౯. సోణకోటివీసత్థేరఅపదానం

౪౯. ‘‘విపస్సినో పావచనే, ఏకం లేణం మయా కతం;

చాతుద్దిసస్స సఙ్ఘస్స, బన్ధుమారాజధానియా.

౫౦. ‘‘దుస్సేహి భూమిం లేణస్స, సన్థరిత్వా పరిచ్చజిం;

ఉదగ్గచిత్తో సుమనో, అకాసిం పణిధిం తదా.

౫౧. ‘‘ఆరాధయేయ్యం సమ్బుద్ధం, పబ్బజ్జఞ్చ లభేయ్యహం;

అనుత్తరఞ్చ నిబ్బానం, ఫుసేయ్యం సన్తిముత్తమం.

౫౨. ‘‘తేనేవ సుక్కమూలేన, కప్పే [కప్పం (సీ.), కప్ప (క.)] నవుతి సంసరిం;

దేవభూతో మనుస్సో చ, కతపుఞ్ఞో విరోచహం.

౫౩. ‘‘తతో కమ్మావసేసేన, ఇధ పచ్ఛిమకే భవే;

చమ్పాయం అగ్గసేట్ఠిస్స, జాతోమ్హి ఏకపుత్తకో.

౫౪. ‘‘జాతమత్తస్స మే సుత్వా, పితు ఛన్దో అయం అహు;

దదామహం కుమారస్స, వీసకోటీ అనూనకా.

౫౫. ‘‘చతురఙ్గులా చ మే లోమా, జాతా పాదతలే ఉభో;

సుఖుమా ముదుసమ్ఫస్సా, తూలాపిచుసమా సుభా.

౫౬. ‘‘అతీతా నవుతి కప్పా, అయం ఏకో చ ఉత్తరి;

నాభిజానామి నిక్ఖిత్తే, పాదే భూమ్యా అసన్థతే.

౫౭. ‘‘ఆరాధితో మే సమ్బుద్ధో, పబ్బజిం అనగారియం;

అరహత్తఞ్చ మే పత్తం, సీతిభూతోమ్హి నిబ్బుతో.

౫౮. ‘‘అగ్గో ఆరద్ధవీరియానం, నిద్దిట్ఠో సబ్బదస్సినా;

ఖీణాసవోమ్హి అరహా, ఛళభిఞ్ఞో మహిద్ధికో.

౫౯. ‘‘ఏకనవుతితో కప్పే, యం దానమదదిం తదా;

దుగ్గతిం నాభిజానామి, లేణదానస్సిదం ఫలం.

౬౦. ‘‘కిలేసా ఝాపితా మయ్హం…పే… విహరామి అనాసవో.

౬౧. ‘‘స్వాగతం వత మే ఆసి…పే… కతం బుద్ధస్స సాసనం.

౬౨. ‘‘పటిసమ్భిదా చతస్సో…పే… కతం బుద్ధస్స సాసనం’’.

౬౩. ‘‘థేరో కోటివీసో [కోటివిసో (స్యా. క.), కోళివిసో (అఞ్ఞట్ఠానేసు)] సోణో, భిక్ఖుసఙ్ఘస్స అగ్గతో;

పఞ్హం పుట్ఠో వియాకాసి, అనోతత్తే మహాసరే’’తి.

ఇత్థం సుదం ఆయస్మా సోణో కోటివీసో థేరో ఇమా గాథాయో అభాసిత్థాతి.

సోణకోటివీసత్థేరస్సాపదానం నవమం.