౬. నన్దకత్థేరఅపదానం

౧౬౧. ‘‘మిగలుద్దో పురే ఆసిం, అరఞ్ఞే కాననే అహం;

పసదం మిగమేసన్తో, సయమ్భుం అద్దసం అహం [జినం (సీ.)].

౧౬౨. ‘‘అనురుద్ధో నామ సమ్బుద్ధో, సయమ్భూ అపరాజితో;

వివేకకామో సో ధీరో, వనమజ్ఝోగహీ తదా.

౧౬౩. ‘‘చతుదణ్డే గహేత్వాన, చతుట్ఠానే ఠపేసహం;

మణ్డపం సుకతం కత్వా, పద్మపుప్ఫేహి ఛాదయిం.

౧౬౪. ‘‘మణ్డపం ఛాదయిత్వాన, సయమ్భుం అభివాదయిం;

ధనుం తత్థేవ నిక్ఖిప్ప, పబ్బజిం అనగారియం.

౧౬౫. ‘‘నచిరం పబ్బజితస్స [పబ్బజితస్స అచిరం (సీ.)], బ్యాధి మే ఉదపజ్జథ;

పుబ్బకమ్మం సరిత్వాన, తత్థ కాలఙ్కతో అహం.

౧౬౬. ‘‘పుబ్బకమ్మేన సంయుత్తో, తుసితం అగమాసహం;

తత్థ సోణ్ణమయం బ్యమ్హం, నిబ్బత్తతి యదిచ్ఛకం.

౧౬౭. ‘‘సహస్సయుత్తం హయవాహిం, దిబ్బయానమధిట్ఠితో;

ఆరుహిత్వాన తం యానం, గచ్ఛామహం యదిచ్ఛకం.

౧౬౮. ‘‘తతో మే నియ్యమానస్స, దేవభూతస్స మే సతో;

సమన్తా యోజనసతం, మణ్డపో మే ధరీయతి.

౧౬౯. ‘‘సయనేహం తువట్టామి, అచ్ఛన్నే [అచ్చన్తం (సీ.), అచ్చన్త (పీ.)] పుప్ఫసన్థతే;

అన్తలిక్ఖా చ పదుమా, వస్సన్తే నిచ్చకాలికం.

౧౭౦. ‘‘మరీచికే ఫన్దమానే, తప్పమానే చ ఆతపే;

న మం తాపేతి ఆతాపో, మణ్డపస్స ఇదం ఫలం.

౧౭౧. ‘‘దుగ్గతిం సమతిక్కన్తో, అపాయా పిహితా మమ;

మణ్డపే రుక్ఖమూలే వా, సన్తాపో మే న విజ్జతి.

౧౭౨. ‘‘మహీసఞ్ఞం అధిట్ఠాయ, లోణతోయం తరామహం;

తస్స మే సుకతం కమ్మం, బుద్ధపూజాయిదం ఫలం.

౧౭౩. ‘‘అపథమ్పి [అబ్భమ్హి (స్యా. క.)] పథం కత్వా, గచ్ఛామి అనిలఞ్జసే;

అహో మే సుకతం కమ్మం, బుద్ధపూజాయిదం ఫలం.

౧౭౪. ‘‘పుబ్బేనివాసం జానామి, దిబ్బచక్ఖు విసోధితం;

ఆసవా మే పరిక్ఖీణా, బుద్ధపూజాయిదం ఫలం.

౧౭౫. ‘‘జహితా పురిమా జాతి, బుద్ధస్స ఓరసో అహం;

దాయాదోమ్హి చ సద్ధమ్మే, బుద్ధపూజాయిదం ఫలం.

౧౭౬. ‘‘ఆరాధితోమ్హి సుగతం, గోతమం సక్యపుఙ్గవం;

ధమ్మధజో ధమ్మదాయాదో [ధమ్మాదాసో (క.)], బుద్ధపూజాయిదం ఫలం.

౧౭౭. ‘‘ఉపట్ఠిత్వాన సమ్బుద్ధం, గోతమం సక్యపుఙ్గవం;

పారఙ్గమనియం మగ్గం, అపుచ్ఛిం లోకనాయకం.

౧౭౮. ‘‘అజ్ఝిట్ఠో కథయీ బుద్ధో, గమ్భీరం నిపుణం పదం;

తస్సాహం ధమ్మం సుత్వాన, పత్తోమ్హి ఆసవక్ఖయం.

౧౭౯. ‘‘అహో మే సుకతం కమ్మం, పరిముత్తోమ్హి జాతియా;

సబ్బాసవపరిక్ఖీణో, నత్థి దాని పునబ్భవో.

౧౮౦. ‘‘కిలేసా ఝాపితా మయ్హం…పే… విహరామి అనాసవో.

౧౮౧. ‘‘స్వాగతం వత మే ఆసి…పే… కతం బుద్ధస్స సాసనం.

౧౮౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా నన్దకో థేరో ఇమా గాథాయో అభాసిత్థాతి.

నన్దకత్థేరస్సాపదానం ఛట్ఠం.