౧౦. ఉదేనత్థేరఅపదానం
౩౩౦. ‘‘హిమవన్తస్సావిదూరే, పదుమో నామ పబ్బతో;
అస్సమో సుకతో మయ్హం, పణ్ణసాలా సుమాపితా.
౩౩౧. ‘‘నదియో సన్దరే తత్థ, సుపతిత్థా మనోరమా;
అచ్ఛోదకా సీతజలా, సన్దరే నదియో సదా.
౩౩౨. ‘‘పాఠీనా పావుసా మచ్ఛా, బలజా ముఞ్జరోహితా;
సోభేన్తా నదియో ఏతే, వసన్తి నదియా సదా.
౩౩౩. ‘‘అమ్బజమ్బూహి సఞ్ఛన్నా, కరేరితిలకా తథా;
ఉద్దాలకా పాటలియో, సోభేన్తి మమ అస్సమం.
౩౩౪. ‘‘అఙ్కోలకా బిమ్బిజాలా, మాయాకారీ చ పుప్ఫితా;
గన్ధేన ఉపవాయన్తా, సోభేన్తి మమ అస్సమం.
౩౩౫. ‘‘అతిముత్తా సత్తలికా, నాగా సాలా చ పుప్ఫితా;
దిబ్బగన్ధం సమ్పవన్తా, సోభేన్తి మమ అస్సమం.
౩౩౬. ‘‘కోసమ్బా సళలా నీపా, అట్ఠఙ్గాపి చ పుప్ఫితా [అట్ఠఙ్గా చ సుపుప్ఫితా (సీ.), కట్ఠఙ్గా చ సుపుప్ఫితా (పీ.)];
దిబ్బగన్ధం సమ్పవన్తా, సోభేన్తి మమ అస్సమం.
౩౩౭. ‘‘హరీతకా ఆమలకా, అమ్బజమ్బువిభీతకా;
కోలా భల్లాతకా బిల్లా, ఫలాని బహు అస్సమే.
౩౩౮. ‘‘కలమ్బా కన్దలీ తత్థ, పుప్ఫన్తి మమ అస్సమే;
దిబ్బగన్ధం [దిబ్బగన్ధా (సీ. స్యా. పీ.) ఏవం పరత్థపి] సమ్పవన్తా, సోభేన్తి మమ అస్సమం.
౩౩౯. ‘‘అసోకపిణ్డివారీ చ [అసోకపిణ్డీ చ వరీ (సీ. స్యా.), అసోకపిణ్డీ చ వారీ (పీ.)], నిమ్బరుక్ఖా చ పుప్ఫితా;
దిబ్బగన్ధం సమ్పవన్తా, సోభేన్తి మమ అస్సమం.
౩౪౦. ‘‘పున్నాగా గిరిపున్నాగా, తిమిరా తత్థ పుప్ఫితా;
దిబ్బగన్ధం సమ్పవన్తా, సోభేన్తి మమ అస్సమం.
౩౪౧. ‘‘నిగ్గుణ్డీ సిరినిగ్గుణ్డీ, చమ్పరుక్ఖేత్థ పుప్ఫితా;
దిబ్బగన్ధం సమ్పవన్తా, సోభేన్తి మమ అస్సమం.
౩౪౨. ‘‘అవిదూరే పోక్ఖరణీ, చక్కవాకూపకూజితా;
మన్దాలకేహి సఞ్ఛన్నా, పదుముప్పలకేహి చ.
౩౪౩. ‘‘అచ్ఛోదకా సీతజలా, సుపతిత్థా మనోరమా;
అచ్ఛా ఫలికసమానా, సోభేన్తి మమ అస్సమం.
౩౪౪. ‘‘పదుమా పుప్ఫరే తత్థ, పుణ్డరీకా చ ఉప్పలా;
మన్దాలకేహి సఞ్ఛన్నా, సోభేన్తి మమ అస్సమం.
౩౪౫. ‘‘పాఠీనా పావుసా మచ్ఛా, బలజా ముఞ్జరోహితా;
విచరన్తావ తే తత్థ, సోభేన్తి మమ అస్సమం.
౩౪౬. ‘‘కుమ్భీలా సుసుమారా చ, కచ్ఛపా చ గహా బహూ;
ఓగహా అజగరా చ, సోభేన్తి మమ అస్సమం.
౩౪౭. ‘‘పారేవతా రవిహంసా, చక్కవాకా నదీచరా;
దిన్దిభా సాళికా చేత్థ, సోభేన్తి మమ అస్సమం.
౩౪౮. ‘‘నయితా అమ్బగన్ధీ చ, కేతకా తత్థ పుప్ఫితా;
దిబ్బగన్ధం సమ్పవన్తా, సోభేన్తి మమ అస్సమం.
౩౪౯. ‘‘సీహా బ్యగ్ఘా చ దీపీ చ, అచ్ఛకోకతరచ్ఛకా;
అనుసఞ్చరన్తా పవనే, సోభేన్తి మమ అస్సమం.
౩౫౦. ‘‘జటాభారేన భరితా, అజినుత్తరవాసనా;
అనుసఞ్చరన్తా పవనే, సోభేన్తి మమ అస్సమం.
౩౫౧. ‘‘అజినానిధరా ఏతే, నిపకా సన్తవుత్తినో;
అప్పాహారావ తే సబ్బే, సోభేన్తి మమ అస్సమం.
౩౫౨. ‘‘ఖారిభారం గహేత్వాన, అజ్ఝోగయ్హ వనం తదా;
మూలఫలాని భుఞ్జన్తా, వసన్తి అస్సమే తదా.
౩౫౩. ‘‘న తే దారుం ఆహరన్తి, ఉదకం పాదధోవనం;
సబ్బేసం ఆనుభావేన, సయమేవాహరీయతి.
౩౫౪. ‘‘చుల్లాసీతిసహస్సాని, ఇసయేత్థ సమాగతా;
సబ్బేవ ఝాయినో ఏతే, ఉత్తమత్థగవేసకా.
౩౫౫. ‘‘తపస్సినో బ్రహ్మచారీ, చోదేన్తా అప్పనావ తే;
అమ్బరావచరా సబ్బే, వసన్తి అస్సమే తదా.
౩౫౬. ‘‘పఞ్చాహం సన్నిపతన్తి, ఏకగ్గా సన్తవుత్తినో;
అఞ్ఞోఞ్ఞం అభివాదేత్వా, పక్కమన్తి దిసాముఖా.
౩౫౭. ‘‘పదుముత్తరో నామ జినో, సబ్బధమ్మాన పారగూ;
తమన్ధకారం విధమం, ఉప్పజ్జి తావదే జినో.
౩౫౮. ‘‘మమ అస్సమసామన్తా, యక్ఖో ఆసి మహిద్ధికో;
సో మే సంసిత్థ సమ్బుద్ధం, జలజుత్తమనాయకం.
౩౫౯. ‘‘ఏస బుద్ధో సముప్పన్నో, పదుముత్తరో మహాముని;
ఖిప్పం గన్త్వాన సమ్బుద్ధం, పయిరూపాస మారిస.
౩౬౦. ‘‘యక్ఖస్స వచనం సుత్వా, విప్పసన్నేన చేతసా;
అస్సమం సంసామేత్వాన, నిక్ఖమిం విపినా తదా.
౩౬౧. ‘‘చేళేవ డయ్హమానమ్హి, నిక్ఖమిత్వాన అస్సమా;
ఏకరత్తిం నివాసేత్వా [నివసిత్వా (సీ.), నివాసేన (?)], ఉపగచ్ఛిం వినాయకం.
౩౬౨. ‘‘పదుముత్తరో లోకవిదూ, ఆహుతీనం పటిగ్గహో;
చతుసచ్చం పకాసేన్తో, దేసేసి అమతం పదం.
౩౬౩. ‘‘సుఫుల్లం పదుమం గయ్హ, ఉపగన్త్వా మహేసినో;
పసన్నచిత్తో సుమనో, బుద్ధస్స అభిరోపయిం.
౩౬౪. ‘‘పూజయిత్వాన సమ్బుద్ధం, జలజుత్తమనాయకం;
ఏకంసం అజినం కత్వా, సన్థవిం లోకనాయకం.
౩౬౫. ‘‘యేన ఞాణేన సమ్బుద్ధో, వసతీహ అనాసవో;
తం ఞాణం కిత్తయిస్సామి, సుణాథ మమ భాసతో.
౩౬౬. ‘‘‘సంసారసోతం ఛిన్దిత్వా, తారేసి సబ్బపాణినం;
తవ ధమ్మం సుణిత్వాన, తణ్హాసోతం తరన్తి తే.
౩౬౭. ‘‘‘తువం సత్థా చ కేతు చ, ధజో యూపో చ పాణినం;
పరాయణో పతిట్ఠా చ, దీపో చ ద్విపదుత్తమ [దిపదుత్తమ (సీ. స్యా. పీ.)].
౩౬౮. ‘‘‘యావతా గణినో లోకే, సత్థవాహా పవుచ్చరే;
తువం అగ్గోసి సబ్బఞ్ఞు, తవ అన్తోగధావ తే.
౩౬౯. ‘‘‘తవ ఞాణేన సబ్బఞ్ఞు, తారేసి జనతం బహుం;
తవ దస్సనమాగమ్మ, దుక్ఖస్సన్తం కరిస్సరే.
౩౭౦. ‘‘‘యే కేచిమే గన్ధజాతా, లోకే వాయన్తి చక్ఖుమ;
తవ గన్ధసమో నత్థి, పుఞ్ఞక్ఖేత్తే మహామునే’.
౩౭౧. ‘‘‘తిరచ్ఛానయోనిం నిరయం, పరిమోచేసి [పరిమోచేహి (స్యా. క.)] చక్ఖుమ;
అసఙ్ఖతం పదం సన్తం, దేసేసి [దేసేహి (స్యా. క.)] త్వం మహామునే’.
౩౭౨. ‘‘పదుముత్తరో లోకవిదూ, ఆహుతీనం పటిగ్గహో;
భిక్ఖుసఙ్ఘే నిసీదిత్వా, ఇమా గాథా అభాసథ.
౩౭౩. ‘‘‘యో మే ఞాణం అపూజేసి, పసన్నో సేహి పాణిభి;
తమహం కిత్తయిస్సామి, సుణాథ మమ భాసతో.
౩౭౪. ‘‘‘తింసకప్పసహస్సాని, దేవలోకే రమిస్సతి;
సహస్సక్ఖత్తుం రాజా చ, చక్కవత్తీ భవిస్సతి’.
౩౭౫. ‘‘సులద్ధలాభం లద్ధోమ్హి, తోసయిత్వాన సుబ్బతం;
సబ్బాసవే పరిఞ్ఞాయ, విహరామి అనాసవో.
౩౭౬. ‘‘కిలేసా ఝాపితా మయ్హం…పే… విహరామి అనాసవో.
౩౭౭. ‘‘స్వాగతం వత మే ఆసి…పే… కతం బుద్ధస్స సాసనం.
౩౭౮. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఉదేనో థేరో ఇమా గాథాయో అభాసిత్థాతి.
ఉదేనత్థేరస్సాపదానం దసమం.
మేత్తేయ్యవగ్గో ఏకచత్తాలీసమో.