౨. పుణ్ణకత్థేరఅపదానం

౨౯. ‘‘పబ్భారకూటం నిస్సాయ, సయమ్భూ అపరాజితో;

ఆబాధికో చ సో [ఆబాధికో గరు (సీ.)] బుద్ధో, వసతి పబ్బతన్తరే.

౩౦. ‘‘మమ అస్సమసామన్తా, పనాదో ఆసి తావదే;

బుద్ధే నిబ్బాయమానమ్హి, ఆలోకో ఉదపజ్జథ [ఆసి తావదే (స్యా. క.)].

౩౧. ‘‘యావతా వనసణ్డస్మిం, అచ్ఛకోకతరచ్ఛకా;

వాళా చ [బ్యగ్ఘా (సీ.)] కేసరీ సబ్బే, అభిగజ్జింసు తావదే.

౩౨. ‘‘ఉప్పాతం తమహం దిస్వా, పబ్భారం అగమాసహం;

తత్థద్దస్సాసిం సమ్బుద్ధం, నిబ్బుతం అపరాజితం.

౩౩. ‘‘సుఫుల్లం సాలరాజంవ, సతరంసింవ ఉగ్గతం;

వీతచ్చికంవ అఙ్గారం, నిబ్బుతం అపరాజితం.

౩౪. ‘‘తిణం కట్ఠఞ్చ పూరేత్వా, చితకం తత్థకాసహం;

చితకం సుకతం కత్వా, సరీరం ఝాపయిం అహం.

౩౫. ‘‘సరీరం ఝాపయిత్వాన, గన్ధతోయం సమోకిరిం;

అన్తలిక్ఖే ఠితో యక్ఖో, నామమగ్గహి తావదే.

౩౬. ‘‘యం పూరితం [తం పూరితం (స్యా.), సప్పురిస (క.)] తయా కిచ్చం, సయమ్భుస్స మహేసినో;

పుణ్ణకో నామ నామేన, సదా హోహి తువం [యదా హోసి తువం (స్యా.), సదా హోహితి త్వం (క.)] మునే.

౩౭. ‘‘తమ్హా కాయా చవిత్వాన, దేవలోకం అగచ్ఛహం;

తత్థ దిబ్బమయో గన్ధో, అన్తలిక్ఖా పవస్సతి [అన్తలిక్ఖే పవాయతి (సీ.)].

౩౮. ‘‘తత్రాపి నామధేయ్యం మే, పుణ్ణకోతి అహూ తదా;

దేవభూతో మనుస్సో వా, సఙ్కప్పం పూరయామహం.

౩౯. ‘‘ఇదం పచ్ఛిమకం మయ్హం, చరిమో వత్తతే భవో;

ఇధాపి పుణ్ణకో నామ, నామధేయ్యం పకాసతి.

౪౦. ‘‘తోసయిత్వాన సమ్బుద్ధం, గోతమం సక్యపుఙ్గవం;

సబ్బాసవే పరిఞ్ఞాయ, విహరామి అనాసవో.

౪౧. ‘‘ఏకనవుతితో కప్పే, యం కమ్మమకరిం తదా;

దుగ్గతిం నాభిజానామి, తనుకిచ్చస్సిదం ఫలం.

౪౨. ‘‘కిలేసా ఝాపితా మయ్హం…పే… విహరామి అనాసవో.

౪౩. ‘‘స్వాగతం వత మే ఆసి…పే… కతం బుద్ధస్స సాసనం.

౪౪. ‘‘పటిసమ్భిదా చతస్సో…పే… కతం బుద్ధస్స సాసనం’’.

ఇత్థం సుదం ఆయస్మా పుణ్ణకో థేరో ఇమా గాథాయో అభాసిత్థాతి.

పుణ్ణకత్థేరస్సాపదానం దుతియం.