౪. ధోతకత్థేరఅపదానం

౭౨. ‘‘గఙ్గా భాగీరథీ నామ, హిమవన్తా పభావితా [హిమవన్తప్పభావితా (సీ.)];

హంసవతియా ద్వారేన, అనుసన్దతి తావదే.

౭౩. ‘‘సోభితో నామ ఆరామో, గఙ్గాకూలే సుమాపితో;

తత్థ పదుముత్తరో బుద్ధో, వసతే లోకనాయకో.

౭౪. ‘‘తిదసేహి యథా ఇన్దో, మనుజేహి పురక్ఖతో;

నిసీది తత్థ భగవా, అసమ్భీతోవ కేసరీ.

౭౫. ‘‘నగరే హంసవతియా, వసామి [అహోసిం (స్యా.)] బ్రాహ్మణో అహం;

ఛళఙ్గో నామ నామేన, ఏవంనామో మహాముని.

౭౬. ‘‘అట్ఠారస సిస్ససతా, పరివారేన్తి మం తదా;

తేహి సిస్సేహి సమితో, గఙ్గాతీరం ఉపాగమిం.

౭౭. ‘‘తత్థద్దసాసిం సమణే, నిక్కుహే ధోతపాపకే;

భాగీరథిం తరన్తేహం [తరన్తోహం (స్యా. పీ.)], ఏవం చిన్తేసి తావదే.

౭౮. ‘‘సాయం పాతం [సాయపాతం (పీ.)] తరన్తామే, బుద్ధపుత్తా మహాయసా;

విహేసయన్తి అత్తానం, తేసం అత్తా విహఞ్ఞతి.

౭౯. ‘‘సదేవకస్స లోకస్స, బుద్ధో అగ్గో పవుచ్చతి;

నత్థి మే దక్ఖిణే కారం, గతిమగ్గవిసోధనం.

౮౦. ‘‘యంనూన బుద్ధసేట్ఠస్స, సేతుం గఙ్గాయ కారయే;

కారాపేత్వా ఇమం కమ్మం [సేతుం (స్యా.)], సన్తరామి ఇమం భవం.

౮౧. ‘‘సతసహస్సం దత్వాన, సేతుం కారాపయిం అహం;

సద్దహన్తో కతం కారం, విపులం మే భవిస్సతి.

౮౨. ‘‘కారాపేత్వాన తం సేతుం, ఉపేసిం లోకనాయకం;

సిరసి అఞ్జలిం కత్వా, ఇమం వచనమబ్రవిం.

౮౩. ‘‘‘సతసహస్సస్స వయం [వయం సతసహస్సంవ (క.)], దత్వా [కత్వా (సీ. పీ.)] కారాపితో మయా;

తవత్థాయ మహాసేతు, పటిగ్గణ్హ మహామునే.

౮౪. ‘‘‘పదుముత్తరో లోకవిదూ, ఆహుతీనం పటిగ్గహో;

భిక్ఖుసఙ్ఘే నిసీదిత్వా, ఇమా గాథా అభాసథ.

౮౫. ‘‘‘యో మే సేతుం అకారేసి, పసన్నో సేహి పాణిభి;

తమహం కిత్తయిస్సామి, సుణాథ మమ భాసతో.

(సేతుదానఆనిసంసో)

౮౬. ‘‘‘దరితో పబ్బతతో వా, రుక్ఖతో పతితోపియం;

చుతోపి లచ్ఛతీ ఠానం, సేతుదానస్సిదం ఫలం.

౮౭. ‘‘‘విరూళ్హమూలసన్తానం, నిగ్రోధమివ మాలుతో;

అమిత్తా నప్పసహన్తి, సేతుదానస్సిదం ఫలం.

౮౮. ‘‘‘నాస్స చోరా పసహన్తి, నాతిమఞ్ఞన్తి ఖత్తియా;

సబ్బే తరిస్సతామిత్తే, సేతుదానస్సిదం ఫలం.

౮౯. ‘‘‘అబ్భోకాసగతం సన్తం, కఠినాతపతాపితం;

పుఞ్ఞకమ్మేన సంయుత్తం, న భవిస్సతి వేదనా [తావదే (క.)].

౯౦. ‘‘‘దేవలోకే మనుస్సే వా, హత్థియానం సునిమ్మితం;

తస్స సఙ్కప్పమఞ్ఞాయ, నిబ్బత్తిస్సతి తావదే.

౯౧. ‘‘‘సహస్సస్సా వాతజవా, సిన్ధవా సీఘవాహనా;

సాయం పాతం ఉపేస్సన్తి, సేతుదానస్సిదం ఫలం.

౯౨. ‘‘‘ఆగన్త్వాన మనుస్సత్తం, సుఖితోయం భవిస్సతి;

వేహాసం [ఇహాపి (సీ. స్యా. పీ.)] మనుజస్సేవ, హత్థియానం భవిస్సతి.

౯౩. ‘‘‘కప్పసతసహస్సమ్హి, ఓక్కాకకులసమ్భవో;

గోతమో నామ గోత్తేన, సత్థా లోకే భవిస్సతి.

౯౪. ‘‘‘తస్స ధమ్మేసు దాయాదో, ఓరసో ధమ్మనిమ్మితో;

సబ్బాసవే పరిఞ్ఞాయ, నిబ్బాయిస్సతినాసవో’.

౯౫. ‘‘అహో మే సుకతం కమ్మం, జలజుత్తమనామకే;

తత్థ కారం కరిత్వాన, పత్తోహం ఆసవక్ఖయం.

౯౬. ‘‘పధానం పహితత్తోమ్హి, ఉపసన్తో నిరూపధి;

నాగోవ బన్ధనం ఛేత్వా, విహరామి అనాసవో.

౯౭. ‘‘కిలేసా ఝాపితా మయ్హం…పే… విహరామి అనాసవో.

౯౮. ‘‘స్వాగతం వత మే ఆసి…పే… కతం బుద్ధస్స సాసనం.

౯౯. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా ధోతకో థేరో ఇమా గాథాయో అభాసిత్థాతి.

ధోతకత్థేరస్సాపదానం చతుత్థం.