౫. ఉపసీవత్థేరఅపదానం
౧౦౦. ‘‘హిమవన్తస్సావిదూరే, అనోమో నామ పబ్బతో;
అస్సమో సుకతో మయ్హం, పణ్ణసాలా సుమాపితా.
౧౦౧. ‘‘నదీ చ సన్దతీ తత్థ, సుపతిత్థా మనోరమా;
అనూపతిత్థే జాయన్తి, పదుముప్పలకా బహూ.
౧౦౨. ‘‘పాఠీనా పావుసా మచ్ఛా, బలజా ముఞ్జరోహితా;
మచ్ఛకచ్ఛపసఞ్ఛన్నా [మచ్ఛకచ్ఛపసమ్పన్నా (?)], నదికా సన్దతే తదా.
౧౦౩. ‘‘తిమిరా పుప్ఫితా తత్థ, అసోకా ఖుద్దమాలకా;
పున్నాగా గిరిపున్నాగా, సమ్పవన్తి మమస్సమం.
౧౦౪. ‘‘కుటజా పుప్ఫితా తత్థ, తిణసూలవనాని చ;
సాలా చ సళలా తత్థ, చమ్పకా పుప్ఫితా బహూ.
౧౦౫. ‘‘అజ్జునా అతిముత్తా చ, మహానామా చ పుప్ఫితా;
అసనా మధుగన్ధీ చ, పుప్ఫితా తే మమస్సమే.
౧౦౬. ‘‘ఉద్దాలకా పాటలికా, యూథికా చ పియఙ్గుకా;
బిమ్బిజాలకసఞ్ఛన్నా, సమన్తా అడ్ఢయోజనం.
౧౦౭. ‘‘మాతగ్గారా [మాతఙ్గవా (సీ.), మాతకరా (స్యా.), మాతఙ్గా వా (పీ.)] సత్తలియో, పాటలీ సిన్దువారకా;
అఙ్కోలకా బహూ తత్థ, తాలకుట్ఠి [తాలకూటా (సీ. స్యా.), తాలకుట్ఠా (పీ.)] చ పుప్ఫితా;
సేలేయ్యకా బహూ తత్థ, పుప్ఫితా మమ అస్సమే.
౧౦౮. ‘‘ఏతేసు పుప్ఫజాతేసు [పుప్ఫమానేసు (సీ. పీ.)], సోభన్తి పాదపా బహూ;
సమన్తా తేన గన్ధేన, వాయతే మమ అస్సమో.
౧౦౯. ‘‘హరీతకా ఆమలకా, అమ్బజమ్బువిభీతకా [విభిటకా (సీ.)];
కోలా భల్లాతకా బిల్లా, ఫారుసకఫలాని చ.
౧౧౦. ‘‘తిన్దుకా చ పియాలా చ, మధుకా కాసుమారయో;
లబుజా పనసా తత్థ, కదలీ బదరీఫలా [మన్దరిఫలా (క.), చన్దరీఫలా (స్యా. పీ.)].
౧౧౧. ‘‘అమ్బాటకా బహూ తత్థ, వల్లికారఫలాని చ;
బీజపూరసపారియో [చిరసంరసపాకా చ (స్యా.), విటపా చ సపాకా చ (పీ), విదపరపదాదయో (క.)], ఫలితా మమ అస్సమే.
౧౧౨. ‘‘ఆళకా ఇసిముగ్గా చ, తతో మోదఫలా బహూ;
అవటా పక్కభరితా [సక్కరారితా (క.)], పిలక్ఖుదుమ్బరాని చ.
౧౧౩. ‘‘పిప్ఫిలీ మరీచా తత్థ, నిగ్రోధా చ కపిత్థనా;
ఉదుమ్బరకా బహవో, కణ్డుపణ్ణా చ హరియో [కణ్డపక్కా చ పారియో (సీ. స్యా. పీ.)].
౧౧౪. ‘‘ఏతే చఞ్ఞే చ బహవో, ఫలితా అస్సమే మమ;
పుప్ఫరుక్ఖాపి బహవో, పుప్ఫితా మమ అస్సమే.
౧౧౫. ‘‘ఆలువా చ కళమ్బా చ, బిళాలీ తక్కలాని చ;
ఆలకా తాలకా చేవ, విజ్జన్తి అస్సమే మమ.
౧౧౬. ‘‘అస్సమస్సావిదూరే మే, మహాజాతస్సరో అహు;
అచ్ఛోదకో సీతజలో, సుపతిత్థో మనోరమో.
౧౧౭. ‘‘పదుముప్పలా బహూ తత్థ, పుణ్డరీకసమాయుతా;
మన్దాలకేహి సఞ్ఛన్నా, నానాగన్ధసమేరితా.
౧౧౮. ‘‘గబ్భం గణ్హన్తి పదుమా, అఞ్ఞే పుప్ఫన్తి కేసరీ;
ఓపుప్ఫపత్తా తిట్ఠన్తి, పదుమాకణ్ణికా బహూ.
౧౧౯. ‘‘మధు భిసమ్హా సవతి, ఖీరం సప్పి ములాళిభి;
సమన్తా తేన గన్ధేన, నానాగన్ధసమేరితా.
౧౨౦. ‘‘కుముదా అమ్బగన్ధి చ, నయితా దిస్సరే బహూ;
జాతస్సరస్సానుకూలం, కేతకా పుప్ఫితా బహూ.
౧౨౧. ‘‘సుఫుల్లా బన్ధుజీవా చ, సేతవారీ సుగన్ధికా;
కుమ్భిలా సుసుమారా చ, గహకా తత్థ జాయరే.
౧౨౨. ‘‘ఉగ్గాహకా అజగరా, తత్థ జాతస్సరే బహూ;
పాఠీనా పావుసా మచ్ఛా, బలజా ముఞ్జరోహితా.
౧౨౩. ‘‘మచ్ఛకచ్ఛపసఞ్ఛన్నా, అథో పపటకాహి [పమ్పటకేహి (సీ.), సపటకేహి (స్యా.), పప్పటకేహి (పీ)] చ;
పారేవతా రవిహంసా, కుకుత్థా [కుక్కుత్థా (స్యా. క.), కుత్థకా (పీ.)] చ నదీచరా.
౧౨౪. ‘‘దిన్దిభా [టిట్టిభా (పీ.)] చక్కవాకా చ, పమ్పకా జీవజీవకా;
కలన్దకా ఉక్కుసా చ, సేనకా ఉద్ధరా బహూ.
౧౨౫. ‘‘కోట్ఠకా సుకపోతా చ, తులియా చమరా బహూ;
కారేనియో [కాసేనియా (స్యా.)] చ తిలకా [కిలకా (క.)], ఉపజీవన్తి తం సరం.
౧౨౬. ‘‘సీహా బ్యగ్ఘా చ దీపీ చ, అచ్ఛకోకతరచ్ఛకా;
వానరా కిన్నరా చేవ, దిస్సన్తి మమ అస్సమే.
౧౨౭. ‘‘తాని గన్ధాని ఘాయన్తో, భక్ఖయన్తో ఫలానహం;
గన్ధోదకం పివన్తో చ, వసామి మమ అస్సమే.
౧౨౮. ‘‘ఏణీమిగా వరాహా చ, పసదా ఖుద్దరూపకా;
అగ్గికా జోతికా చేవ, వసన్తి మమ అస్సమే.
౧౨౯. ‘‘హంసా కోఞ్చా మయూరా చ, సాలికాపి చ కోకిలా;
మజ్జారికా [మఞ్జరికా (సీ. స్యా. పీ.)] బహూ తత్థ, కోసికా పోట్ఠసీసకా.
౧౩౦. ‘‘పిసాచా దానవా చేవ, కుమ్భణ్డా రక్ఖసా బహూ;
గరుళా పన్నగా చేవ, వసన్తి మమ అస్సమే.
౧౩౧. ‘‘మహానుభావా ఇసయో, సన్తచిత్తా సమాహితా;
కమణ్డలుధరా సబ్బే, అజినుత్తరవాసనా;
జటాభారభరితావ [తే జటాభారభరితా (సీ. పీ.), జటాభారభరితా చ (స్యా.)], వసన్తి మమ అస్సమే.
౧౩౨. ‘‘యుగమత్తఞ్చ పేక్ఖన్తా, నిపకా సన్తవుత్తినో;
లాభాలాభేన సన్తుట్ఠా, వసన్తి మమ అస్సమే.
౧౩౩. ‘‘వాకచీరం ధునన్తా తే, ఫోటేన్తాజినచమ్మకం;
సబలేహి ఉపత్థద్ధా, గచ్ఛన్తి అమ్బరే తదా.
౧౩౪. ‘‘న తే దకం ఆహరన్తి, కట్ఠం వా అగ్గిదారుకం;
సయఞ్చ ఉపసమ్పన్నా, పాటిహీరస్సిదం ఫలం.
౧౩౫. ‘‘లోహదోణిం గహేత్వాన, వనమజ్ఝే వసన్తి తే;
కుఞ్జరావ మహానాగా, అసమ్భీతావ కేసరీ.
౧౩౬. ‘‘అఞ్ఞే గచ్ఛన్తి గోయానం, అఞ్ఞే పుబ్బవిదేహకం [పుబ్బవిదేహనం (స్యా. పీ. క.)];
అఞ్ఞే చ ఉత్తరకురుం, సకం బలమవస్సితా [బలమపస్సితా (స్యా. పీ. క.)].
౧౩౭. ‘‘తతో పిణ్డం ఆహరిత్వా, పరిభుఞ్జన్తి ఏకతో;
సబ్బేసం పక్కమన్తానం, ఉగ్గతేజాన తాదినం.
౧౩౮. ‘‘అజినచమ్మసద్దేన, వనం సద్దాయతే తదా;
ఏదిసా తే మహావీర, సిస్సా ఉగ్గతపా మమ.
౧౩౯. ‘‘పరివుతో అహం తేహి, వసామి మమ అస్సమే;
తోసితా సకకమ్మేన, వినీతాపి సమాగతా.
౧౪౦. ‘‘ఆరాధయింసు మం ఏతే, సకకమ్మాభిలాసినో;
సీలవన్తో చ నిపకా, అప్పమఞ్ఞాసు కోవిదా.
౧౪౧. ‘‘పదుముత్తరో లోకవిదూ, ఆహుతీనం పటిగ్గహో;
సమయం సంవిదిత్వాన, ఉపగచ్ఛి వినాయకో.
౧౪౨. ‘‘ఉపగన్త్వాన సమ్బుద్ధో, ఆతాపీ నిపకో ముని;
పత్తం పగ్గయ్హ సమ్బుద్ధో, భిక్ఖాయ మముపాగమి.
౧౪౩. ‘‘ఉపాగతం మహావీరం, జలజుత్తమనాయకం;
తిణసన్థరం [తిణత్థరం (స్యా.), తిణత్థతం (క.)] పఞ్ఞాపేత్వా, సాలపుప్ఫేహి ఓకిరిం.
౧౪౪. ‘‘నిసాదేత్వాన [నిసీదేత్వాన (సీ.), నిసీదిత్వాన (స్యా. పీ.)] సమ్బుద్ధం, హట్ఠో సంవిగ్గమానసో;
ఖిప్పం పబ్బతమారుయ్హ, అగళుం [అగరుం (సీ.)] అగ్గహిం అహం.
౧౪౫. ‘‘కుమ్భమత్తం గహేత్వాన, పనసం దేవగన్ధికం;
ఖన్ధే ఆరోపయిత్వాన, ఉపగచ్ఛిం వినాయకం.
౧౪౬. ‘‘ఫలం బుద్ధస్స దత్వాన, అగళుం అనులిమ్పహం;
పసన్నచిత్తో సుమనో, బుద్ధసేట్ఠం అవన్దిహం.
౧౪౭. ‘‘పదుముత్తరో లోకవిదూ, ఆహుతీనం పటిగ్గహో;
ఇసిమజ్ఝే నిసీదిత్వా, ఇమా గాథా అభాసథ.
౧౪౮. ‘‘‘యో మే ఫలఞ్చ అగళుం, ఆసనఞ్చ అదాసి మే;
తమహం కిత్తయిస్సామి, సుణాథ మమ భాసతో.
౧౪౯. ‘‘‘గామే వా యది వారఞ్ఞే, పబ్భారేసు గుహాసు వా;
ఇమస్స చిత్తమఞ్ఞాయ, నిబ్బత్తిస్సతి భోజనం.
౧౫౦. ‘‘‘దేవలోకే మనుస్సే వా, ఉపపన్నో అయం నరో;
భోజనేహి చ వత్థేహి, పరిసం తప్పయిస్సతి.
౧౫౧. ‘‘‘ఉపపజ్జతి యం యోనిం, దేవత్తం అథ మానుసం;
అక్ఖోభభోగో హుత్వాన, సంసరిస్సతియం నరో.
౧౫౨. ‘‘‘తింసకప్పసహస్సాని, దేవలోకే రమిస్సతి;
సహస్సక్ఖత్తుం రాజా చ, చక్కవత్తీ భవిస్సతి.
౧౫౩. ‘‘‘ఏకసత్తతిక్ఖత్తుఞ్చ, దేవరజ్జం కరిస్సతి;
పదేసరజ్జం విపులం, గణనాతో అసఙ్ఖియం.
౧౫౪. ‘‘‘కప్పసతసహస్సమ్హి, ఓక్కాకకులసమ్భవో;
గోతమో నామ గోత్తేన, సత్థా లోకే భవిస్సతి.
౧౫౫. ‘‘‘తస్స ధమ్మేసు దాయాదో, ఓరసో ధమ్మనిమ్మితో [(ఉపసీవో నామ నామేన, హేస్సతి సత్థు సావకో) (స్యా.)];
సబ్బాసవే పరిఞ్ఞాయ, విహరిస్సతినాసవో’.
౧౫౬. ‘‘సులద్ధలాభో లద్ధో మే, యోహం అద్దక్ఖిం నాయకం;
తిస్సో విజ్జా అనుప్పత్తా, కతం బుద్ధస్స సాసనం.
౧౫౭. ‘‘గామే వా యది వారఞ్ఞే, పబ్భారేసు గుహాసు వా;
మమ సఙ్కప్పమఞ్ఞాయ, భోజనం హోతి మే సదా.
౧౫౮. ‘‘కిలేసా ఝాపితా మయ్హం…పే… విహరామి అనాసవో.
౧౫౯. ‘‘స్వాగతం వత మే ఆసి…పే… కతం బుద్ధస్స సాసనం.
౧౬౦. ‘‘పటిసమ్భిదా చతస్సో…పే… కతం బుద్ధస్స సాసనం’’.
ఇత్థం సుదం ఆయస్మా ఉపసీవో [ఉపసివో (క.)] థేరో ఇమా గాథాయో అభాసిత్థాతి.
ఉపసీవత్థేరస్సాపదానం పఞ్చమం.