాకారా సుపాసకా [సుమాపకా (సీ. స్యా.)];
జల్లా మల్లా చ తే సబ్బే, పరివారేన్తి మం సదా.
౨౮౨. ‘‘ఏతేసు కీళమానేసు, సిక్ఖితే కతుపాసనే;
రత్తిన్దివం న జానామి, ఇన్దోవ తిదసఙ్గణే.
౨౮౩. ‘‘అద్ధికా పథికా సబ్బే, యాచకా వరకా బహూ;
ఉపగచ్ఛన్తి తే నిచ్చం, భిక్ఖయన్తా మమం ఘరం.
౨౮౪. ‘‘సమణా బ్రాహ్మణా చేవ, పుఞ్ఞక్ఖేత్తా అనుత్తరా;
వడ్ఢయన్తా మమం పుఞ్ఞం, ఆగచ్ఛన్తి మమం ఘరం.
౨౮౫. ‘‘పటగా [పటకా (సీ. స్యా.), పదకా (పీ.)] లటుకా [లటకా (సీ.)] సబ్బే, నిగణ్ఠా పుప్ఫసాటకా;
తేదణ్డికా ఏకసిఖా, ఆగచ్ఛన్తి మమం ఘరం.
౨౮౬. ‘‘ఆజీవకా విలుత్తావీ, గోధమ్మా దేవధమ్మికా;
రజోజల్లధరా ఏతే, ఆగచ్ఛన్తి మమం ఘరం.
౨౮౭. ‘‘పరిత్తకా సన్తిపత్తా [పరివత్తకా సిద్ధిపత్తా (సీ. స్యా. పీ.)], కోధపుగ్గనికా [కోణ్డపుగ్గణికా (సీ.), కోణ్డపుగ్గలికా (పీ.)] బహూ;
తపస్సీ వనచారీ చ, ఆగచ్ఛన్తి మమం ఘరం.
౨౮౮. ‘‘ఓడ్డకా దమిళా చేవ, సాకుళా మలవాళకా [మలయాలకా (సీ. స్యా. పీ.)];
సవరా యోనకా చేవ, ఆగచ్ఛన్తి మమం ఘరం.
౨౮౯. ‘‘అన్ధకా ముణ్డకా సబ్బే, కోటలా హనువిన్దకా [కోలకా సానువిన్దకా (సీ. పీ.)];
ఆరావచీనరట్ఠా చ, ఆగచ్ఛన్తి మమం ఘరం.
౨౯౦. ‘‘అలసన్దకా [అలసన్తా (క.)] పల్లవకా, ధమ్మరా నిగ్గమానుసా [బబ్బరా భగ్గకారుసా (సీ.)];
గేహికా [రోహితా (సీ.), బాహికా (పీ.)] చేతపుత్తా చ, ఆగచ్ఛన్తి మమం ఘరం.
౨౯౧. ‘‘మాధురకా కోసలకా, కలిఙ్గా [కాసికా (సీ.)] హత్థిపోరికా;
ఇసిణ్డా మక్కలా చేవ, ఆగచ్ఛన్తి మమం ఘరం.
౨౯౨. ‘‘చేలావకా ఆరబ్భా [అరమ్మా (సీ. పీ.)] చ, ఓఘుళ్హా [ఓక్కలా (సీ.)] మేఘలా బహూ;
ఖుద్దకా సుద్దకా చేవ, ఆగచ్ఛన్తి మమం ఘరం.
౨౯౩. ‘‘రోహణా సిన్ధవా చేవ, చితకా ఏకకణ్ణికా;
సురట్ఠా అపరన్తా చ, ఆగచ్ఛన్తి మమం ఘరం.
౨౯౪. ‘‘సుప్పారకా కుమారా [కికుమారా (సీ. పీ.)] చ, మల్లసోవణ్ణభూమికా [మలయా సోణ్ణభూమికా (సీ. స్యా. పీ.)];
వజ్జీతఙ్గా [వజ్జీ తారా (సీ.), వజ్జీహారా (స్యా. పీ.)] చ తే సబ్బే, ఆగచ్ఛన్తి మమం ఘరం.
౨౯౫. ‘‘నళకారా పేసకారా, చమ్మకారా చ తచ్ఛకా;
కమ్మారా కుమ్భకారా చ, ఆగచ్ఛన్తి మమం ఘరం.
౨౯౬. ‘‘మణికారా లోహకారా, సోణ్ణకారా చ దుస్సికా;
తిపుకారా చ తే సబ్బే, ఆగచ్ఛన్తి మమం ఘరం.
౨౯౭. ‘‘ఉసుకారా భమకారా, పేసకారా చ గన్ధికా;
రజకా తున్నవాయా చ, ఆగచ్ఛన్తి మమం ఘరం.
౨౯౮. ‘‘తేలికా కట్ఠహారా చ, ఉదహారా చ పేస్సికా;
సూపికా సూపరక్ఖా చ, ఆగచ్ఛన్తి మమం ఘరం.
౨౯౯. ‘‘దోవారికా అనీకట్ఠా, బన్ధికా [వన్దికా (సీ.), గన్థికా (స్యా.), సన్దికా (పీ.)] పుప్ఫఛడ్డకా;
హత్థారుహా హత్థిపాలా, ఆగచ్ఛన్తి మమం ఘరం.
౩౦౦. ‘‘ఆనన్దస్స మహారఞ్ఞో [ఆనన్దస్స నామ రఞ్ఞో (స్యా.), అరిన్దమనామ రఞ్ఞో (పీ.)], మమత్థస్స [పమత్తస్స (సీ. పీ.), సమగ్గస్స (స్యా.)] అదాసహం;
సత్తవణ్ణేన రతనేన, ఊనత్థం [ఊనత్తం (సీ. స్యా. పీ.)] పూరయామహం.
౩౦౧. ‘‘యే మయా కిత్తితా సబ్బే, నానావణ్ణా బహూ జనా;
తేసాహం చిత్తమఞ్ఞాయ, తప్పయిం రతనేనహం.
౩౦౨. ‘‘వగ్గూసు భాసమానాసు, వజ్జమానాసు భేరిసు;
సఙ్ఖేసు ధమయన్తేసు, సకగేహే రమామహం.
౩౦౩. ‘‘భగవా తమ్హి సమయే, పదుముత్తరనాయకో;
వసీసతసహస్సేహి, పరిక్ఖీణాసవేహి సో.
౩౦౪. ‘‘భిక్ఖూహి సహితో వీథిం, పటిపజ్జిత్థ చక్ఖుమా;
ఓభాసేన్తో దిసా సబ్బా, దీపరుక్ఖోవ జోతతి.
౩౦౫. ‘‘వజ్జన్తి భేరియో సబ్బా, గచ్ఛన్తే లోకనాయకే;
పభా నిద్ధావతే తస్స, సతరంసీవ ఉగ్గతో.
౩౦౬. ‘‘కవాటన్తరికాయాపి, పవిట్ఠేన చ రస్మినా;
అన్తోఘరేసు విపులో, ఆలోకో ఆసి తావదే.
౩౦౭. ‘‘పభం దిస్వాన బుద్ధస్స, పారిసజ్జే అవోచహం;
నిస్సంసయం బుద్ధసేట్ఠో, ఇమం వీథిముపాగతో.
౩౦౮. ‘‘ఖిప్పం ఓరుయ్హ పాసాదా, అగమిం అన్తరాపణం;
సమ్బుద్ధం అభివాదేత్వా, ఇదం వచనమబ్రవిం.
౩౦౯. ‘‘‘అనుకమ్పతు మే బుద్ధో, జలజుత్తమనాయకో;
వసీసతసహస్సేహి, అధివాసేసి సో ముని’.
౩౧౦. ‘‘నిమన్తేత్వాన సమ్బుద్ధం, అభినేసిం సకం ఘరం;
తత్థ అన్నేన పానేన, సన్తప్పేసిం మహామునిం.
౩౧౧. ‘‘భుత్తావిం కాలమఞ్ఞాయ, బుద్ధసేట్ఠస్స తాదినో;
సతఙ్గికేన తూరియేన, బుద్ధసేట్ఠం ఉపట్ఠహిం.
౩౧౨. ‘‘పదుముత్తరో లోకవిదూ, ఆహుతీనం పటిగ్గహో;
అన్తోఘరే నిసీదిత్వా, ఇమా గాథా అభాసథ.
౩౧౩. ‘‘‘యో మం తూరియేహుపట్ఠాసి, అన్నపానఞ్చదాసి మే;
తమహం కిత్తయిస్సామి, సుణాథ మమ భాసతో.
౩౧౪. ‘‘‘పహూతభక్ఖో హుత్వాన, సహిరఞ్ఞో సభోజనో;
చతుదీపే ఏకరజ్జం, కారయిస్సతియం నరో.
౩౧౫. ‘‘‘పఞ్చసీలే సమాదాయ, దసకమ్మపథే తతో;
సమాదాయ పవత్తేన్తో, పరిసం సిక్ఖాపయిస్సతి.
౩౧౬. ‘‘‘తూరియసతసహస్సాని, భేరియో సమలఙ్కతా;
వజ్జయిస్సన్తిమం నిచ్చం, ఉపట్ఠానస్సిదం ఫలం.
౩౧౭. ‘‘‘తింసకప్పసహస్సాని, దేవలోకే రమిస్సతి;
చతుసట్ఠిక్ఖత్తుం దేవిన్దో, దేవరజ్జం కరిస్సతి.
౩౧౮. ‘‘‘చతుసట్ఠిక్ఖత్తుం రాజా, చక్కవత్తీ భవిస్సతి;
పదేసరజ్జం విపులం, గణనాతో అసఙ్ఖియం.
౩౧౯. ‘‘‘కప్పసతసహస్సమ్హి, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౩౨౦. ‘‘‘ఉపపజ్జతి యం యోనిం, దేవత్తం అథ మానుసం;
అనూనభోగో హుత్వాన, మనుస్సత్తం గమిస్సతి.
౩౨౧. ‘‘‘అజ్ఝాయకో భవిత్వాన, తిణ్ణం వేదాన పారగూ;
ఉత్తమత్థం గవేసన్తో, చరిస్సతి మహిం ఇమం.
౩౨౨. ‘‘‘సో పచ్ఛా పబ్బజిత్వాన, సుక్కమూలేన చోదితో;
గోతమస్స భగవతో, సాసనేభిరమిస్సతి.
౩౨౩. ‘‘‘ఆరాధయిత్వాన సమ్బుద్ధం, గోతమం సక్యపుఙ్గవం;
కిలేసే ఝాపయిత్వాన, అరహాయం భవిస్సతి’.
౩౨౪. ‘‘విపినే బ్యగ్ఘరాజావ, మిగరాజావ కేసరీ;
అభీతో విహరామజ్జ, సక్యపుత్తస్స సాసనే.
౩౨౫. ‘‘దేవలోకే మనుస్సే వా, దలిద్దే దుగ్గతిమ్హి వా;
నిబ్బత్తిం మే న పస్సామి, ఉపట్ఠానస్సిదం ఫలం.
౩౨౬. ‘‘వివేకమనుయుత్తోమ్హి, ఉపసన్తో నిరూపధి;
నాగోవ బన్ధనం ఛేత్వా, విహరామి అనాసవో.
౩౨౭. ‘‘కిలేసా ఝాపితా మయ్హం…పే… విహరామి అనాసవో.
౩౨౮. ‘‘స్వాగతం వత మే ఆసి…పే… కతం బుద్ధస్స సాసనం.
౩౨౯. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా జతుకణ్ణిత్థేరో ఇమా గాథాయో అభాసిత్థాతి.
జతుకణ్ణిత్థేరస్సాపదానం నవమం.