౧. తిస్సమేత్తేయ్యత్థేరఅపదానం

౧. ‘‘పబ్భారకూటం నిస్సాయ, సోభితో నామ తాపసో;

పవత్తఫలం భుఞ్జిత్వా, వసతి పబ్బతన్తరే.

౨. ‘‘అగ్గిం దారుం ఆహరిత్వా, ఉజ్జాలేసిం అహం తదా;

ఉత్తమత్థం గవేసన్తో, బ్రహ్మలోకూపపత్తియా.

౩. ‘‘పదుముత్తరో లోకవిదూ, ఆహుతీనం పటిగ్గహో;

మముద్ధరితుకామో సో, ఆగచ్ఛి మమ సన్తికే.

౪. ‘‘కిం కరోసి మహాపుఞ్ఞ, దేహి మే అగ్గిదారుకం;

అహమగ్గిం పరిచరే, తతో మే సుద్ధి హోహితి [హేహితి (సీ.)].

౫. ‘‘సుభద్దకో త్వం మనుజే, దేవతే త్వం పజానసి;

తువం అగ్గిం పరిచర, హన్ద తే అగ్గిదారుకం.

౬. ‘‘తతో కట్ఠం గహేత్వాన, అగ్గిం ఉజ్జాలయీ జినో;

న తత్థ కట్ఠం పజ్ఝాయి, పాటిహేరం మహేసినో.

౭. ‘‘న తే అగ్గి పజ్జలతి, ఆహుతీ తే న విజ్జతి;

నిరత్థకం వతం తుయ్హం, అగ్గిం పరిచరస్సు మే.

౮. ‘‘కీదిసో సో [తే (స్యా. క.)] మహావీర, అగ్గి తవ పవుచ్చతి;

మయ్హమ్పి కథయస్సేతం, ఉభో పరిచరామసే.

౯. ‘‘హేతుధమ్మనిరోధాయ, కిలేససమణాయ చ;

ఇస్సామచ్ఛరియం హిత్వా, తయో ఏతే మమాహుతీ.

౧౦. ‘‘కీదిసో త్వం మహావీర, కథం గోత్తోసి మారిస;

ఆచారపటిపత్తి తే, బాళ్హం ఖో మమ రుచ్చతి.

౧౧. ‘‘ఖత్తియమ్హి కులే జాతో, అభిఞ్ఞాపారమిం గతో;

సబ్బాసవపరిక్ఖీణో, నత్థి దాని పునబ్భవో.

౧౨. ‘‘యది బుద్ధోసి సబ్బఞ్ఞూ, పభఙ్కర తమోనుద;

నమస్సిస్సామి తం దేవ, దుక్ఖస్సన్తకరో తువం.

౧౩. ‘‘పత్థరిత్వాజినచమ్మం, నిసీదనమదాసహం;

నిసీద నాథ సబ్బఞ్ఞు, ఉపట్ఠిస్సామహం తువం.

౧౪. ‘‘నిసీది భగవా తత్థ, అజినమ్హి సువిత్థతే;

నిమన్తయిత్వా సమ్బుద్ధం, పబ్బతం అగమాసహం.

౧౫. ‘‘ఖారిభారఞ్చ పూరేత్వా, తిన్దుకఫలమాహరిం;

మధునా యోజయిత్వాన, ఫలం బుద్ధస్సదాసహం.

౧౬. ‘‘మమ నిజ్ఝాయమానస్స, పరిభుఞ్జి తదా జినో;

తత్థ చిత్తం పసాదేసిం, పేక్ఖన్తో లోకనాయకం.

౧౭. ‘‘పదుముత్తరో లోకవిదూ, ఆహుతీనం పటిగ్గహో;

మమస్సమే నిసీదిత్వా, ఇమా గాథా అభాసథ.

౧౮. ‘‘‘యో మం ఫలేన తప్పేసి, పసన్నో సేహి పాణిభి;

తమహం కిత్తయిస్సామి, సుణాథ మమ భాసతో.

౧౯. ‘‘‘పఞ్చవీసతిక్ఖత్తుం సో, దేవరజ్జం కరిస్సతి;

సహస్సక్ఖత్తుం రాజా చ, చక్కవత్తీ భవిస్సతి.

౨౦. ‘‘‘తస్స సఙ్కప్పమఞ్ఞాయ, పుబ్బకమ్మసమఙ్గినో;

అన్నం పానఞ్చ వత్థఞ్చ, సయనఞ్చ మహారహం.

౨౧. ‘‘‘పుఞ్ఞకమ్మేన సంయుత్తా, నిబ్బత్తిస్సన్తి తావదే;

సదా పముదితో చాయం, భవిస్సతి అనామయో.

౨౨. ‘‘‘ఉపపజ్జతి యం యోనిం, దేవత్తం అథ మానుసం;

సబ్బత్థ సుఖితో హుత్వా, మనుస్సత్తం గమిస్సతి.

౨౩. ‘‘‘అజ్ఝాయకో మన్తధరో, తిణ్ణం వేదాన పారగూ;

సమ్బుద్ధం ఉపగన్త్వాన, అరహా సో భవిస్సతి’.

౨౪. ‘‘యతో సరామి అత్తానం, యతో పత్తోస్మి విఞ్ఞుతం;

భోగే మే ఊనతా నత్థి, ఫలదానస్సిదం ఫలం.

౨౫. ‘‘వరధమ్మమనుప్పత్తో, రాగదోసే సమూహనిం;

సబ్బాసవపరిక్ఖీణో, నత్థి దాని పునబ్భవో.

౨౬. ‘‘కిలేసా ఝాపితా మయ్హం, భవా సబ్బే సమూహతా;

నాగోవ బన్ధనం ఛేత్వా, విహరామి అనాసవో.

౨౭. ‘‘స్వాగతం వత మే ఆసి, మమ బుద్ధస్స సన్తికే;

తిస్సో విజ్జా అనుప్పత్తా, కతం బుద్ధస్స సాసనం.

౨౮. ‘‘పటిసమ్భిదా చతస్సో, విమోక్ఖాపి చ అట్ఠిమే;

ఛళభిఞ్ఞా సచ్ఛికతా, కతం బుద్ధస్స సాసనం’’.

ఇత్థం సుదం ఆయస్మా తిస్సమేత్తేయ్యో థేరో ఇమా గాథాయో అభాసిత్థాతి.

తిస్సమేత్తేయ్యత్థేరస్సాపదానం పఠమం.