౭. హేమకత్థేరఅపదానం

౧౮౩. ‘‘పబ్భారకూటం నిస్సాయ, అనోమో నామ తాపసో;

అస్సమం సుకతం కత్వా, పణ్ణసాలే వసీ తదా.

౧౮౪. ‘‘సిద్ధం తస్స తపో కమ్మం, సిద్ధిపత్తో సకే బలే;

సకసామఞ్ఞవిక్కన్తో, ఆతాపీ నిపకో ముని.

౧౮౫. ‘‘విసారదో ససమయే, పరవాదే చ కోవిదో;

పట్ఠో భూమన్తలిక్ఖమ్హి, ఉప్పాతమ్హి చ కోవిదో.

౧౮౬. ‘‘వీతసోకో నిరారమ్భో, అప్పాహారో అలోలుపో;

లాభాలాభేన సన్తుట్ఠో, ఝాయీ ఝానరతో ముని.

౧౮౭. ‘‘పియదస్సీ నామ సమ్బుద్ధో, అగ్గో కారుణికో ముని;

సత్తే తారేతుకామో సో, కరుణాయ ఫరీ తదా.

౧౮౮. ‘‘బోధనేయ్యం జనం దిస్వా, పియదస్సీ మహాముని;

చక్కవాళసహస్సమ్పి, గన్త్వా ఓవదతే ముని.

౧౮౯. ‘‘మముద్ధరితుకామో సో, మమస్సమముపాగమి;

న దిట్ఠో మే జినో పుబ్బే, న సుతోపి చ కస్సచి.

౧౯౦. ‘‘ఉప్పాతా సుపినా మయ్హం, లక్ఖణా సుప్పకాసితా;

పట్ఠో భూమన్తలిక్ఖమ్హి, నక్ఖత్తపదకోవిదో.

౧౯౧. ‘‘సోహం బుద్ధస్స సుత్వాన, తత్థ చిత్తం పసాదయిం;

తిట్ఠన్తో [భుఞ్జన్తో (సీ. పీ. క.)] వా నిసిన్నో వా, సరామి నిచ్చకాలికం.

౧౯౨. ‘‘మయి ఏవం సరన్తమ్హి, భగవాపి అనుస్సరి;

బుద్ధం అనుస్సరన్తస్స, పీతి మే హోతి తావదే.

౧౯౩. ‘‘కాలఞ్చ పునరాగమ్మ, ఉపేసి మం మహాముని;

సమ్పత్తేపి న జానామి, అయం బుద్ధో మహాముని.

౧౯౪. ‘‘అనుకమ్పకో కారుణికో, పియదస్సీ మహాముని;

సఞ్జానాపేసి అత్తానం, ‘అహం బుద్ధో సదేవకే’.

౧౯౫. ‘‘సఞ్జానిత్వాన సమ్బుద్ధం, పియదస్సిం మహామునిం;

సకం చిత్తం పసాదేత్వా, ఇదం వచనమబ్రవిం.

౧౯౬. ‘‘‘అఞ్ఞే [సబ్బే (స్యా.)] పీఠే చ పల్లఙ్కే, ఆసన్దీసు నిసీదరే;

తువమ్పి సబ్బదస్సావీ, నిసీద రతనాసనే’.

౧౯౭. ‘‘సబ్బరతనమయం పీఠం, నిమ్మినిత్వాన తావదే;

పియదస్సిస్స మునినో, అదాసిం ఇద్ధినిమ్మితం.

౧౯౮. ‘‘రతనే చ నిసిన్నస్స, పీఠకే ఇద్ధినిమ్మితే;

కుమ్భమత్తం జమ్బుఫలం, అదాసిం తావదే అహం.

౧౯౯. ‘‘మమ హాసం జనేత్వాన, పరిభుఞ్జి మహాముని;

తదా చిత్తం పసాదేత్వా, సత్థారం అభివాదయిం.

౨౦౦. ‘‘పియదస్సీ తు భగవా, లోకజేట్ఠో నరాసభో;

రతనాసనమాసీనో, ఇమా గాథా అభాసథ.

౨౦౧. ‘‘‘యో మే రతనమయం పీఠం, అమతఞ్చ ఫలం అదా;

తమహం కిత్తయిస్సామి, సుణాథ మమ భాసతో.

౨౦౨. ‘‘‘సత్తసత్తతి కప్పాని, దేవలోకే రమిస్సతి;

పఞ్చసత్తతిక్ఖత్తుఞ్చ, చక్కవత్తీ భవిస్సతి.

౨౦౩. ‘‘‘ద్వత్తింసక్ఖత్తుం దేవిన్దో, దేవరజ్జం కరిస్సతి;

పదేసరజ్జం విపులం, గణనాతో అసఙ్ఖియం.

౨౦౪. ‘‘‘సోణ్ణమయం రూపిమయం, పల్లఙ్కం సుకతం బహుం;

లోహితఙ్గమయఞ్చేవ, లచ్ఛతి రతనామయం.

౨౦౫. ‘‘‘చఙ్కమన్తమ్పి మనుజం, పుఞ్ఞకమ్మసమఙ్గినం;

పల్లఙ్కాని అనేకాని, పరివారేస్సరే తదా.

౨౦౬. ‘‘‘కూటాగారా చ పాసాదా, సయనఞ్చ మహారహం;

ఇమస్స చిత్తమఞ్ఞాయ, నిబ్బత్తిస్సన్తి తావదే.

౨౦౭. ‘‘‘సట్ఠి నాగసహస్సాని, సబ్బాలఙ్కారభూసితా;

సువణ్ణకచ్ఛా మాతఙ్గా, హేమకప్పనవాససా [హేమకప్పనివాసనా (సీ. స్యా.), హేమకప్పనివాససా (క.)].

౨౦౮. ‘‘‘ఆరూళ్హా గామణీయేహి, తోమరఙ్కుసపాణిభి;

ఇమం పరిచరిస్సన్తి, రత్నపీఠస్సిదం ఫలం.

౨౦౯. ‘‘‘సట్ఠి అస్ససహస్సాని, సబ్బాలఙ్కారభూసితా;

ఆజానీయావ జాతియా, సిన్ధవా సీఘవాహినో.

౨౧౦. ‘‘‘ఆరూళ్హా గామణీయేహి, ఇల్లియాచాపధారిభి;

తేపిమం పరిచరిస్సన్తి, రత్నపీఠస్సిదం ఫలం.

౨౧౧. ‘‘‘సట్ఠి రథసహస్సాని, సబ్బాలఙ్కారభూసితా;

దీపా అథోపి వేయగ్ఘా, సన్నద్ధా ఉస్సితద్ధజా.

౨౧౨. ‘‘‘ఆరూళ్హా గామణీయేహి, చాపహత్థేహి వమ్మిభి;

పరివారేస్సన్తిమం నిచ్చం, రత్నపీఠస్సిదం ఫలం.

౨౧౩. ‘‘‘సట్ఠి ధేనుసహస్సాని, దోహఞ్ఞా పుఙ్గవూసభే;

వచ్ఛకే జనయిస్సన్తి, రత్నపీఠస్సిదం ఫలం.

౨౧౪. ‘‘‘సోళసిత్థిసహస్సాని, సబ్బాలఙ్కారభూసితా;

విచిత్తవత్థాభరణా, ఆముక్కమణికుణ్డలా.

౨౧౫. ‘‘‘అళారపమ్హా హసులా, సుసఞ్ఞా తనుమజ్ఝిమా;

పరివారేస్సన్తిమం నిచ్చం, రత్నపీఠస్సిదం ఫలం.

౨౧౬. ‘‘‘అట్ఠారసే కప్పసతే, గోతమో నామ చక్ఖుమా;

తమన్ధకారం విధమిత్వా, బుద్ధో లోకే భవిస్సతి.

౨౧౭. ‘‘‘తస్స దస్సనమాగమ్మ, పబ్బజిస్సతికిఞ్చనో;

తోసయిత్వాన సత్థారం, సాసనేభిరమిస్సతి.

౨౧౮. ‘‘‘తస్స ధమ్మం సుణిత్వాన, కిలేసే ఘాతయిస్సతి;

సబ్బాసవే పరిఞ్ఞాయ, నిబ్బాయిస్సతినాసవో’.

౨౧౯. ‘‘వీరియం మే ధురధోరయ్హం, యోగక్ఖేమాధివాహనం;

ఉత్తమత్థం పత్థయన్తో, సాసనే విహరామహం.

౨౨౦. ‘‘ఇదం పచ్ఛిమకం మయ్హం, చరిమో వత్తతే భవో;

సబ్బాసవా పరిక్ఖీణా, నత్థి దాని పునబ్భవో.

౨౨౧. ‘‘కిలేసా ఝాపితా మయ్హం…పే… విహరామి అనాసవో.

౨౨౨. ‘‘స్వాగతం వత మే ఆసి…పే… కతం బుద్ధస్స సాసనం.

౨౨౩. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా హేమకో థేరో ఇమా గాథాయో అభాసిత్థాతి;

హేమకత్థేరస్సాపదానం సత్తమం.

సత్తరసమం భాణవారం.