౪౧. మేత్తేయ్యవగ్గో

౧. తిస్సమేత్తేయ్యత్థేరఅపదానం

౧. ‘‘పబ్భారకూటం నిస్సాయ, సోభితో నామ తాపసో;

పవత్తఫలం భుఞ్జిత్వా, వసతి పబ్బతన్తరే.

౨. ‘‘అగ్గిం దారుం ఆహరిత్వా, ఉజ్జాలేసిం అహం తదా;

ఉత్తమత్థం గవేసన్తో, బ్రహ్మలోకూపపత్తియా.

౩. ‘‘పదుముత్తరో లోకవిదూ, ఆహుతీనం పటిగ్గహో;

మముద్ధరితుకామో సో, ఆగచ్ఛి మమ సన్తికే.

౪. ‘‘కిం కరోసి మహాపుఞ్ఞ, దేహి మే అగ్గిదారుకం;

అహమగ్గిం పరిచరే, తతో మే సుద్ధి హోహితి [హేహితి (సీ.)].

౫. ‘‘సుభద్దకో త్వం మనుజే, దేవతే త్వం పజానసి;

తువం అగ్గిం పరిచర, హన్ద తే అగ్గిదారుకం.

౬. ‘‘తతో కట్ఠం గహేత్వాన, అగ్గిం ఉజ్జాలయీ జినో;

న తత్థ కట్ఠం పజ్ఝాయి, పాటిహేరం మహేసినో.

౭. ‘‘న తే అగ్గి పజ్జలతి, ఆహుతీ తే న విజ్జతి;

నిరత్థకం వతం తుయ్హం, అగ్గిం పరిచరస్సు మే.

౮. ‘‘కీదిసో సో [తే (స్యా. క.)] మహావీర, అగ్గి తవ పవుచ్చతి;

మయ్హమ్పి కథయస్సేతం, ఉభో పరిచరామసే.

౯. ‘‘హేతుధమ్మనిరోధాయ, కిలేససమణాయ చ;

ఇస్సామచ్ఛరియం హిత్వా, తయో ఏతే మమాహుతీ.

౧౦. ‘‘కీదిసో త్వం మహావీర, కథం గోత్తోసి మారిస;

ఆచారపటిపత్తి తే, బాళ్హం ఖో మమ రుచ్చతి.

౧౧. ‘‘ఖత్తియమ్హి కులే జాతో, అభిఞ్ఞాపారమిం గతో;

సబ్బాసవపరిక్ఖీణో, నత్థి దాని పునబ్భవో.

౧౨. ‘‘యది బుద్ధోసి సబ్బఞ్ఞూ, పభఙ్కర తమోనుద;

నమస్సిస్సామి తం దేవ, దుక్ఖస్సన్తకరో తువం.

౧౩. ‘‘పత్థరిత్వాజినచమ్మం, నిసీదనమదాసహం;

నిసీద నాథ సబ్బఞ్ఞు, ఉపట్ఠిస్సామహం తువం.

౧౪. ‘‘నిసీది భగవా తత్థ, అజినమ్హి సువిత్థతే;

నిమన్తయిత్వా సమ్బుద్ధం, పబ్బతం అగమాసహం.

౧౫. ‘‘ఖారిభారఞ్చ పూరేత్వా, తిన్దుకఫలమాహరిం;

మధునా యోజయిత్వాన, ఫలం బుద్ధస్సదాసహం.

౧౬. ‘‘మమ నిజ్ఝాయమానస్స, పరిభుఞ్జి తదా జినో;

తత్థ చిత్తం పసాదేసిం, పేక్ఖన్తో లోకనాయకం.

౧౭. ‘‘పదుముత్తరో లోకవిదూ, ఆహుతీనం పటిగ్గహో;

మమస్సమే నిసీదిత్వా, ఇమా గాథా అభాసథ.

౧౮. ‘‘‘యో మం ఫలేన తప్పేసి, పసన్నో సేహి పాణిభి;

తమహం కిత్తయిస్సామి, సుణాథ మమ భాసతో.

౧౯. ‘‘‘పఞ్చవీసతిక్ఖత్తుం సో, దేవరజ్జం కరిస్సతి;

సహస్సక్ఖత్తుం రాజా చ, చక్కవత్తీ భవిస్సతి.

౨౦. ‘‘‘తస్స సఙ్కప్పమఞ్ఞాయ, పుబ్బకమ్మసమఙ్గినో;

అన్నం పానఞ్చ వత్థఞ్చ, సయనఞ్చ మహారహం.

౨౧. ‘‘‘పుఞ్ఞకమ్మేన సంయుత్తా, నిబ్బత్తిస్సన్తి తావదే;

సదా పముదితో చాయం, భవిస్సతి అనామయో.

౨౨. ‘‘‘ఉపపజ్జతి యం యోనిం, దేవత్తం అథ మానుసం;

సబ్బత్థ సుఖితో హుత్వా, మనుస్సత్తం గమిస్సతి.

౨౩. ‘‘‘అజ్ఝాయకో మన్తధరో, తిణ్ణం వేదాన పారగూ;

సమ్బుద్ధం ఉపగన్త్వాన, అరహా సో భవిస్సతి’.

౨౪. ‘‘యతో సరామి అత్తానం, యతో పత్తోస్మి విఞ్ఞుతం;

భోగే మే ఊనతా నత్థి, ఫలదానస్సిదం ఫలం.

౨౫. ‘‘వరధమ్మమనుప్పత్తో, రాగదోసే సమూహనిం;

సబ్బాసవపరిక్ఖీణో, నత్థి దాని పునబ్భవో.

౨౬. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౨౭. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౨౮. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా తిస్సమేత్తేయ్యో థేరో ఇమా గాథాయో అభాసిత్థాతి.

తిస్సమేత్తేయ్యత్థేరస్సాపదానం పఠమం.

౨. పుణ్ణకత్థేరఅపదానం

౨౯. ‘‘పబ్భారకూటం నిస్సాయ, సయమ్భూ అపరాజితో;

ఆబాధికో చ సో [ఆబాధికో గరు (సీ.)] బుద్ధో, వసతి పబ్బతన్తరే.

౩౦. ‘‘మమ అస్సమసామన్తా, పనాదో ఆసి తావదే;

బుద్ధే నిబ్బాయమానమ్హి, ఆలోకో ఉదపజ్జథ [ఆసి తావదే (స్యా. క.)].

౩౧. ‘‘యావతా వనసణ్డస్మిం, అచ్ఛకోకతరచ్ఛకా;

వాళా చ [బ్యగ్ఘా (సీ.)] కేసరీ సబ్బే, అభిగజ్జింసు తావదే.

౩౨. ‘‘ఉప్పాతం తమహం దిస్వా, పబ్భారం అగమాసహం;

తత్థద్దస్సాసిం సమ్బుద్ధం, నిబ్బుతం అపరాజితం.

౩౩. ‘‘సుఫుల్లం సాలరాజంవ, సతరంసింవ ఉగ్గతం;

వీతచ్చికంవ అఙ్గారం, నిబ్బుతం అపరాజితం.

౩౪. ‘‘తిణం కట్ఠఞ్చ పూరేత్వా, చితకం తత్థకాసహం;

చితకం సుకతం కత్వా, సరీరం ఝాపయిం అహం.

౩౫. ‘‘సరీరం ఝాపయిత్వాన, గన్ధతోయం సమోకిరిం;

అన్తలిక్ఖే ఠితో యక్ఖో, నామమగ్గహి తావదే.

౩౬. ‘‘యం పూరితం [తం పూరితం (స్యా.), సప్పురిస (క.)] తయా కిచ్చం, సయమ్భుస్స మహేసినో;

పుణ్ణకో నామ నామేన, సదా హోహి తువం [యదా హోసి తువం (స్యా.), సదా హోహితి త్వం (క.)] మునే.

౩౭. ‘‘తమ్హా కాయా చవిత్వాన, దేవలోకం అగచ్ఛహం;

తత్థ దిబ్బమయో గన్ధో, అన్తలిక్ఖా పవస్సతి [అన్తలిక్ఖే పవాయతి (సీ.)].

౩౮. ‘‘తత్రాపి నామధేయ్యం మే, పుణ్ణకోతి అహూ తదా;

దేవభూతో మనుస్సో వా, సఙ్కప్పం పూరయామహం.

౩౯. ‘‘ఇదం పచ్ఛిమకం మయ్హం, చరిమో వత్తతే భవో;

ఇధాపి పుణ్ణకో నామ, నామధేయ్యం పకాసతి.

౪౦. ‘‘తోసయిత్వాన సమ్బుద్ధం, గోతమం సక్యపుఙ్గవం;

సబ్బాసవే పరిఞ్ఞాయ, విహరామి అనాసవో.

౪౧. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, తనుకిచ్చస్సిదం ఫలం.

౪౨. ‘‘కిలేసా ఝాపితా మయ్హం…పే… విహరామి అనాసవో.

౪౩. ‘‘స్వాగతం వత మే ఆసి…పే… కతం బుద్ధస్స సాసనం.

౪౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుణ్ణకో థేరో ఇమా గాథాయో అభాసిత్థాతి.

పుణ్ణకత్థేరస్సాపదానం దుతియం.

౩. మేత్తగుత్థేరఅపదానం

౪౫. ‘‘హిమవన్తస్సావిదూరే, అసోకో నామ పబ్బతో;

తత్థాసి అస్సమో మయ్హం, విస్సకమ్మేన [విసుకమ్మేన (సీ. స్యా. క.)] మాపితో.

౪౬. ‘‘సుమేధో నామ సమ్బుద్ధో, అగ్గో కారుణికో ముని;

నివాసయిత్వా పుబ్బణ్హే, పిణ్డాయ మే [మం (సీ.)] ఉపాగమి.

౪౭. ‘‘ఉపాగతం మహావీరం, సుమేధం లోకనాయకం;

పగ్గయ్హ సుగతపత్తం [సుగతం పత్తం (సీ.), సుభకం పత్తం (పీ.)], సప్పితేలం అపూరయిం [సప్పితేలేన పూరయిం (సీ.), సప్పితేలస్స’పూరయిం (?)].

౪౮. ‘‘దత్వానహం బుద్ధసేట్ఠే, సుమేధే లోకనాయకే;

అఞ్జలిం పగ్గహేత్వాన, భియ్యో [భీయో (సీ.), భీయ్యో (పీ.)] హాసం జనేసహం.

౪౯. ‘‘ఇమినా సప్పిదానేన, చేతనాపణిధీహి చ;

దేవభూతో మనుస్సో వా, లభామి విపులం సుఖం.

౫౦. ‘‘వినిపాతం వివజ్జేత్వా, సంసరామి భవాభవే;

తత్థ చిత్తం పణిధిత్వా, లభామి అచలం పదం.

౫౧. ‘‘లాభా తుయ్హం సులద్ధం తే, యం మం అద్దక్ఖి బ్రాహ్మణ;

మమ దస్సనమాగమ్మ, అరహత్తం భవిస్సతి [అరహా త్వం భవిస్ససి (సీ. పీ.), అరహత్తం గమిస్ససి (స్యా.)].

౫౨. ‘‘విస్సత్థో [విస్సట్ఠో (స్యా. పీ.), విసట్ఠో (క.)] హోహి మా భాయి, అధిగన్త్వా మహాయసం;

మమఞ్హి సప్పిం దత్వాన, పరిమోక్ఖసి జాతియా.

౫౩. ‘‘ఇమినా సప్పిదానేన, చేతనాపణిధీహి చ;

దేవభూతో మనుస్సో వా, లభసే విపులం సుఖం.

౫౪. ‘‘ఇమినా సప్పిదానేన, మేత్తచిత్తవతాయ చ;

అట్ఠారసే కప్పసతే, దేవలోకే రమిస్ససి.

౫౫. ‘‘అట్ఠతింసతిక్ఖత్తుఞ్చ, దేవరాజా భవిస్ససి;

పదేసరజ్జం విపులం, గణనాతో అసఙ్ఖియం.

౫౬. ‘‘ఏకపఞ్ఞాసక్ఖత్తుఞ్చ, చక్కవత్తీ భవిస్ససి;

చాతురన్తో విజితావీ, జమ్బుమణ్డస్స [జమ్బుసణ్డస్స (సీ. పీ.)] ఇస్సరో.

౫౭. ‘‘మహాసముద్దోవక్ఖోభో, దుద్ధరో పథవీ యథా;

ఏవమేవ చ తే భోగా, అప్పమేయ్యా భవిస్సరే.

౫౮. ‘‘సట్ఠికోటీ హిరఞ్ఞస్స, చజిత్వా [చత్వాన (సీ. క.), దత్వాన (స్యా. పీ.)] పబ్బజిం అహం;

కిం కుసలం గవేసన్తో, బావరిం ఉపసఙ్కమిం.

౫౯. ‘‘తత్థ మన్తే అధీయామి, ఛళఙ్గం నామ లక్ఖణం;

తమన్ధకారం విధమం, ఉప్పజ్జి త్వం మహాముని.

౬౦. ‘‘తవ దస్సనకామోహం, ఆగతోమ్హి మహాముని;

తవ ధమ్మం సుణిత్వాన, పత్తోమ్హి అచలం పదం.

౬౧. ‘‘తింసకప్పసహస్సమ్హి, సప్పిం బుద్ధస్సదాసహం;

ఏత్థన్తరే నాభిజానే, సప్పిం విఞ్ఞాపితం [విఞ్ఞాపితా (?)] మయా.

౬౨. ‘‘మమ సఙ్కప్పమఞ్ఞాయ, ఉప్పజ్జతి యదిచ్ఛకం;

చిత్తమఞ్ఞాయ నిబ్బత్తం, సబ్బే సన్తప్పయామహం.

౬౩. ‘‘అహో బుద్ధా అహో ధమ్మా [అహో బుద్ధో అహో ధమ్మో (సీ.) థేరగా. ౨౦౧ థేరగాథాయ తదట్ఠకథాయ చ సంసన్దేతబ్బం], అహో నో సత్థు సమ్పదా;

థోకఞ్హి సప్పిం దత్వాన, అప్పమేయ్యం లభామహం.

౬౪. ‘‘మహాసముద్దే ఉదకం, యావతా నేరుపస్సతో;

మమ సప్పిం ఉపాదాయ, కలభాగం న హేస్సతి [హిస్సతి (స్యా. క.), ఏస్సతి (సీ.)].

౬౫. ‘‘యావతా చక్కవాళస్స, కరియన్తస్స [కారయన్తస్స (స్యా.), కయిరన్తస్స (పీ.), ఆహరన్తస్స (క.)] రాసితో;

మమ నిబ్బత్తవత్థానం [మయా నివత్థవత్థానం (పీ.)], ఓకాసో సో న సమ్మతి.

౬౬. ‘‘పబ్బతరాజా హిమవా, పవరోపి సిలుచ్చయో;

మమానులిత్తగన్ధస్స, ఉపనిధిం [ఉపనిధం (సీ. స్యా. క.), ఉపనీయం (పీ.)] న హేస్సతి.

౬౭. ‘‘వత్థం గన్ధఞ్చ సప్పిఞ్చ, అఞ్ఞఞ్చ దిట్ఠధమ్మికం;

అసఙ్ఖతఞ్చ నిబ్బానం, సప్పిదానస్సిదం ఫలం.

౬౮. ‘‘సతిపట్ఠానసయనో, సమాధిఝానగోచరో;

బోజ్ఝఙ్గభోజనో [… జననో (స్యా. క.)] అజ్జ, సప్పిదానస్సిదం ఫలం.

౬౯. ‘‘కిలేసా ఝాపితా మయ్హం…పే… విహరామి అనాసవో.

౭౦. ‘‘స్వాగతం వత మే ఆసి…పే… కతం బుద్ధస్స సాసనం.

౭౧. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా మేత్తగూ థేరో ఇమా గాథాయో

అభాసిత్థాతి.

మేత్తగుత్థేరస్సాపదానం తతియం.

౪. ధోతకత్థేరఅపదానం

౭౨. ‘‘గఙ్గా భాగీరథీ నామ, హిమవన్తా పభావితా [హిమవన్తప్పభావితా (సీ.)];

హంసవతియా ద్వారేన, అనుసన్దతి తావదే.