౮. తోదేయ్యత్థేరఅపదానం

౨౨౪. ‘‘రాజా అజితఞ్జయో [రాజాసి విజయో (సీ. అట్ఠ.), రాజా విజితజయో (స్యా.)] నామ, కేతుమతీపురుత్తమే;

సూరో విక్కమసమ్పన్నో, పురమజ్ఝావసీ తదా.

౨౨౫. ‘‘తస్స రఞ్ఞో పమత్తస్స, అటవియో సముట్ఠహుం;

ఓతారా [ఉత్తరా (స్యా.), ఓచరా (పీ.)] తుణ్డికా చేవ, రట్ఠం విద్ధంసయుం తదా.

౨౨౬. ‘‘పచ్చన్తే కుపితే ఖిప్పం, సన్నిపాతేసిరిన్దమో;

భటే చేవ బలత్థే చ, అరిం నిగ్గాహయి తదా.

౨౨౭. ‘‘హత్థారోహా అనీకట్ఠా, సూరా చ చమ్మయోధినో;

ధనుగ్గహా చ ఉగ్గా చ, సబ్బే సన్నిపతుం తదా.

౨౨౮. ‘‘ఆళారికా చ కప్పకా, న్హాపకా మాలకారకా;

సూరా విజితసఙ్గామా, సబ్బే సన్నిపతుం తదా.

౨౨౯. ‘‘ఖగ్గహత్థా చ పురిసా, చాపహత్థా చ వమ్మినో;

లుద్దా విజితసఙ్గామా, సబ్బే సన్నిపతుం తదా.

౨౩౦. ‘‘తిధాపభిన్నా మాతఙ్గా, కుఞ్జరా సట్ఠిహాయనా;

సువణ్ణకచ్ఛాలఙ్కారా, సబ్బే సన్నిపతుం తదా.

౨౩౧. ‘‘ఖమా సీతస్స ఉణ్హస్స, ఉక్కారుహరణస్స చ;

యోధాజీవా కతకమ్మా, సబ్బే సన్నిపతుం తదా.

౨౩౨. ‘‘సఙ్ఖసద్దం భేరిసద్దం, అథో ఉతుజ [ఉద్ధవ (సీ.), ఉద్దట (స్యా.)] సద్దకం;

ఏతేహి తే హాసయన్తా, సబ్బే సన్నిపతుం తదా.

౨౩౩. ‘‘తిసూలకోన్తిమన్తేహి [తిసూలకోన్తమన్తేహి (సీ.), కవచేహి తోమరేహి (సీ.), ధనూహి తోమరేహి (స్యా.)] చ;

కోట్టేన్తానం నిపాతేన్తా [కోట్టయన్తా నివత్తేన్తా (స్యా.)], సబ్బే సన్నిపతుం తదా.

౨౩౪. ‘‘కిమేవాతినిసామేత్వా [కవచానివాసేత్వా (స్యా.)], సరాజా అజితఞ్జయో [అజినం జినో (సీ.), అజితఞ్జినో (స్యా.)];

సట్ఠి పాణసహస్సాని, సూలే ఉత్తాసయిం తదా.

౨౩౫. ‘‘సద్దం మానుసకాకంసు, అహో రాజా అధమ్మికో;

నిరయే పచ్చమానస్స, కదా అన్తో భవిస్సతి.

౨౩౬. ‘‘సయనేహం తువట్టేన్తో, పస్సామి నిరయే తదా;

న సుపామి దివారత్తిం, సూలేన తజ్జయన్తి మం.

౨౩౭. ‘‘కిం పమాదేన రజ్జేన, వాహనేన బలేన చ;

న తే పహోన్తి ధారేతుం, తాపయన్తి [తాసయన్తి (సీ. స్యా.)] మమం సదా.

౨౩౮. ‘‘కిం మే పుత్తేహి దారేహి, రజ్జేన సకలేన చ;

యంనూన పబ్బజేయ్యాహం, గతిమగ్గం విసోధయే.

౨౩౯. ‘‘సట్ఠి నాగసహస్సాని, సబ్బాలఙ్కారభూసితే;

సువణ్ణకచ్ఛే మాతఙ్గే, హేమకప్పనవాససే.

౨౪౦. ‘‘ఆరూళ్హే గామణీయేహి, తోమరఙ్కుసపాణిభి;

సఙ్గామావచరే ఠానే, అనపేక్ఖో విహాయహం;

సకకమ్మేన సన్తత్తో, నిక్ఖమిం అనగారియం.

౨౪౧. ‘‘సట్ఠి అస్ససహస్సాని, సబ్బాలఙ్కారభూసితే;

ఆజానీయేవ జాతియా, సిన్ధవే సీఘవాహనే.

౨౪౨. ‘‘ఆరూళ్హే గామణీయేహి, చాపహత్థేహి వమ్మిభి;

పహారేత్వాన [పహాయిత్వాన (సీ. పీ.), ఛడ్డయిత్వాన (స్యా.)] తే సబ్బే, నిక్ఖమిం అనగారియం.

౨౪౩. ‘‘సట్ఠి రథసహస్సాని, సబ్బాలఙ్కారభూసితే;

దీపే అథోపి వేయగ్ఘే, సన్నద్ధే ఉస్సితద్ధజే;

తే సబ్బే పరిహారేత్వా [పరివజ్జేత్వా (స్యా.), పరిహాయిత్వా (పీ.)], పబ్బజిం అనగారియం.

౨౪౪. ‘‘సట్ఠి ధేనుసహస్సాని, సబ్బా కంసూపధారణా;

తాయోపి [గావియో (స్యా.), ధేనుయో (క.)] ఛడ్డయిత్వాన, పబ్బజిం అనగారియం.

౨౪౫. ‘‘సట్ఠి ఇత్థిసహస్సాని, సబ్బాలఙ్కారభూసితా;

విచిత్తవత్థాభరణా, ఆముక్కమణికుణ్డలా.

౨౪౬. ‘‘అళారపమ్హా హసులా, సుసఞ్ఞా తనుమజ్ఝిమా;

తా హిత్వా కన్దమానాయో, పబ్బజిం అనగారియం.

౨౪౭. ‘‘సట్ఠి గామసహస్సాని, పరిపుణ్ణాని సబ్బసో;

ఛడ్డయిత్వాన తం రజ్జం, పబ్బజిం అనగారియం.

౨౪౮. ‘‘నగరా నిక్ఖమిత్వాన, హిమవన్తముపాగమిం;

భాగీరథీనదీతీరే, అస్సమం మాపయిం అహం.

౨౪౯. ‘‘పణ్ణసాలం కరిత్వాన, అగ్యాగారం అకాసహం;

ఆరద్ధవీరియో పహితత్తో, వసామి అస్సమే అహం.

౨౫౦. ‘‘మణ్డపే రుక్ఖమూలే వా, సుఞ్ఞాగారే చ ఝాయతో;

న తు విజ్జతి తాసో మే, న పస్సే భయభేరవం.

౨౫౧. ‘‘సుమేధో నామ సమ్బుద్ధో, అగ్గో కారుణికో ముని;

ఞాణాలోకేన జోతన్తో, లోకే ఉప్పజ్జి తావదే.

౨౫౨. ‘‘మమ అస్సమసామన్తా, యక్ఖో ఆసి మహిద్ధికో;

బుద్ధసేట్ఠమ్హి ఉప్పన్నే, ఆరోచేసి మమం తదా.

౨౫౩. ‘‘బుద్ధో లోకే సముప్పన్నో, సుమేధో నామ చక్ఖుమా;

తారేతి జనతం సబ్బం, తమ్పి సో తారయిస్సతి.

౨౫౪. ‘‘యక్ఖస్స వచనం సుత్వా, సంవిగ్గో ఆసి తావదే;

బుద్ధో బుద్ధోతి చిన్తేన్తో, అస్సమం పటిసామయిం.

౨౫౫. ‘‘అగ్గిదారుఞ్చ ఛడ్డేత్వా, సంసామేత్వాన సన్థతం;

అస్సమం అభివన్దిత్వా, నిక్ఖమిం విపినా అహం.

౨౫౬. ‘‘తతో చన్దనమాదాయ, గామా గామం పురా పురం;

దేవదేవం గవేసన్తో, ఉపగచ్ఛిం వినాయకం.

౨౫౭. ‘‘భగవా తమ్హి సమయే, సుమేధో లోకనాయకో;

చతుసచ్చం పకాసేన్తో, బోధేతి జనతం బహుం.

౨౫౮. ‘‘అఞ్జలిం పగ్గహేత్వాన, సీసే కత్వాన చన్దనం;

సమ్బుద్ధం అభివాదేత్వా, ఇమా గాథా అభాసహం.

౨౫౯. ‘‘‘వస్సికే పుప్ఫమానమ్హి, సన్తికే ఉపవాయతి;

త్వం వీర గుణగన్ధేన, దిసా సబ్బా పవాయసి.

౨౬౦. ‘‘‘చమ్పకే నాగవనికే, అతిముత్తకకేతకే;

సాలేసు పుప్ఫమానేసు, అనువాతం పవాయతి.

౨౬౧. ‘‘‘తవ గన్ధం సుణిత్వాన, హిమవన్తా ఇధాగమిం;

పూజేమి తం మహావీర, లోకజేట్ఠ మహాయస’.

౨౬౨. ‘‘వరచన్దనేనానులిమ్పిం, సుమేధం లోకనాయకం;

సకం చిత్తం పసాదేత్వా, తుణ్హీ అట్ఠాసి తావదే.

౨౬౩. ‘‘సుమేధో నామ భగవా, లోకజేట్ఠో నరాసభో;

భిక్ఖుసఙ్ఘే నిసీదిత్వా, ఇమా గాథా అభాసథ.

౨౬౪. ‘‘‘యో మే గుణే పకిత్తేసి, చన్దనఞ్చ అపూజయి;

తమహం కిత్తయిస్సామి, సుణాథ మమ భాసతో.

౨౬౫. ‘‘‘ఆదేయ్యవాక్యవచనో, బ్రహ్మా ఉజు పతాపవా;

పఞ్చవీసతికప్పాని, సప్పభాసో భవిస్సతి.

౨౬౬. ‘‘‘ఛబ్బీసతికప్పసతే, దేవలోకే రమిస్సతి;

సహస్సక్ఖత్తుం రాజా చ, చక్కవత్తీ భవిస్సతి.

౨౬౭. ‘‘‘తేత్తింసక్ఖత్తుం దేవిన్దో, దేవరజ్జం కరిస్సతి;

పదేసరజ్జం విపులం, గణనాతో అసఙ్ఖియం.

౨౬౮. ‘‘‘తతో చుతోయం మనుజో, మనుస్సత్తం గమిస్సతి;

పుఞ్ఞకమ్మేన సంయుత్తో, బ్రహ్మబన్ధు భవిస్సతి.

౨౬౯. ‘‘‘అజ్ఝాయకో మన్తధరో, తిణ్ణం వేదాన పారగూ;

తిలక్ఖణేన సమ్పన్నో, బావరీ నామ బ్రాహ్మణో.

౨౭౦. ‘‘‘తస్స సిస్సో భవిత్వాన, హేస్సతి మన్తపారగూ;

ఉపగన్త్వాన సమ్బుద్ధం, గోతమం సక్యపుఙ్గవం.

౨౭౧. ‘‘‘పుచ్ఛిత్వా నిపుణే పఞ్హే, భావయిత్వాన అఞ్జసం [హాసయిత్వాన మానసం (స్యా.), భావయిత్వాన సఞ్చయం (క.)];

సబ్బాసవే పరిఞ్ఞాయ, విహరిస్సతినాసవో’.

౨౭౨. ‘‘తివిధగ్గి నిబ్బుతా మయ్హం, భవా సబ్బే సమూహతా;

సబ్బాసవే పరిఞ్ఞాయ, విహరామి అనాసవో.

౨౭౩. ‘‘కిలేసా ఝాపితా మయ్హం…పే… విహరామి అనాసవో.

౨౭౪. ‘‘స్వాగతం వత మే ఆసి…పే… కతం బుద్ధస్స సాసనం.

౨౭౫. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా తోదేయ్యో థేరో ఇమా గాథాయో అభాసిత్థాతి.

తోదేయ్యత్థేరస్సాపదానం అట్ఠమం.